ലണ്ടൻ ∙ എമിറേറ്റ്സ് സ്റ്റേഡിയത്തിൽ ചെൽസിയെ നിഷ്പ്രഭരാക്കിയ കളിയുമായ് ആർസനൽ 3–0 നു വിജയിച്ചു. ചലിക്കാത്ത മധ്യനിരയും ഛിന്നഭിന്നമായ പ്രതിരോധനിരയുമായി ചെൽസി ലീഗിൽ എങ്ങനെ മുന്നോട്ട് നീങ്ങുമെന്ന ചോദ്യമവശേഷിപ്പിച്ചാണ് മൽസരത്തിനു ഫൈനൽ വിസിൽ മുഴങ്ങിയത്.
കോച്ച് അന്റോണിയോ കോണ്ടെയുടെ ടീം പ്രീമിയർ ലീഗ് പോയിന്റ് നിലയിൽ ഇപ്പോൾ എട്ടാംസ്ഥാനത്താണ്. ടീമിനെ ആദ്യ നാലുസ്ഥാനങ്ങളിലൊന്നിലെത്തിക്കാനുള്ള ടീം ഉടമ റൊമാൻ അബ്രമോവിച്ചിന്റെ ശ്രമങ്ങൾക്കും തിരിച്ചടി നേരിടുകയാണ്. ഡിയേഗോ കോസ്റ്റ ഒഴികെ ചെൽസി നിരയിൽ ആർക്കും കാര്യമായി തിളങ്ങാനായില്ല.
അലക്സിസ് സാഞ്ചസ്, തിയോ വാ‍ൽക്കോട്ട്, മെസൂട്ട് ഓസിൽ എന്നിവരാണ് ഗണ്ണേഴ്സിന്റെ ഗോളുകൾ നേടിയത്. ആർസീൻ വെംഗറുടെ ടീമിന് ലീഗിൽ തുടർച്ചയായ നാലാം ജയമാണിത്. പതിനൊന്നാം മിനിറ്റിൽ സാഞ്ചസാണ് ആദ്യ ഗോൾ നേടിയത്. കളി നാൽപ്പതു മിനിറ്റായപ്പോഴേക്കും ടീം മൂന്നുഗോളുകളും അടിച്ചുകൂട്ടിയിരുന്നു.
