ഡൽഹിയിൽ പേര് ചോദിച്ചെത്തിയ പെൺകുട്ടി പൊലീസോ? മേൽവിലാസം തേടി കേരളത്തിലെ 400 പേർ; തലസ്ഥാനത്തെ മലയാളി പി.ഒ.

∙ ആശങ്കയകന്ന ആകാശം

മലിനീകരണം, സുരക്ഷിതത്വത്തെക്കുറിച്ചുള്ള ആശങ്ക, ഭാഷ തുടങ്ങി ഡൽഹിയിലേക്കുള്ള യാത്രയെ പിന്തിരിപ്പിക്കാവുന്ന പല കാരണങ്ങളും മാറ്റിവച്ചാണ് എത്തിയതെന്ന് തൃശൂർ വിയ്യൂർ സ്വദേശിനി പി.എം.ജിജി പറയുന്നു. എംബിഎ ബിരുദധാരിയായിട്ടും ലഭിച്ചിരുന്ന കുറഞ്ഞ ശമ്പളത്തെയും ജോലിഭാരത്തെയും കേന്ദ്ര സർക്കാരിലെ സ്ഥിരജോലിയുമായി താരതമ്യം ചെയ്തപ്പോൾ മുന്നിലെ തടസ്സങ്ങൾ മാറി.

‘ഭർത്താവ് വിജയവാഡയിൽ ജോലി ചെയ്യുന്നു. രണ്ടുവയസുകാരനായ ഇളയ മകനെയും സ്കൂൾ വിദ്യാർഥികളായ രണ്ടു പെൺകുഞ്ഞുങ്ങളെയും അമ്മയെ ഏൽപിച്ചിട്ടാണ് ഡൽഹിയിലേക്കു ട്രെയിൻ കയറിയത്. അപരിചിത നഗരം, തിരക്കു പിടിച്ചു പായുന്ന മനുഷ്യർ, പൊടി താങ്ങാനാവാത്ത കാലാവസ്ഥ തുടങ്ങി മനംമടുപ്പിക്കാൻ പല കാരണങ്ങൾ ഡൽഹിയിലുണ്ട്. എന്നാൽ, ജോലിയുടെ തിരക്കിലേക്കു കടന്നതോടെ ആ വല്ലായ്മകൾ ഒന്നൊന്നായി മാറി’ – ജിജി പറഞ്ഞു. 

ഈ നഗരം ഞങ്ങളെ സ്വീകരിച്ചിരിക്കുന്നു. ഞങ്ങൾ നഗരത്തെയും എന്നു പറഞ്ഞ് മറ്റുള്ളവരും ജിജിയുടെ അഭിപ്രായം പങ്കിടുന്നു.  സുഖദുഃഖങ്ങളും വിശേഷങ്ങളും പങ്കുവയ്ക്കാൻ കത്തുകളെ ആശ്രയിക്കുന്നവർ ഡൽഹിയിൽ ഇപ്പോഴും ഉണ്ടെന്നാണ് കുറച്ചു നാളത്തെ അനുഭവം ഇവരെ ബോധ്യപ്പെടുത്തുന്നത്. കത്തുകളുമായി ഇറങ്ങിപ്പുറപ്പെടുന്ന ഓരോ യാത്രയും ഒരു പുതിയ വഴി പരിചയപ്പെടുത്തുന്നു. നിമിഷ നേരത്തെ ഇടപഴകൽ ആണെങ്കിലും അവരിൽ ചിലരുടെ ചിരിയോ വ്യഥയോ മുന്നിൽ തെളിയുകയും ചെയ്യുന്നു.

∙ പുതിയ മേൽവിലാസം 

​കശ്മീരി ഗേറ്റിലെ പോസ്റ്റ്മാനായ വടക്കാഞ്ചേരിക്കാരൻ സി.ആർ. മണികണ്ഠന്റെ പ്രവർത്തനമേഖല കൂടുതലും ചെറിയ ഗലികളാണ്. കേരളത്തിന് അത്ര പരിചിതമല്ല ഡൽഹിയിലെ ഗലികൾ. കഷ്ടിച്ച് ഒരാൾക്ക് മാത്രം നടക്കാൻ പാകത്തിലുള്ള ചെറിയ ഗലികളിൽ തീപ്പെട്ടി അടുക്കിവച്ചപോലെ വീടുകളുണ്ട്. ഭൂഗർഭ നിലകളിൽ ആൾത്താമസമുണ്ടാകും. വിലാസങ്ങൾ തേടിപ്പിടിച്ചുള്ള യാത്രകൾക്കും ചിലപ്പോഴെല്ലാം ഗലികളിലെ ജീവിതംപോലെ ബുദ്ധിമുട്ടേറും.

