ഇന്ത്യൻ രാജാവിനെ ‘കൊള്ളയടിച്ച’ റാണി സ്റ്റെല്ല; കൈ നിറയെ സ്വർണം, വജ്രം..; എവിടെ ഒളിപ്പിച്ചു കോടികളുടെ ആ സ്വത്ത്!

കൂടുതൽ സമയവും ഇന്ത്യയിൽനിന്നു വിട്ടുനിന്ന പരംജീത്ത് സിങ് സ്റ്റെല്ലയ്ക്കൊപ്പമായിരുന്നു. ലോകത്തിലെതന്നെ ഏറ്റവും വലിയ ധനികരിലൊരാളായ തന്റെ പിതാവ് ജഗ്ജീത് സിങ് ഈ ബന്ധത്തെ എതിർക്കില്ലെന്നായിരുന്നു പരംജീത്തിന്റെ കണക്കുകൂട്ടൽ. ജഗ്ജീത്ത് സിങ്ങും പരംജീത്തിന്റെ മാതാവിനു പുറമെ സ്പാനിഷുകാരിയായ ഒരു നർത്തകിയെക്കൂടി രണ്ടാമതു വിവാഹം കഴിച്ചി‌ട്ടുണ്ടായിരുന്നു.

തുടർന്ന് പരംജീത്ത് സിങ് ആ ബന്ധം വളരെ രഹസ്യമായി സൂക്ഷിക്കാനാഗ്രഹിച്ചു. എന്നാൽ, കാണുന്നവരോടെല്ലാം താൻ പുതിയ മഹാറാണിയാണെന്നു സ്റ്റെല്ല വീമ്പു പറഞ്ഞു. വിവരമറി‍ഞ്ഞ ജഗജീത് സിങ് കപൂർത്തലയിലെ കൊട്ടാരത്തിന്റെ പരിസരത്തു പോലും സ്റ്റെല്ലയെ കണ്ടുപോകരുതെന്നു കൽപനയിറക്കി. പക്ഷെ, പരംജീത്ത് കപൂർത്തലയിൽതന്നെ സ്റ്റെല്ല കോട്ടേജ് എന്ന പേരിൽ ഒരു വീട് പണിതു സ്റ്റെല്ലയെ താമസിപ്പിച്ചു. അക്കാലത്തു കോടിക്കണക്കിനു രൂപ വിലയുള്ള 'ടാൽബോട്ട്-ലാഗോ ടി150-സി-എസ്എസ് സ്‌പോർട്‌സ് കൂപ്പെ കാറാണ് പരംജീത്ത് സ്റ്റെല്ലയ്ക്കു സമ്മാനമായി നൽകിയത്. 

സ്റ്റെല്ലയ്ക്കു വേണ്ടി പ്രത്യേകം പറഞ്ഞു ഡിസൈൻ ചെയ്ത് കസ്റ്റം മെയ്ഡ് ആയാണ് കാർ പുറത്തിറക്കിയത്. സ്റ്റെല്ലയാകട്ടെ തന്റെ വസ്ത്രങ്ങളുടെ നിറത്തിനിണങ്ങിയ വിധം കാറിന്റെ പെയിന്റ് അടിക്കടി മാറ്റി ഫോട്ടോഷൂട്ടുകളും നടത്തി. യൂറോപ്പിലും അമേരിക്കയിലും നിരവധി ഷോകളിൽ പങ്കെടുത്ത് ഒട്ടേറെ സമ്മാനങ്ങൾ സ്വന്തമാക്കിയ ഈ കാർ ഇപ്പോൾ അമേരിക്കയിലെ ദ് നെതർകട്ട് കലക്‌ഷന്‍ മ്യൂസിയത്തിലുണ്ട്. ഇന്ത്യയിലും അമേരിക്കയിലും ഇംഗ്ലണ്ടിലുമായി ആഡംബര ജീവിതം നയിച്ച ദമ്പതികൾ കപൂർത്തല രാജവംശത്തിന്റെ ഖജനാവിലെ വലിയൊരു പങ്കും ആ വഴിക്കു ധൂർത്തടിച്ചിരുന്നു.

