നെല്ലും വാഴയും പച്ചക്കറിയും.. ടൺ കണക്കിന് വിള; വരുമാനം ഒന്നരക്കോടി! ഉൽപാദനച്ചെലവ് കുറയ്ക്കാനും വഴി

∙ ഉൽപാദനച്ചെലവ് കുറയ്ക്കാം!

കൂടുതൽ വിസ്തൃതിയിൽ കൃഷി ചെയ്യുമ്പോൾ കൃഷിക്കാരന് ഇടപാടുകാരുമായി വിലപേശാന്‍ േശഷിയുണ്ടാകും. രാസവളമായാലും ചാണകമായാലും ടൺകണക്കിനു വാങ്ങുമ്പോൾ ഗണ്യമായ വിലക്കുറവ് ലഭിക്കും. അപ്പോള്‍ ഉൽപാദനച്ചെലവു കുറയും. കൃഷി കൂടുതല്‍ ആദായകരമാകും. ലാർജ് ഫോർമാറ്റ് കൃഷികാർഷിക യന്ത്രങ്ങൾ വാങ്ങി ഉപയോഗിച്ചും കൂലിച്ചെലവ് കുറയ്ക്കാം. സർക്കാർ വില നൽകാൻ വൈകുമെന്നതിനാൽ ഇത്തവണത്തെ നെല്ലുൽപാദനത്തിന്റെ പകുതി 2 മില്ലുകൾക്കാണ് നൽകിയത്. സർക്കാർ നിരക്കില്‍നിന്ന് അൽപം കൂടിയ വില നല്‍കി. നാലോ അഞ്ചോ ഏക്കറിലായിരുന്നു കൃഷിയെങ്കിൽ മില്ലുകാർ ഈ പരിഗണന നൽകില്ലായിരുന്നു. ഗോഡൗണിൽ സൂക്ഷിച്ചാൽ ഓഫ് സീസണിൽ ഇതിലും ഉയർന്ന വിലയ്ക്കു നെല്ല് വിൽക്കാമെന്നു െജെസൽ പറയുന്നു. വൈകാതെ അതിനായി ഗോഡൗണ്‍ നിര്‍മിക്കും.

∙ കർഷകൻ എന്ന മാനേജര്‍

പാടത്തിറങ്ങി കിളയ്ക്കാത്തവരൊന്നും കൃഷിക്കാരല്ലെന്ന ചിന്ത മാറണമെന്നു െജെസല്‍. കൃത്യമായ ആസൂത്രണത്തിലൂടെ കൃഷിയെ ഒരു സംരംഭമായി മാനേജ് ചെയ്യാൻ കൃഷിക്കാരനു കഴിയണം. വിപുലമായി കൃഷി സാധ്യമായാൽ മാത്രമേ ഇത്തരം മികവുള്ളവർ കാർഷികമേഖലയിലേക്കു വന്ന് മുതൽമുടക്കുകയുള്ളൂ. തുച്ഛമായ വരുമാനം മാത്രമുള്ള മേഖലയായി കൃഷിയെ മുരടിപ്പിച്ചതുകൊ ണ്ടാണ് സമർഥരായ ചെറുപ്പക്കാർ കടന്നുവരാത്തതും കൃഷി പുരോഗമിക്കാത്തതും. നാമമാത്ര വരുമാനം, തുച്ഛമായ ഉൽപാദനം, കുറഞ്ഞ മത്സരക്ഷമത, സാങ്കേതികമുന്നേറ്റത്തിനു സാധ്യതക്കുറവ് – നമ്മുടെ നാട്ടിലെ കൃഷിയും കൃഷിക്കാരും നേരിടുന്ന അടിസ്ഥാനപ്രശ്നങ്ങൾക്കു മറുമരുന്ന് കൃഷിക്കാരനെ വളരാൻ അനുവദിക്കുക മാത്രമാണ്.

മാർജിൻ തീരെക്കുറഞ്ഞ വിളകളാണ് നെല്ലും പച്ചക്കറിയും. ഒരു ക്വിന്റൽ ഉൽപാദിപ്പിച്ചാൽ ഒരു ദിവസത്തെ കൂലിക്കാശുപോലും അറ്റാദായം കിട്ടണമെന്നില്ല. എന്നാൽ നെല്ലും പച്ചക്കറിയും വാഴയും കൃഷി ചെയ്ത് ഒന്നരക്കോടി രൂപയിലധികം നേടാൻ െജെസലിനു കഴിയുന്നത് നൂറേക്കറിലധികം ഭൂമിയില്‍ കൃഷി ചെയ്യുന്നതുകൊണ്ടാണ്. കൃഷിയെ ബിസിനസ് ശൈലിയിൽ കാണുന്നതുകൊണ്ടാണ് ഇത്ര വിപുലമായി വളരാൻ കഴിഞ്ഞതെന്നു െജെസൽ പറയുന്നു. ചെറിയ പറമ്പിൽ  തൂമ്പയെടുത്ത് കിളയ്ക്കുന്ന കർഷകനല്ല, പകരം വലിയ കൃഷി യിടത്തെ കൃത്യമായ ആസൂത്രണത്തോടെ മികച്ച വിളനിലമാക്കുന്ന കർഷകനാണ് താനെന്നു െജെസൽ പരിചയപ്പെടുത്തുന്നു. 