പൊതുവേ പരാതിക്കാരല്ല ഡൽഹിക്കാരെന്നാണു മണികണ്ഠന്റെ അനുഭവം. സഹായിക്കാനുള്ള മനസ്സുണ്ട്. കേരളത്തിൽ നിന്നാണെന്ന് അറിയുമ്പോൾ ബഹുമാനമേറും. പ്രതികൂല കാലാവസ്ഥയിൽ നടന്നുള്ള കത്തുകൊടുക്കലിന് ‘ജോലിഭാര’മുണ്ടെങ്കിലും ‘പാർട് ടൈമർ ’ എന്ന മേൽവിലാസത്തിനു പകരം കേന്ദ്രസർക്കാർ ജീവനക്കാരനെന്ന ‘സ്ഥാനക്കയറ്റത്തിന്റെ’ സംതൃപ്തിയിലാണ് മണികണ്ഠൻ.

∙ ഈ നഗരം, ഒരു പാഠം

ഡൽഹി നഗരത്തിലെ ജീവിതത്തോടു പൊരുത്തപ്പെട്ടാൽ ലോകത്ത് എവിടെയും ജീവിക്കാമെന്നതാണ് കണ്ണൂർ കൂത്തുപറമ്പുകാരൻ അഖിൽ റേ മൂന്നു മാസം കൊണ്ടു പഠിച്ചെടുത്തത്. മേൽ ഉദ്യോഗസ്ഥർ‍ ഉൾപ്പെടെ ബഹുമാനപൂർവം ‘മാഡം’ എന്ന്  അഭിസംബോധന ചെയ്യുന്നത് അദ്ഭുതപ്പെടുത്തിയെന്നു പട്ടാമ്പിക്കാരി സി.എസ്.ഹൃദ്യയുടെ നിരീക്ഷണം.  തൃശൂർ, പാലക്കാട് ജില്ലകളിൽനിന്നുള്ളവരാണ് ആദ്യ ബാച്ചിലെത്തിയ തപാൽ ഉദ്യോഗസ്ഥരിൽ അധികവും. പോസ്റ്റ് ഓഫിസുകൾക്ക് സമീപം വാടകവീടുകൾ സുഹൃത്തുക്കളുമായി പങ്കിട്ടാണ്  ഭൂരിപക്ഷം പേരുടെയും താമസം. കുടുംബത്തെ കൂടി ഒപ്പം കൊണ്ടുവന്ന് വാടകവീട്ടിൽ താമസിക്കുന്നവരുമുണ്ട്. ജോലി കഴിഞ്ഞാൽ ഡൽഹി കാഴ്ചകൾ കണ്ടും ഭക്ഷണം ആസ്വദിച്ചും നഗരത്തിലെ നൂറിലേറെ വരുന്ന മാർക്കറ്റുകൾ സന്ദർശിച്ചുമൊക്കെ നടക്കുമ്പോൾ പലർക്കും സമയം തികയുന്നില്ല! പോസ്റ്റ്മാന്മാർ ചേർന്ന് ക്രിക്കറ്റ് ടീമും ഉണ്ടാക്കിക്കഴിഞ്ഞു.

∙  പുതുവഴിയിൽ പുതുരീതി

‘എനിക്ക് ഹിന്ദി അത്രയ്ക്കങ്ങ് വഴങ്ങില്ല. എങ്കിലും കത്തുകൾ കൈമാറുന്നതിൽ അതൊരു തടസ്സമാകുന്നില്ല. സംശയമുണ്ടായാൽ സഹായം ചോദിക്കും. സഹായിക്കാൻ ആളില്ലാത്ത ഇടമെങ്കിൽ ഗൂഗിൾ ട്രാൻസ്‌ലേറ്റിനെ ആശ്രയിക്കും’ –  ഇന്ദ്രപ്രസ്ഥ പോസ്റ്റ് ഓഫിസിലെ പോസ്റ്റ്‌വുമൺ കെ.എ.ആര്യയുടെ അനുഭവം. തൃശൂർ പാലയ്ക്കൽ സ്വദേശിയാണ് ആര്യ.  നാടിനെ അപേക്ഷിച്ച് ഡൽഹിയിലെ കത്ത് വിതരണം എളുപ്പമാണെന്നാണ് മിക്കവരുടെയും അഭിപ്രായം. ‘പരിചിതമല്ലാത്ത വീട്ടുപേര് അന്വേഷിച്ച് വീടുവീടാന്തരം കയറേണ്ടതില്ല. ഇവിടെ ഓരോ വീടിനും ഓരോ നമ്പറാണ്. റോഡിന്റെയും അപ്പാർട്മെന്റിന്റെയും കോളനിയുടെയും പേര് കൃത്യമായി ഉണ്ടാകും. വീട്ടുനമ്പർ നോക്കി കത്തു കൈമാറിയാൽ മതി.’ – പശ്ചിം വിഹാറിലെ പോസ്റ്റ്‌വുമൺ പട്ടാമ്പിക്കാരി കെ.രേഷ്മ പറഞ്ഞു.