∙ ബൃന്ദയെന്ന രാജകുമാരി

ഹിമാചൽ പ്രദേശിൽ ജബ്ബലിലെ രാജാവായിരുന്ന റാണ കരംചന്ദിന് രണ്ടാം ഭാര്യയിലുണ്ടായ മകളായിരുന്നു പരംജീത്തിന്റെ ആദ്യ ഭാര്യ ബൃന്ദ. പരംജിത്തിന് 9 വയസ്സുള്ളപ്പോഴാണ് 7 വയസ്സുകാരി ബൃന്ദയുമായുള്ള വിവാഹം ഉറപ്പിക്കുന്നത്. പരംജീത്തിന്റെ അച്ഛൻ ജഗ്ജീത് സിങ് ബൃന്ദയെ പാരിസിലയച്ചു പഠിപ്പിച്ചു. പാരിസിനോടും ഫ്രഞ്ചു ഭാഷയോടും കടുത്ത ആരാധാനയുള്ള വ്യക്തിയായിരുന്നു ജഗ്ജീത് സിങ്. തന്റെ പഴ്സനേൽ ഡയറിയെഴുതിയിരുന്നതു പോലും ഫ്രഞ്ചിലായിരുന്നു. ബൃന്ദ ഉന്നത വിദ്യാഭ്യാസം നേടി ഇന്ത്യയിലേക്കു മടങ്ങിയ ഉടൻ ആഘോഷമായി ഇരുവരുടെയും വിവാഹം നടത്തി. അവർക്കു മൂന്നു പെൺമക്കളുണ്ടായി.

∙ പണത്തിനു മീതെ പരാക്രമം

ബൃന്ദയ്ക്കും പരംജീത്തിനും ആൺകുട്ടികളില്ലാതിരുന്നതുകൊണ്ട് മകനെ വീണ്ടും വിവാഹം കഴിപ്പിക്കാൻ ജഗജീത് സിങ് തീരുമാനിച്ചു. ഹിമാചൽ പ്രദേശിലെ കാംഗ്രയിൽനിന്ന് അനുയോജ്യയായ ഒരു രജപുത്ര രാജകുമാരിയെ കണ്ടെത്തുകയും ചെയ്തു. പക്ഷേ, സ്റ്റെല്ലയുമായുണ്ടായിരുന്ന ബന്ധത്തിനപ്പുറം മറ്റൊരു വിവാഹം കഴിപ്പിക്കാനുള്ള പിതാവിന്റെ നിർബന്ധത്തിന് പരംജീത്ത് വഴങ്ങിയില്ല. ഒടുവിലൊരു പോംവഴിയായി ജഗജീത് സിങ് കണ്ടെത്തിയത് സ്റ്റെല്ലയെയാണ്. കാംഗ്രയിലെ രാജകുമാരി ലീലാവതിയുമായി അടുത്തിടപഴകാനും വിവാഹം  കഴിക്കാനും പരംജീത്തിനെ നിർബന്ധിക്കണമെന്ന് ജഗ്ജീത് സിങ് സ്റ്റെല്ലയോട് ആവശ്യപ്പെട്ടു. 

കൗശലക്കാരിയായ സ്റ്റെല്ല കോടിക്കണക്കിനു രൂപയാണു പ്രതിഫലം ചോദിച്ചത്. അദ്ദേഹം സമ്മതിക്കുകയും ചെയ്തു. അങ്ങനെ സ്റ്റെല്ലയുടെ കൂടി നിർബന്ധത്തിനു വഴങ്ങി പരംജീത്ത് സിങ് ലീലാവതിയെ വിവാഹം ചെയ്തു. അതിനിടെ ഒരിക്കൽ സ്റ്റെല്ലയുമായി വലിയ വഴക്കുണ്ടാക്കിയ പരംജീത്ത് പരിഭവിച്ച് ലീലാവതിയുടെ അടുത്തേക്കു പേയി കുറച്ചു ദിവസം താമസിച്ചു. ഏറെ താമസിയാതെ അവർക്കു സുഖ്ജീത്ത് സിങ് എന്ന മകൻ പിറന്നു. ലീലാവതിയോടൊപ്പം അധികകാലം താമസിക്കാൻ പരംജീത്തിന്റെ മനസ്സനുവദിച്ചില്ല. അദ്ദേഹം വീണ്ടും സ്റ്റെല്ലയുമായുള്ള ബന്ധം തുടർന്നു. 

‌സ്വർണത്തിന്റെ സിഗരറ്റ് ഹോൾ‍ഡറുകളും രാജമുദ്രയുള്ള വെള്ളിപ്പാത്രങ്ങളും ഉൾപ്പെടെയുള്ള സ്റ്റെല്ലയുടെ മറ്റു സമ്പാദ്യങ്ങൾ ലോകപ്രശസ്തമായ ക്രിസ്റ്റീസ് ഓക്‌ഷൻ ഹൗസ് ഉൾപ്പെടെയുള്ള സ്ഥലങ്ങളിൽ ലേലത്തിനു വന്നിട്ടുണ്ട്.

