ഒരു സൺസ്ക്രീൻ മേടിക്കാൻ എത്ര രൂപ വരെ നിങ്ങൾ ചെലവാക്കും? 200 രൂപയ്ക്കും 2000 രൂപയ്ക്കും സൺസ്ക്രീൻ കിട്ടുന്ന ഇക്കാലത്ത് കാശ് മാത്രമാണോ നിങ്ങൾ നോക്കുന്ന ഫാക്ടര്‍? തീർച്ചയായും അല്ല. മേക്കപ്പ്, സ്കിൻകെയർ, ഹെയർകെയർ എന്നീ വിഷയങ്ങളിലേക്കു വരുമ്പോൾ ക്വാളിറ്റി പ്രൊഡക്ട്സ് ഉപയോഗിക്കാനാണ് എല്ലാവർക്കും ഇഷ്ടം. കാശ് കുറച്ചു കൂടുതലായാലും ഗുണമേന്മ കുറഞ്ഞ ഉൽപന്നങ്ങൾ സ്വന്തം ചർമത്തിനും മുഖത്തിനും മുടിക്കുമൊക്കെ വേണ്ടി ആരും തിരഞ്ഞെടുക്കാറില്ല. കാലാകാലങ്ങളായി ലോകമെങ്ങുമുള്ള ബ്യൂട്ടി ബ്രാൻഡുകൾ ഈ ഒരു ഫാക്ടറാണ് മാർക്കറ്റിങ്ങിനായി ഉപയോഗിക്കുന്നതും.

സെലിബ്രിറ്റികളെ മുൻനിർത്തി ബ്രാൻഡുകൾ പരസ്യം ചെയ്യുമ്പോൾ സ്വീകാര്യത ലഭിക്കുന്നതും ഇപ്പോഴും ഭംഗി എന്നത് സിനിമകളിലെ നായികാ–നായകന്മാരോട് ചേർത്തുവായിക്കപ്പെടുന്നതുകൊണ്ടാണ്. അതുകൊണ്ടുതന്നെ ബ്രാൻഡ് അംബാസഡർമാരിൽനിന്ന് ഈ സെലിബ്രിറ്റികൾ ബ്രാൻഡ് ഓണേഴ്സ് ആയപ്പോൾ അവരുടെ ഉൽപന്നങ്ങൾക്കും ആരാധകർ ഏറെ. ദീപിക പദുക്കോണിന്റെ സ്കിൻകെയർ ബ്രാൻഡായ ‘82 ഡിഗ്രി ഈസ്റ്റ്’, കത്രീന കൈഫിന്റെ ബ്യൂട്ടി ബ്രാൻഡ് ‘കേയ് ബ്യൂട്ടി’, പ്രിയങ്ക ചോപ്രയുടെ ഹെയർകെയർ ബ്രാൻഡ് ‘അനോമലി’ എന്നിങ്ങനെ താരങ്ങളുടെ പേരിൽ ഹിറ്റ് സിനിമകൾക്കൊപ്പം ഹിറ്റ് ബ്രാൻഡുകളുമുണ്ട്. സിനിമയ്ക്കുമപ്പുറത്തേക്കു വളർന്ന ആ ഉൽപന്നങ്ങൾ എന്തെല്ലാമാണ്? ഇന്ത്യൻ താരങ്ങളിൽ ആർക്കെല്ലാം ഇത്തരത്തിൽ ബ്യൂട്ടി ബ്രാൻഡുകൾ ഉണ്ട്? ഇവയൊക്കെ സാധാരണക്കാരന്റെ ‘പോക്കറ്റിൽ’ ഒതുങ്ങുന്നവയാണോ?

