യുഎസും യുദ്ധവും: രാജ്യാന്തര സ്വർണം കത്തിക്കയറി പുത്തൻ റെക്കോർഡിൽ; കേരളത്തിലും വില കുതിച്ചേക്കും

രാജ്യാന്തര സ്വർണവില റെക്കോർഡ് തൂത്തെറിഞ്ഞ് എക്കാലത്തെയും പുതിയ ഉയരത്തിൽ. ഔൺസിന് 2,​696.68 ഡോളറിലേക്കാണ് ഇന്ന് ഇന്ത്യൻ സമയം വൈകിട്ട് എട്ടോടെ വില ഉയർന്നത്. ഇന്ന് ഇതുവരെ മാത്രം 20 ഡോള‌ർ ഉയർന്നു കഴിഞ്ഞു. നിലവിൽ വ്യാപാരം പുരോഗമിക്കുന്നത് 2,​693 ഡോളറിൽ.  കഴിഞ്ഞ മാസം രേഖപ്പെടുത്തിയ 2,​685 ഡോളർ എന്ന റെക്കോർ‌ഡ് പഴങ്കഥയായി. 2,​700 ഡോളർ എന്ന മാന്ത്രികസംഖ്യ വൈകാതെ മറികടന്നേക്കുമെന്നാണ് വിലയിരുത്തലുകൾ.

കേരളത്തിലെ സ്വർണവിലയും കുതിച്ചുയരാൻ വഴിവയ്ക്കുന്നതാണ് രാജ്യാന്തര വിപണിയിലെ ഈ വിലക്കയറ്റം. ഇന്ന് കേരളത്തിൽ സ്വർണവില പവന് 160 രൂപ ഉയർന്ന് സർവകാല ഉയരമായ 57,​280 രൂപയിൽ എത്തിയിരുന്നു. 20 രൂപ ഉയർന്ന് 7,​160 രൂപയാണ് ഗ്രാം വില. രാജ്യാന്തര വില നിലവിലെ ട്രെൻഡ് തുടർന്നാൽ,​ നാളെ കേരളത്തിലെ വിലയും കത്തിക്കയറും.

തിരിച്ചടിയായി യുദ്ധവും യു.എസും ചൈനയും

ലോകത്തെ ഒന്നാം നമ്പ‌ർ സാമ്പത്തികശക്തിയായ യു.എസിലെ ചലനങ്ങളാണ് പ്രധാനമായും സ്വർണവിലയിൽ കുതിപ്പുണ്ടാക്കുന്നത്. ഒന്ന്,​ യുഎസിൽ സാമ്പത്തികരംഗം മാന്ദ്യഭീതിയിലാണെന്ന സൂചനയുമായി കഴിഞ്ഞമാസം മാനുഫാക്ചറിങ് മേഖലയുടെ വളർച്ചാ സൂചിക നെഗറ്റീവിലേക്ക് ഇടിഞ്ഞു.

രണ്ട്,​ യു.എസ് പ്രസിഡന്റ് തിരഞ്ഞെടുപ്പിൽ ആര് വിജയിക്കുമെന്ന് ഉറപ്പിച്ച് പറയാനാകാത്തവിധം മത്സരം പൊടിപാറുന്നതാണ്. ആരാകും പ്രസിഡന്റ് എന്ന സൂചന ലഭിച്ചാലേ യുഎസിന്റെ തുടർ സാമ്പത്തിക,​ രാഷ്ട്രീയ നയങ്ങളെ കുറിച്ച് അനുമാനങ്ങളിലേക്കെത്താൻ സാമ്പത്തിക,​ രാഷ്ട്രീയ നിരീക്ഷകർക്ക് കഴിയൂ. 

മൂന്ന്,​ ആഭ്യന്തര സമ്പദ്‌വ്യവസ്ഥയ്ക്ക് ഉണർവേകാനായി യുഎസ് കേന്ദ്രബാങ്കായ ഫെഡറൽ റിസർവ് വീണ്ടും അടിസ്ഥാന പലിശനിരക്ക് കുറയ്ക്കാനുള്ള സാധ്യതകളാണ്. പലിശ കുറഞ്ഞാൽ ആനുപാതികമായി യുഎസ് സർക്കാരിന്റെ കടപ്പത്രങ്ങളുടെ ആദായനിരക്ക് (ട്രഷറി യീൽഡ്)​ കുറയും. ഫലത്തിൽ,​ കടപ്പത്രത്തിലെ നിക്ഷേപം അനാകർഷകമാകും. ഡോളറിന്റെ മൂല്യവും കുറയും. നിക്ഷേപകർ ഡോളറിനെയും സ്വർണത്തെയും കൈവിട്ട് സ്വർണത്തിലേക്ക് മാറും. വില കൂടും.

നാല്,​ മധ്യേഷ്യയിൽ സംഘർഷത്തിന് അറുതിയില്ലെന്നതാണ്. യുദ്ധം എക്കാലത്തും സ്വർണവിലയുടെ കുതിപ്പിന്റെ കാലമാണ്. ആഗോള സമ്പദ്‌വ്യവസ്ഥയ്ക്കുമേൽ യുദ്ധം എപ്പോഴും സമ്മ‌ർദ്ദമാകാറുണ്ട്. യുദ്ധം പോലുള്ള പ്രതിസന്ധിഘട്ടങ്ങളിൽ ‘സുരക്ഷിത നിക്ഷേപം’ എന്ന പെരുമയും സ്വർണത്തിനുണ്ട്. കാര്യമായ നഷ്ടത്തിന് സാധ്യതയില്ലെന്നതാണ് കാരണം.  അതേസമയം ഓഹരി,​ കടപ്പത്ര വിപണികളിൽ വിറ്റൊഴിയൽ സമ്മർദ്ദമുണ്ടാകുകയും ചെയ്യും. ഈ സാഹചര്യങ്ങളിൽ സ്വർണ നിക്ഷേപങ്ങൾക്കാണ് ഡിമാൻഡ് കൂടുക. ഫലത്തിൽ സ്വർണവില കൂടും. ഈ ട്രെൻഡാണ് രാജ്യാന്തര തലത്തിൽ നിലനിൽക്കുന്നത്.

അഞ്ച്,​ ചൈനയിലെ സംഭവവികാസങ്ങളാണ്. തളർന്നുകിടക്കുന്ന ആഭ്യന്തര സമ്പദ് മേഖലയ്ക്ക് ഉണർവ് പകരാനുള്ള ഉത്തേജക പദ്ധതികളിലേക്ക് കടക്കുകയാണ് ചൈന. റിയൽ എസ്റ്റേറ്റ്,​ ഓഹരി,​ സ്വർണം എന്നിങ്ങനെ മൂന്ന് നിക്ഷേപ മാർഗങ്ങളാണ് പ്രധാനമായും ചൈനക്കാരുടെ മുന്നിലുള്ളത്. ഇതിൽ റിയൽ എസ്റ്റേറ്റിലും ഓഹരിയിലും നിക്ഷേപിക്കുന്നതിനോട് ഇപ്പോഴും പലരും അകലം പാലിക്കുന്നു. സ്വർണം വാരിക്കൂട്ടാനാണ് പലർക്കും താൽപര്യം. ഇതും വില വർധനയുടെ ആക്കം കൂട്ടുന്നു.