∙ കെഎസ്ഇബിയെ കാത്തുനിൽക്കേണ്ട

വിപുലമായ കൃഷിയുടെ ഏറ്റവും വലിയ തലവേദനകളിലൊന്ന് തൊഴിലാളിക്ഷാമമാണ്. ഉയർന്ന കൂലി നൽകിയാൽപോലും തൊഴിലാളികളെ കിട്ടാനില്ലാത്ത സാഹചര്യത്തില്‍ ജൈസൽ പ്രയോജനപ്പെടുത്തിയ ത് അതിഥിത്തൊഴിലാളികളെയാണ്. ദിവസക്കൂലിക്കു പകരം ചെയ്യുന്ന ജോലിക്കു അനുസൃതമായി കൂലി നല്‍കുന്നു. ഞാറു നടുന്നതിനും മരുന്നടിക്കുന്നതിനുമൊക്കെ ഏക്കര്‍ അടിസ്ഥാനത്തിൽ കൂലി നൽ കുന്നതിനാല്‍  മുഴുവൻസമയ മേൽനോട്ടം വേണ്ടെന്നായി. പലയിടങ്ങളിലായി കൃഷി ചെയ്യുമ്പോൾ ഈ രീതി ഏറെ ഉപകാരപ്പെടുന്നു.

വിപുലമായ കൃഷിയിൽ കർഷകന് ഏറ്റവുമധികം തുണയാകുന്നത് യന്ത്രങ്ങളും സാങ്കേതികവിദ്യയുമാണെന്നു െജെസൽ കാണിച്ചുതരുന്നു. വിവിധ കാർഷികോപകരണങ്ങളുടെയും യന്ത്രങ്ങളുടെയും വിപുലമായ ശേഖരവും അവ സൂക്ഷിക്കാനായി ഒരു പണിശാലയും ജൈസലിനുണ്ട്. മോട്ടറുകളും മറ്റും കൂടുതൽ വാങ്ങിയിട്ടുള്ളതിനാൽ കേടാകുന്നവയുടെ അറ്റകുറ്റപ്പണികൾക്കായി കാത്തുനിൽക്കേണ്ടിവരാറില്ല. കൃത്യ സമയത്ത് പമ്പിങ് നടക്കേണ്ട നെൽകൃഷിയിൽ ഇതു നിർണായകമാണ്. കൂടുതൽ സ്ഥലത്തേക്കു കൃഷി വ്യാപിപ്പിക്കുമ്പോൾ വൈദ്യുതിലഭ്യത വലിയൊരു പ്രശ്നമാണ്. കെഎസ്ഇബിയുടെ സേവനത്തിനു കാത്തുനിന്നാൽ സമയത്തു കൃഷി നടക്കില്ല.

ഈ വലിയ പ്രശ്നം സോളർ പമ്പിലൂടെ ജൈസൽ നിസ്സാരമായി പരിഹരിച്ചു. കൊണ്ടുനടക്കാവുന്ന സോളർപാനലും മോട്ടറുമുപയോഗിച്ച് പമ്പിങ് ക്രമീകരിച്ചതോടെ മറ്റൊരു നേട്ടവുമുണ്ടായി– സൂര്യനുദിക്കുന്നതും അസ്തമിക്കുന്നതുമനുസരിച്ച് പാടത്തെ പമ്പിങ് ക്രമീകരിക്കപ്പെട്ടു. മോട്ടർ പ്രവർത്തിപ്പിക്കാനും ഓഫാക്കാനും പാടത്ത് ഒരാളെ അയയ്ക്കേണ്ടതില്ലെന്നായി.

∙ കടൽ കടക്കുന്ന പച്ചക്കറി

െജെസലിന്റെ പച്ചക്കറിക്കൃഷിയും വളരുകയാണ്. കഴിഞ്ഞ മാസം രണ്ട് ടൺ വാഴക്കുലയാണ് െജെസല്‍ പ്രസിഡന്റായ വിഎഫ്പിസികെ സമിതി കയറ്റുമതി ചെയ്തത്. കിലോയ്ക്ക് 5 രൂപയോളം അധികം നേടാനായി. ഏകദേശം 13,000 വാഴ ചെയ്ത െജെസലിന്റെ സാന്നിധ്യമാണ് സമിതിയെ കയറ്റുമതിക്കാവശ്യമായ ഉൽപാദനം കണ്ടെത്താൻ സഹായിച്ചത് . 

വമ്പൻകൃഷിയിലൂടെ കൃഷിക്കാരനു കുടുംബത്തിലും സമൂഹത്തിലും അന്തസ്സും അംഗീകാരവും നേടാമെന്നതിനുള്ള തെളിവുകൂടിയാണ് ജൈസലിന്റെ വിജയഗാഥ. സാധാരണ കർഷകനല്ല തന്റെ ഭർത്താവ് എന്ന അഫീലയുടെ വാക്കുകള്‍ അതു സാക്ഷ്യപ്പെടുത്തുന്നു. ഫോൺ: 9895242882