∙ കേയ് ബ്യൂട്ടി – കത്രീന കെയ്ഫ്

ഇന്ത്യയിലെ ആദ്യത്തെ സെലിബ്രിറ്റി മേക്കപ് ബ്രാൻഡ് ലോഞ്ച് ചെയ്തത് കത്രീന കെയ്ഫ് ആണ്. ബ്യൂട്ടി, വെൽനെസ് ഉൽപന്നങ്ങളുടെ ഓൺലൈൻ–ഓഫ്‌ലൈൻ വ്യാപാരക്കമ്പനിയായ നൈകയുമായി ചേർന്ന് 2019–ലാണ് ‘കേയ് ബൈ കത്രീന’ വിപണിയിലെത്തുന്നത്. ഫേസ്, ഐസ്, ലിപ്സ്, നെയിൽസ് പ്രൊഡക്ട്സ് അടങ്ങുന്ന ഒരു കംപ്ലീറ്റ് മേക്കപ് റേഞ്ച് കേയ് ബ്യൂട്ടിയിലുണ്ട്. പ്രൈമര്‍, ഫൗണ്ടേഷൻ, കൺസീലർ, കോംപാക്ട് പൗഡർ, ബ്ലഷ് എന്നീ ഫേസ് മേക്കപ്പുകൾക്കൊപ്പം ഐ മേക്കപ്പിനുള്ള കാജൽ/പെൻസിൽ, ഐ ഷാഡോ, ഐ ലൈനർ, മസ്ക്കാര, ഐ ബ്രോ എൻഹാൻസർ എന്നിവയും ലഭ്യമാണ്.

ലിപ് പ്രൊഡക്ട്സിലും ലൈനർ, ലിക്വിഡ്, ക്രയോൺ, മാറ്റെ എന്നിങ്ങനെ വ്യത്യസ്ത റേഞ്ചിലുള്ള ലിപ്സ്റ്റിക്കുകൾ ഉണ്ട്. 250 രൂപ മുതൽ 1200 വരെയുള്ള ‘പോക്കറ്റി’ൽ ഒതുങ്ങുന്ന പ്രൊഡക്ടുകൾ കേയ് ബ്യൂട്ടിയിലുണ്ട്. ഇന്ത്യൻ സ്കിൻ ടോൺ പോലെ വൈവിധ്യമായ ഒരു കലക്ഷനാണ് കത്രീന ഒരുക്കിയിരിക്കുന്നത്. ‘It's Kay to be you’ എന്ന ടാഗ്‌ലൈൻ തന്നെ കാലാകാലങ്ങളായി നമ്മൾ കണ്ടുവരുന്ന സൗന്ദര്യസങ്കൽപ്പങ്ങളെ പൊളിച്ചെഴുതുന്നതാണ്. കേയ് ബ്യൂട്ടി മാറ്റെ ബ്ലഷ് (825 രൂപ), കേയ് ബ്യൂട്ടി മാറ്റിനി മാറ്റെ ലിപ് ക്രയോൺ ലിപ്സ്റ്റിക്ക് (825 രൂപ), മെറ്റാലിക് ഐഷാഡോ സ്റ്റിക്ക് പെൻസിൽ (699 രൂപ) എന്നിവയാണ് കത്രീനയുടെ ‘ഹിറ്റ്’ പ്രൊഡക്ട്സ്.

∙ 82 ഡിഗ്രി ഈസ്റ്റ് – ദീപിക പദുക്കോൺ

താരനിരയിലേക്ക് ഏറ്റവും പുതിയതായി എത്തിയ ബ്രാൻഡാണ് 82 ഡിഗ്രി ഈസ്റ്റ്. ബ്രാൻഡ് ഓണറുടെ പേര് തന്നെ ഒരു ബ്രാൻഡ് ആണ്: ദീപിക പദുക്കോൺ! മേക്കപ്പല്ല, സ്കിൻകെയറാണ് 82 ഡിഗ്രി ഈസ്റ്റിന്റെ ഫോക്കസ്. സ്കിൻകെയർ നമ്മുടെ നിത്യജീവിതത്തിന്റെ ഭാഗമാക്കുക എന്ന ലക്ഷ്യത്തോടെ വെറും 2 പ്രൊഡക്ടുകളുമായാണ് 2023ൽ ‘82 ഡിഗ്രി ഈസ്റ്റ്’ എന്ന ബ്രാൻഡ് ലോഞ്ച് ചെയ്തത്. അശ്വഗന്ധ ബൗൺസ് എന്ന മോയ്ച്ചുറൈസറും പച്ചൗളി ഗ്ലോ എന്ന സൺസ്ക്രീൻ ഡ്രോപ്പുകളും. പിന്നീട് ക്ലെൻസർ, ടോണർ, മോയ്ച്ചറൈസർ, സൺസ്ക്രീന്‍, ഫേസ് ഓയിൽ എന്നിങ്ങനെ ചർമ്മസംരക്ഷണത്തിനുള്ള മറ്റു പ്രൊഡക്ടുകളും വിപണിയിലിറക്കി.