കയ്യിൽ ഇലക്ട്രിക് വാഹനമുണ്ടോ? ഇക്കാര്യങ്ങൾ ചെയ്തില്ലെങ്കിൽ ‘പണി’യാകും; പരിപാലനത്തിൽ എന്തെല്ലാം ശ്രദ്ധിക്കണം?

∙ ചാർജിങ്

ഉയർന്ന താപനില പ്രതികൂലമായി ബാധിക്കുന്ന ഒന്നാണ് ചാർജിങ് ക്ഷമത. കടുത്ത ചൂടുള്ളപ്പോൾ ബാറ്ററിയിൽ ചാർജ് നിറയാൻ കൂടുതൽ സമയമെടുക്കും. ഡിസി ഫാസ്റ്റ് ചാർജിന്റെ കാര്യത്തിലാണിത് കൂടുതൽ പ്രകടമാകുക. ഇലക്ട്രിക് വാഹനങ്ങളിൽ ബാറ്ററി, മോട്ടർ, ഇലക്ട്രോണിക് നിയന്ത്രണ യൂണിറ്റുകൾ എന്നിവയുടെ താപനില നിയന്ത്രിക്കാനുള്ള സംവിധാനം ഉണ്ട്. കൂളന്റ് ചംക്രമണത്തിനായുള്ള പമ്പ്, റേഡിയേറ്റർ, ഫാൻ എന്നിവയാണ് ഇതിന്റെ ഘടകങ്ങൾ. അതുകൊണ്ട് കടുത്ത വേനലിൽ ഇവയുടെ പ്രവർത്തനക്ഷമതയും കൂളന്റിന്റെ അളവും കൃത്യമായ ഇടവേളകളിൽ പരിശോധിക്കണം.  

∙ മഴക്കാലത്ത് 

വേനൽ കഴിഞ്ഞ് മഴക്കാലം അടുക്കുമ്പോൾ മറ്റു ചില കാര്യങ്ങൾ ശ്രദ്ധിക്കാനുണ്ട്. നനവും ഈർപ്പവുമൊക്കെ ഇലക്ട്രിക് ഉപകരണങ്ങളുടെ അന്തകരാണെന്ന പൊതുധാരണയിൽ അൽപം കഴമ്പുണ്ട്. പക്ഷേ, ഒരു ആധുനിക ഇലക്ട്രിക് വാഹനത്തിന്റെ ഘടകങ്ങൾ (ബാറ്ററി ഉൾപ്പെടെ) ജലാംശത്തിന്റെ കടന്നുകയറ്റത്തിൽനിന്നു സംരക്ഷിക്കപ്പെട്ടവയാണ്. ഐപി67 എന്ന സംരക്ഷണനിലവാരം ഇല്ലാത്തവ ചുരുക്കമാണ്. അതുകൊണ്ട് ഒരു ഇലക്ട്രിക് വാഹനം മണിക്കൂറുകളോളം പെരുമഴയത്ത് ഓടിച്ചാൽപോലും കുഴപ്പമൊന്നും വരാനില്ല. ഒരടിവരെ താഴ്ചയുള്ള വെള്ളക്കെട്ടിലൂടെ കടന്നുപോയാലും സ്ഥിതി ഇതുതന്നെ. ദീർഘനേരം തുറന്ന സ്ഥലത്ത് മഴയേറ്റു കിടന്നാലും വാഹനത്തിന്റെ ബാറ്ററി പായ്ക്ക്, മോട്ടർ, ഇലക്ട്രോണിക് ഘടകങ്ങൾ എന്നിവയിലൊന്നും വെള്ളമിറങ്ങാതെയും ഈർപ്പം രൂപപ്പെടാതെയും ഇരിക്കാൻ പാകത്തിലാണ് രൂപകൽപന. എങ്കിലും മേൽപറഞ്ഞ സാഹചര്യങ്ങളൊക്കെ കഴിയുമെങ്കിൽ ഒഴിവാക്കുന്നതുതന്നെയാണു നല്ലത്.

∙ ചാർജിങ്ങിൽ വേണം കൂടുതൽ ശ്രദ്ധ 

മഴക്കാലത്ത് ചാർജിങ്ങുമായി ബന്ധപ്പെട്ട കാര്യങ്ങളിലാണ് ഏറെ ശ്രദ്ധ വേണ്ടത്. ഉപയോഗിക്കുന്നതിനുമുൻപ് ചാർജിങ് ഗൺ, വാഹനത്തിലെ ചാർജിങ് പോർട്ട് എന്നിവയിൽ നനവില്ലെന്ന് ഉറപ്പുവരുത്തണം. ചാർജ് ചെയ്യുന്ന സ്ഥലം മഴച്ചാറ്റലിൽനിന്നു വേണ്ടത്ര സംരക്ഷണമുള്ളതായിരിക്കണം. വീട്ടിലാണ് ചാർജ് ചെയ്യുന്നതെങ്കിൽ ഉപയോഗിക്കുന്ന പ്ലഗ് പോയിന്റ്, പവർസ്വിച്ച്, വയറിങ് തുടങ്ങിയവയ്ക്ക് ഈർപ്പംമൂലം ലീക്കുണ്ടോ എന്ന് ഇലക്ട്രീഷ്യനെക്കൊണ്ടു പരിശോധിപ്പിക്കുന്നതു നല്ലതാണ്. വീട്ടിലെ കണക്‌ഷന്റെ എർത്തിങ് ശരിയല്ലെങ്കിൽ ചാർ‌ജിങ് തടസ്സപ്പെടാൻ സാധ്യതയുണ്ട്. 

മഴക്കാലത്തുണ്ടാകുന്ന ഇടിമിന്നലാണ് മറ്റൊരു അപകടം. ഇടിമിന്നൽമൂലം ഇലക്ട്രോണിക് ഘടകങ്ങൾ തകരാറിലാകാനുള്ള സാധ്യത മറ്റേതൊരു വാഹനത്തിനും ഉള്ളതിൽക്കൂടുതൽ ഇലക്ട്രിക് വാഹനങ്ങൾക്കില്ല. എന്നാൽ വാഹനം ചാർജ് ചെയ്യുന്ന സമയത്ത് ഇടിമിന്നലുണ്ടെങ്കിൽ അപകടസാധ്യത വർധിക്കും. അങ്ങനെയുള്ളപ്പോൾ ചാർജിങ് നിർത്തി ഗൺ വാഹനത്തിൽനിന്നു വേർപെടുത്തിയിടുന്നതാണു നല്ലത്. മഴക്കാലത്ത് രാത്രിയിൽ വാഹനം ചാർജിങ്ങിനു ഘടിപ്പിച്ചിട്ട് ഉറങ്ങാൻ പോയാൽ എപ്പോഴെങ്കിലും ഇടിമിന്നലുണ്ടായാൽ അറിയണമെന്നില്ല. ചാർജിങ് സംവിധാനത്തിനോ വാഹനത്തിനോ തകരാറു സംഭവിക്കാതെ കൃത്യസമയത്തു മുൻകരുതലെടുക്കാൻ കഴിയില്ല എന്നതിനാൽ മഴക്കാലത്ത് ഈ രീതി ഒഴിവാക്കുകയാണു നല്ലത്.