‌വീണ പറയുന്നു: എന്റെ കഥ പറയുന്നത് നിർത്താൻ തീരുമാനിച്ചതാണ്, പക്ഷേ...; ആ കുട്ടിയുടെ കത്ത് മറക്കില്ല; 65 തവണ പരീക്ഷിച്ച വിഭവം വരെയുണ്ട്!

∙ സ്വന്തമായി തയാറാക്കിയ, പുതുതായി പരീക്ഷിച്ച ആദ്യത്തെ വിഭവം എന്താണ്? 

സ്വന്തമായി പരീക്ഷിച്ച വിഭവങ്ങൾ ഒന്നുമുണ്ടായിട്ടില്ലെന്നു പറയാം. പലയിടത്തു നിന്നായി കഴിച്ചുമറന്ന രുചിക്കൂട്ടുകളാണ് പരീക്ഷണത്തിനായി എടുക്കാറുള്ളത്.

∙ യുട്യൂബ് ചാനൽ എന്ന ആശയം ആരുടെയാണ്? ഏതായിരുന്നു ആദ്യ വിഭവം? കാഴ്ചക്കാരുടെ പ്രതികരണം? 

ആദ്യമായി ചെയ്യുമ്പോൾ മധുരമുള്ള ഭക്ഷണം ഉണ്ടാക്കണമെന്ന് പലരും പറഞ്ഞിരുന്നെങ്കിലും എനിക്ക് ഏറ്റവും ആത്മവിശ്വാസത്തോടെ സാധിക്കുന്ന തൃശൂർ മീൻകറിയാണ് ഉണ്ടാക്കിയത്. ചാനൽ തുടങ്ങിയപ്പോൾ കുറച്ചു കാഴ്ചക്കാർ മാത്രമേ ഉണ്ടായിരുന്നുള്ളൂ. പിന്നീട് കാഴ്ചക്കാരുടെ എണ്ണം കൂടിവന്നപ്പോൾ പല പ്രതികരണങ്ങളുമുണ്ടായി. ലൈറ്റിങ് ശരിയല്ല, പാത്രങ്ങൾ പോരാ അങ്ങനെയുള്ള പ്രതികരണങ്ങളായിരുന്നു ആദ്യം വന്നത്.

∙ പല വെല്ലുവിളികളും ചാനൽ ആരംഭിക്കുന്നതിനു മുന്നോടിയായി നേരിട്ടിട്ടുണ്ടാവില്ലേ, അതെല്ലാം എങ്ങനെ മറികടന്നു? 

എല്ലാ കാര്യങ്ങളും സ്വന്തമായി ചെയ്യണം എന്നുള്ളതായിരുന്നു നേരിട്ട പ്രധാന വെല്ലുവിളി. ഷൂട്ടിങ്ങും എഡിറ്റിങ്ങും പാചകവും എല്ലാം സ്വന്തമായിട്ടാണ് ചെയ്യുന്നത്. ആദ്യമൊക്കെ എഡിറ്റ് ചെയ്യാൻ അറിയില്ലായിരുന്നു. അതിന്റേതായ തെറ്റുകൾ വന്നിട്ടുണ്ട്. 50 വി‍ഡിയോ ചെയ്തു കഴിഞ്ഞപ്പോഴാണ് ഓരോ കാര്യങ്ങളും കൃത്യമായി പഠിച്ചു തുടങ്ങിയത്.

∙ വീണയുടെ തൃശൂർ ഭാഷ പല മലയാളികൾക്കും ‘ഇത് ഞങ്ങളുടെ വീട്ടിലെ കുട്ടിയാണല്ലോ’ എന്ന തോന്നലുണ്ടാക്കാൻ സഹായിച്ചിട്ടുണ്ടാകും? 