∙ രാഞ്ജിയായി വാഴ്ച

‌1937ൽ പരംജീത്തും സ്റ്റെല്ലയും ഇന്ത്യ വിട്ടു. ഇംഗ്ലണ്ടിലെ ഒരു ഗുരുദ്വാരയിൽ വച്ചു വിവാഹിതരായി. സ്റ്റെല്ലയുടെ പേരുമാറ്റി നരീന്ദർ കൗർ എന്നാക്കി. അങ്ങനെ സ്റ്റെല്ല മഡ്ജ് പരംജീത്ത് സിങ്ങിന്റെ മൂന്നാമത്തെ ഭാര്യയായി. 1948ൽ പരംജീത്ത് സിങ് കപൂർത്തലയിലെ രാജാവായി അധികാരമേറ്റു. ഇന്ത്യയ്ക്കു സ്വാതന്ത്ര്യം ലഭിച്ചതിന് ശേഷമായിരുന്നതുകൊണ്ട് കപൂർത്തല എന്ന നാട്ടുരാജ്യത്തിന്റെ പ്രസക്തി ഇല്ലാതായിരുന്നു. എങ്കിലും അത്യാഡംബരത്തോടെ സംഘടിപ്പിച്ച ചടങ്ങിൽ പരംജീത്ത് രാജാവായി അധികാരമേറ്റു. ഒപ്പം സ്റ്റെല്ല രാജ്ഞിയുമായി. ചടങ്ങിലേക്കായി സ്റ്റെല്ലയുടെ വസ്ത്രങ്ങൾ രൂപകൽപന ചെയ്തത് ലോക പ്രശസ്ത ഡിസൈനർമാരായ കാർട്ടിയർ ആയിരുന്നു. 

∙ പരംജീത്തിന്റെ പതനം

1955 ആയപ്പോഴേക്കും അദ്ദേഹത്തിന്റെ ആരോഗ്യം പാടേ ക്ഷയിച്ച് രോഗക്കിടക്കയിലായി. അതിനോടകം ആംഡബരത്തിന്റെയും ധൂർത്തിന്റെയും പേരിൽ സ്റ്റെല്ല കുപ്രസിദ്ധി നേടിയിരുന്നു. കപൂർത്തല രാജവംശത്തിന്റെ സ്വർണവും വജ്രവും അടക്കം വിലപിടിപ്പുള്ള പലതും അവർ കൈവശപ്പെടുത്തി. പരംജീത്തിന്റെ അവസാന കാലങ്ങളിൽ ആദ്യ ഭാര്യ ബൃന്ദയും ബന്ധുക്കളും അദ്ദേഹത്തിന്റെ പരിചരണം ഏറ്റെടുത്തു. സ്റ്റെല്ലയെ അദ്ദേഹത്തിൽനിന്ന് അവർ പരമാവധി അകറ്റി നിർത്തി. പരംജീത്ത് മരിച്ചതോടെ സ്റ്റെല്ലയെ കൊട്ടാരത്തിൽനിന്നു തന്നെ പുറത്താക്കി.

∙ അധഃപതനത്തോടെ അന്ത്യം

ഇംഗ്ലണ്ടിലേക്കു മടങ്ങിയ സ്റ്റെല്ല ഏറെത്താമസിയാതെ വീണ്ടും ഇന്ത്യയിലേക്കുതന്നെ തിരിച്ചെത്തി. ഡൽഹി ഡിഫൻസ് കോളനിയിലെ വസതിയിലായിരുന്നു കുറച്ചു കാലം താമസിച്ചിരുന്നത്. 1957 ആയതോടെ ഡൽഹിയിലെ താമസം അവർക്കു മടുത്തു. പിന്നീട് ഷിംലയിലേക്കു മാറി. സെസിൽ എന്ന ഹോട്ടലിലായിരുന്നു താമസം. കടുത്ത മദ്യപാനവും അച്ച‌ടക്കമില്ലാത്ത ജീവിതവുമായിരുന്ന ഷിംലയിൽ. ട്രോളി നിറയെ മദ്യക്കുപ്പികളും മറ്റു സാധനങ്ങളുമായി മാൾ റോഡിലൂടെ പോകുന്ന സ്റ്റെല്ല പലപ്പോഴും താമസ സ്ഥലത്തേക്കുള്ള വഴി തെറ്റി അലഞ്ഞു നടന്നു. പ്രായം 60 പിന്നിട്ടതോടെ അവരുടെ ആരോഗ്യം ക്ഷയിച്ചു തുടങ്ങി.