1. ഓയിൽ ക്ലെൻസർ, 2. ഫെയ്സ് വാഷ്, 3. എക്സ്ഫോളിയന്റ്, 4. ടോണർ, 5. എസൻസ്, 6. സീറം, 7. ഷീറ്റ് മാസ്ക്, 8. ഐ ക്രീം, 9. മോയ്സ്ചറൈസർ, 10. സൺസ്ക്രീൻ! ഇതാണ് 10 സ്റ്റെപ് കൊറിയൻ ബ്യൂട്ടി ട്രെൻഡ്. പെട്ടെന്നു വൈറൽ ആയെങ്കിലും ഇതിനെതിരെ ഒരു വിഭാഗം ‘മിനിമലിസ’ വക്താക്കളെത്തി. ഇത്രയധികം ശ്രമകരമായ, നീണ്ട ഘട്ടങ്ങളും ഇത്രയേറെ ഉത്പന്നങ്ങളും വേണ്ടെന്നും എത്രയും കുറച്ചുമാത്രം ഉപയോഗിക്കുന്ന മിനിമലിസ്റ്റ് സ്കിൻകെയർ ആണ് ശരിയെന്നും അവർ വ്യക്തമാക്കുന്നു.

എന്നാൽ കൊറിയൻ സൗന്ദര്യ ഉത്പന്നങ്ങൾക്ക് ആരാധകർ ഏറെയാണ്. ഏറെ ഫലപ്രദമായ ഇൻഗ്രീഡിയന്റ്സും വ്യത്യസ്തമായ ഫോർമുലേഷനും തന്നെ താരങ്ങൾ. ഒച്ച് പുറത്തുവിടുന്ന ഒട്ടലുള്ള പദാർഥം പ്രധാന ചേരുവയായുള്ള കോസ്മെറ്റിക് ഉത്പന്നങ്ങൾ കൊറിയൻ സ്പെഷൽ ആണ്. ഇതിൽ ഹാല്യൂറോണിക് ആസിഡ്, ഗ്ലോകോളിക് ആസിഡ്, ഗ്ലൈകോപ്രോട്ടീനുകൾ എന്നിവയുള്ളതിനാൽ ചർമത്തെ തിളക്കമുള്ളതാക്കുന്നു. മഗ് ബീൻ എന്ന ചെറുപയർ, അരിയുടെ എസൻസ് എന്നിവയും കൊറിയൻ സൗന്ദര്യപരിചരണ ഉത്പന്നങ്ങളിലെ പ്രധാന ഘടകങ്ങളാണ്.

∙ വിപണിയിലെ സൗന്ദര്യം

അമേരിക്കൻ സ്ത്രീകൾ ചെലവിടുന്നതിനേക്കാൾ രണ്ടിരട്ടി കൂടുതൽ പണം കോസ്മെറ്റിക്– സ്കിൻ കെയർ ഉത്പന്നങ്ങൾക്കു വേണ്ടി ചെലവിടുന്നവരാണ് കൊറിയൻ സ്ത്രീകൾ. പക്ഷേ തെറ്റിദ്ധരിക്കേണ്ട, സ്ത്രീകൾ മാത്രമല്ല കൊറിയൻ പുരുഷന്മാരും സൗന്ദര്യത്തിൽ ഏറെ ശ്രദ്ധ ചെലുത്തുന്നവരാണ്. അക്കാര്യത്തിൽ ജെൻഡർ സ്റ്റീരിയോടൈപ്പുകൾ ഉടച്ചുവാർക്കുന്ന കൊറിയൻ രീതി പ്രശംസിക്കപ്പെടേണ്ടതാണ്. 

സൈനിക സേവനം നടത്തുന്ന പുരുഷന്മാർക്കു മാത്രമായുള്ള പ്രത്യേക സൗന്ദര്യ ഉത്പന്നങ്ങൾ വരെ കൊറിയൻ കമ്പനികൾ നാട്ടിലെ വിപണിയിൽ എത്തിക്കുന്നുണ്ട്. യുഎസിലും ജപ്പാനിലും ചൈനയിലും ആധിപത്യം സ്ഥാപിച്ച ശേഷം കൂടുതൽ വളർച്ച തേടി ദക്ഷിണ പൂർവേഷ്യയിലെയും മിഡിലീസ്റ്റിലെയും രാജ്യങ്ങളിൽ ശ്രദ്ധ ചെലുത്തുകയാണിപ്പോൾ കൊറിയൻ കമ്പനികൾ.

∙ ‘ഹൗ ഇസ് യുവർ ബെല്ലി ഡൂയിങ്?’

സൗന്ദര്യമാണെങ്കിലും അതിരു കടന്നാൽ അതും വിഷമയമാകാതെ വഴിയില്ലല്ലോ! ഈ സാഹചര്യങ്ങളിലൂടെ കടന്നുപോകുകയാണ് കൊറിയയിൽ ജോലി– പഠന സംബന്ധിയായ കാര്യങ്ങൾക്കായി എത്തുന്ന മറുനാടൻ ചെറുപ്പക്കാർ. ‘ഹൗ ഇസ് യുവർ ബെല്ലി ഡൂയിങ് ?’ എന്നെഴുതിയ ബോർഡ് വഴിയരികിൽ കണ്ടാൽ ചിരിക്കാനാകില്ല, അവിടെയുള്ള മറുനാടൻ ചെറുപ്പക്കാർക്ക്. കാരണം അവിടെയെത്തിയ നാൾ മുതൽ അവർ നേരിടുന്ന ബോഡി ഷേമിങ് അത്രയേറെ രൂക്ഷമാണ്. ‘മെലിഞ്ഞു കൊലുന്നനെ’യുള്ള ‘വയറൊട്ടിയ’ കൊറിയൻ സൗന്ദര്യ സങ്കൽപം അന്നാട്ടിലെത്തുന്നവരുടെ മാനസികാരോഗ്യത്തെ തന്നെ കാർന്നു തിന്നാൻ തുടങ്ങിയിരിക്കുന്നു. 