പാചക വി‍ഡിയോ ചെയ്യുന്നതിനൊപ്പം പിന്നാമ്പുറ കാഴ്ചകള്‍ എന്ന് പറഞ്ഞു കുട്ടികളുടെ കാര്യങ്ങളൊക്കെ കാണിക്കുമായിരുന്നു. എനിക്ക് സംസാരിക്കാൻ ഇഷ്ടമാണ്. അതുകൊണ്ട് വിഡിയോയ്ക്കിടയിൽ എന്റെ ഓർമകളും കഥകളും പറയും. അത് ഇഷ്ടമില്ലാത്ത ആളുകൾ പരാതി പറഞ്ഞു തുടങ്ങിയപ്പോൾ പതിയെ നിർത്താൻ തീരുമാനിച്ചു. അപ്പോൾ ഒരുപാട് മെയിലുകളും മെസേജുകളും വരാൻ തുടങ്ങി. ഞാൻ പറയുന്നത് ഇഷ്ടപ്പെട്ടിരുന്ന ഒരുപാട് പേരുണ്ടായിരുന്നു. ‘വീണ ഞങ്ങളുടെ വീട്ടിലെ മകളാണ്, അമ്മയാണ്’ എന്നൊക്കെ പറയും. അതിൽ ഒരു കുട്ടി ആറു പേജുള്ള കത്ത് അയച്ചിരുന്നു. അതാണ് ജീവിതത്തിലെ ആദ്യത്തെ അഭിനന്ദനം.

പിന്നീടും കത്തുകൾ വരാൻ തുടങ്ങി. പതിയെപ്പതിയെ ആളുകൾ നേരിട്ട് കാണുമ്പോൾ തിരിച്ചറിഞ്ഞു. വന്ന് കയ്യിൽ പിടിച്ചു സംസാരിക്കുമ്പോഴൊക്കെ സന്തോഷമാണ്. ഇപ്പോൾ വരുന്ന അഭിനന്ദനങ്ങളിൽ കൂടുതൽ സന്തോഷം തരുന്നതു ചില മാതാപിതാക്കളുടെ വാക്കുകളാണ്. അവരുടെ മക്കൾ മറ്റു സ്ഥലങ്ങളിൽ പോയി നിൽക്കുമ്പോൾ എന്റെ വിഡിയോ കണ്ടാണ് പാചകം ചെയ്യാറുള്ളത് എന്ന് പറയും. അത് സന്തോഷം തരുന്ന വാക്കുകളാണ്. ചില കുട്ടികൾ ഫോട്ടോ അയച്ചു തരും, സംശയം ചോദിക്കും, അതൊക്കെ കാണുന്നത് എത്ര സന്തോഷമാണെന്നോ. ഒരുപാട് പേർ മെസേജ് അയയ്ക്കും, മെയിൽ അയയ്ക്കും. നേരിട്ട് കാണുമ്പോൾ ഓടി വന്ന് സംസാരിക്കുന്നവരും ഏറെ. അത് ഞാൻ എന്നും മനസ്സിൽ കൊണ്ടുനടക്കാറുണ്ട്. അവാർഡുകളേക്കാൾ സന്തോഷമാണ് ഇവരുടെ ഓരോ വാക്കുകളും.

∙ ഇതുവരെ പാചകം ചെയ്തതിൽ ഏറ്റവും രുചികരമായി തോന്നിയത് ഏതാണ്? 

ഏറ്റവും രുചികരമായ വിഭവം ഏതാണെന്നു പറയാൻ ബുദ്ധിമുട്ടാണ്. 2015 മുതൽ 2025 വരെയുള്ള പത്തു വർഷത്തിൽ‍ ഏതു വിഭവം ഉണ്ടാക്കിയാലും ഏറെ സന്തോഷത്തോടെയും സ്നേഹത്തോടെയുമാണ് ചെയ്തിരിക്കുന്നത്. ആദ്യം ഉണ്ടാക്കിയ മീൻകറി മുതൽ ഇത്തവണ വിഷു സ്പെഷലായി ഉണ്ടാക്കിയ 15 വിഭവങ്ങൾ അടങ്ങിയ സദ്യ വരെ ഒരുപോലെ പ്രിയപ്പെട്ടതാണ്. എല്ലാ വിഭവങ്ങളും എന്റെ മനസ്സിനോട് ചേർന്ന റെസിപ്പികളാണ്. എല്ലാം പ്രിയപ്പെട്ടതും രുചികരവുമാണ്.

