രഞ്ജിത്തിനെതിരായ പരാതി: കോടതിയിൽ രഹസ്യമൊഴി നൽകി ബംഗാളി നടി

കൊച്ചി∙ സംവിധായകൻ രഞ്ജിത്തിനെതിരായ പരാതിയിൽ ബംഗാളി നടി രഹസ്യമൊഴി നൽകി. കൊൽക്കത്ത സെഷൻസ് കോടതിയിലാണ് നടി മൊഴി രേഖപ്പെടുത്തിയത്. പാലേരിമാണിക്യം സിനിമയുടെ ഓഡിഷൻ സമയത്ത് സംവിധായകന്‍ രഞ്ജിത്ത് മോശമായി പെരുമാറിയെന്നായിരുന്നു പരാതി. 

2009ൽ പാലേരി മാണിക്യം സിനിമയിൽ അഭിനയിക്കാൻ വിളിച്ചുവരുത്തിയ ശേഷം രഞ്ജിത് വളകളിൽ തൊടുന്ന ഭാവത്തിൽ കൈയിൽ സ്പർശിച്ചതായും മുടിയിൽ തലോടിയതായും നടി ആരോപിച്ചിരുന്നു. കഴുത്തിൽ സ്പർശിക്കാൻ ശ്രമിച്ചതോടെ മുറിയിൽ നിന്നിറങ്ങി.

ഇതേത്തുടർന്ന് സിനിമയിൽ അഭിനയിക്കാതെ പിറ്റേന്നു തന്നെ മടങ്ങി. ലൈംഗികമായി ഉപദ്രവിച്ചിട്ടില്ല. എന്നാൽ അതിലേക്കുള്ള സൂചനകൾ നൽകുന്നതായിരുന്നു രഞ്ജിത്തിന്റെ പെരുമാറ്റമെന്നായിരുന്നു നടിയുടെ വെളിപ്പെടുത്തൽ. താൻ നേരിട്ട മോശം അനുഭവം അന്നുതന്നെ ഡോക്യുമെന്ററി സംവിധായകൻ ജോഷി ജോസഫിനോട് പറഞ്ഞിരുന്നതായും അവർ പറഞ്ഞിരുന്നു.