അതീവ നിർബന്ധ ബുദ്ധിയുള്ള ‘കെ ബ്യൂട്ടി’ സങ്കൽപം ബോഡി പോസിറ്റിവിറ്റി എന്ന സാധ്യതയെ തന്നെ ഇല്ലാതാക്കുകയാണ്. മറുനാട്ടുകാരായ ചെറുപ്പക്കാർക്ക് ഇതിന്റെ മാനസികാഘാതം വലുതാണെന്ന് കൊറിയ ടൈംസ് പോലുള്ള മാധ്യമങ്ങൾ തന്നെ അടുത്തിടെ റിപ്പോർട്ട് ചെയ്തിരുന്നു. ശരീര ഭാരത്തിന്റെയും പ്രത്യേക ഉടലളവുകളിൽ ഉൾപ്പെടാത്തതിന്റെയും പേരിൽ നിരന്തരമായി കളിയാക്കലുകൾക്കും വിലയിരുത്തലുകൾക്കും വിധേയമാക്കപ്പെടുന്നതിനാൽ പലരും വിഷാദരോഗം പോലുള്ള മാനസികാവസ്ഥകളിലൂടെ കടന്നുപോകുന്നു. ശരീരഭാരത്തെക്കുറിച്ചുള്ള നിരന്തരവിമർശനം മൂലം ഓഫിസിലെ ഇടവേളയിൽ ആഹാരം കഴിക്കാനാകാതെ ആരോഗ്യപ്രശ്നം നേരിട്ടവരും അനുഭവം തുറന്നുപറയാൻ തയാറായി.

കൊറിയയിലെ ഗഞ്ചിയോൺ പ്രദേശത്തെ വഴിയോര വിശ്രമകേന്ദ്രത്തിനടുത്തുള്ള ‘ഹൗ ഇസ് യുവർ ബെല്ലി ഡൂയിങ്?’ എന്നെഴുതിയ നിർമിതിയിൽ മറ്റു ചില വിശദാംശങ്ങൾ കൂടിയുണ്ട്. വിവിധ പ്രായത്തിലുള്ളവരുടെ ശരീര അളവുകളുടെ വ്യത്യാസം മനസ്സിലാകുന്ന വിധത്തിൽ ഇടവിട്ട് സ്ഥാപിച്ചിട്ടുള്ള ബാറുകൾക്കിടയിലൂടെ അകത്തുകടക്കാനാകുമോ എന്നറിയാനുള്ളതാണ് മരത്തിൽ ഒരുക്കിയിട്ടുള്ള ഈ ഇൻസ്റ്റലേഷൻ. 

20 വയസ്സുള്ളവരുടെ ‘ഐഡിയൽ അരക്കെട്ട് അളവ്’ 17.35 സെന്റിമീറ്റർ ആണ് ഇതിൽ. 30 വയസ്സുകാരുടെ അരക്കെട്ട് 19.02 സെന്റീ മീറ്റർ ആകാവൂയെന്നാണ് കൊറിയൻ സൗന്ദര്യ സങ്കൽപം. ഇത്തരത്തിൽ 60 വയസുള്ള സ്ത്രീയുടെ അരക്കെട്ടിന് 24.99 സെന്റി മീറ്ററാകാം. അരക്കെട്ടിനും നിതംബത്തിനും വീതികൂടുതലുള്ളവരുടെ നാട്ടിൽ നിന്നെത്തുവർക്ക് ഒരു ബാറിനകത്തുകൂടിയും പോകാനാകില്ലെന്നു പ്രത്യേകം പറയേണ്ടല്ലോ. 

ഈ അഴകളവുകളിലേക്കു സ്വയം പരിമിതപ്പെടുത്തിയാണ് കൊറിയയിലെ പെൺകുട്ടികൾ വളർന്നുവരുന്നതു തന്നെ. നല്ല നടപ്പും വ്യായാമം പോലുള്ള ആരോഗ്യപരിചരണ രീതിയും പ്രചരിപ്പിക്കാനാണ് ഇതു സ്ഥാപിച്ചിരിക്കുന്നത് എന്നു വാദിച്ചാൽ പോലും കൊറിയയുടെ വയറൊട്ടിയ ഈ ‘ബ്യൂട്ടി സ്റ്റാൻഡേർഡ്’’ തീർത്തും സങ്കുചിതമാണെന്നു പറയാതിരിക്കാനാകില്ല. ഇതിനെ പൊളിച്ചെഴുതാനും ബോഡി പോസിറ്റിവിറ്റിയുടെ ആവശ്യകത ബോധ്യപ്പെടുത്താനും ഇതേക്കുറിച്ചു കൂടുതൽ സംസാരിക്കേണ്ടതുണ്ട് എന്ന തിരിച്ചറിവിലാണ് കൊറിയയിലേക്കു കുടിയേറിയവർ.

English Summary: Want Korean Glass Skin? The Dark Side of K-Beauty