ഏത്തപ്പഴവും പച്ചരിയും ചേർത്ത് അതീവ രുചികരമായ ഇലയപ്പം

ഏത്തപ്പഴവും പച്ചരിയും ചേർത്ത് അതീവ രുചികരമായ ഇലയപ്പം തയാറാക്കാം. ബ്രേക്ക്ഫാസ്റ്റായും പലഹാരമായും കുട്ടികൾക്ക് സ്കൂളിൽ കൊടുത്തു വിടാനും കിടിലൻ വിഭവമാണിത്.

ചേരുവകൾ

• പച്ചരി - ഒരു കപ്പ്
• ഏത്തപ്പഴം - 3 എണ്ണം( ഇടത്തരം വലിപ്പത്തിലുള്ളത്)
• ശർക്കര - 200 ഗ്രാം
• ഏലക്ക - 2
• നെയ്യ് - ഒരു ടേബിൾ സ്പൂൺ
• ഉപ്പ് - കാൽ ടീസ്പൂൺ
• തേങ്ങ ചിരകിയത് - ഒരു കപ്പ്

തയാറാക്കുന്ന വിധം

• പച്ചരി നന്നായി കഴുകി രണ്ടു മണിക്കൂർ വെള്ളത്തിൽ കുതിർത്തു വയ്ക്കുക.
• ശർക്കര, കാൽകപ്പ് വെള്ളം ചേർത്ത് ഉരുക്കി അരിച്ചെടുക്കുക.
• പച്ചരിയും രണ്ടു ഏത്തപ്പഴവും ശർക്കരപാനിയും ഏലക്കയും കൂടി ഇഡ്ഡലി മാവിന്റെ പരുവത്തിൽ മിക്സിയിൽ അരച്ചെടുക്കുക.
• ചുവട് കട്ടിയുള്ള ഒരു പാത്രത്തിൽ അരച്ച മാവും നെയ്യും ഉപ്പും കൂടി നന്നായി യോജിപ്പിക്കുക.
• ഇടത്തരം തീയിൽ തുടരെ ഇളക്കി നന്നായി കുറുക്കിയെടുക്കുക.
• ചൂടാറാൻ വേണ്ടി 10 മിനിറ്റ് അടച്ച് മാറ്റിവയ്ക്കുക.
• ചൂടാറിയതിനു ശേഷം ഇതിലേക്ക് ഒരു കപ്പ് തേങ്ങ ചിരകിയത് ചേർത്ത് നല്ല മയത്തിൽ കുഴച്ചെടുക്കുക.
• ചെറുതായി അരിഞ്ഞ ഒരു ഏത്തപ്പഴം കൂടി ചേർത്ത് യോജിപ്പിക്കുക.
• ഒരു വാഴയിലയിൽ അല്പം മാവ് വച്ച്  പരത്തി ഇല മടക്കിയതിനുശേഷം  15 മിനിറ്റ് ആവിയിൽ വേവിക്കുക.
• തലേ ദിവസം രാത്രി തയാറാക്കി വച്ചാൽ  രാവിലത്തെ ജോലി എളുപ്പമാകും.

English Summary : Elayappam, Nadan Recipe.