∙ പാളിപ്പോയ പാചകപരീക്ഷണ ഓർമയുണ്ടോ? 

ഒരുപാട് പരീക്ഷണങ്ങൾ പാളിപ്പോയിട്ടുണ്ട്. കലത്തപ്പം ഉണ്ടാക്കിയപ്പോൾ 63 തവണ ചെയ്തിട്ടും ശരിയായില്ല. അറുപത്തിനാലാമത്തെ തവണ വിജയിച്ചെങ്കിലും അറുപത്തിഅഞ്ചാമത്തെ തവണ മാത്രമാണ് വിഡിയോയായി ചെയ്തത്. കലത്തപ്പം മലബാർ വിഭവമാണ്. അതുകൊണ്ട് ചേരുവകളൊന്നും കൃത്യമായി അറിയില്ലായിരുന്നു. പലതവണ പലരോടായി ചോദിച്ച് പഠിച്ച ശേഷമാണു വിഡിയോ ചെയ്തത്.

∙ കണ്ടന്റ് ക്രിയേറ്റർ എന്ന നിലയിൽനിന്ന് യുട്യൂബ് വരുമാനവും മറ്റുമായി സംരംഭകയായി മാറിയല്ലോ. കേരളത്തിലെ വീട്ടമ്മമാർക്ക് ഉപദേശമോ നിർദേശമോ നൽകാനുണ്ടോ? 

കോവിഡ്‌ കാലത്തിനു മുൻപ് കണ്ടന്റ് ക്രിയേറ്റർ എന്ന നിലയ്ക്കു നമുക്കു ക‍ൃത്യമായ ഉപദേശം നൽകാൻ സാധിക്കുമായിരുന്നു. ഇന്ന് യുട്യൂബ് അടക്കം അൽഗോരിതം ഓരോ മാസവും മാറിക്കൊണ്ടിരിക്കുകയാണ്. ഭാഗ്യമാണ് പ്രധാനം. ചിലപ്പോൾ നല്ല കണ്ടന്റുകൾ ശ്ര‍‍ദ്ധിക്കപ്പെടാതെ പോകും. ചിലപ്പോൾ ഒട്ടും ക്ലാരിറ്റി ഇല്ലാത്ത വിഡിയോകൾ ഹിറ്റുമാകും.

∙ പാചക പരീക്ഷണങ്ങൾ ആരിലാണ് വീണ ‘പരീക്ഷിക്കാറുള്ളത്’? ആരാണ് വിഭവങ്ങൾ രുചി നോക്കി കൃത്യമായ അഭിപ്രായം പറയുക? ആരാണ് പ്രചോദനം? 

പാചക പരീക്ഷണങ്ങൾ എല്ലാം എന്റെ വീട്ടുകാരിൽ തന്നെയാണ് ആദ്യം പരീക്ഷിക്കുന്നത്. ഞാൻ നോൺ വെജ് ഭക്ഷണം കഴിക്കില്ല. അതുകൊണ്ടുതന്നെ അത്തരം വിഭവങ്ങളുടെ കാര്യത്തിലാണ് ചില സംശയമുള്ളത്. എല്ലാം കൃത്യമാണെങ്കിലും അവസാന പാചകത്തിനു ശേഷം രുചിച്ചു നോക്കുന്നത് ഭർത്താവ് ജാൻ ആണ്. ഏതു ഭക്ഷണത്തിനും കൃത്യമായ അഭിപ്രായം പറയും. നല്ലതല്ല എന്നുണ്ടെങ്കിൽ അതും പറയും. പ്രചോദനം ഞാൻ തന്നെയാണ്. എന്റെ ഏറ്റവും വലിയ വിമർശകയും പ്രചോദനവും ഞാനാണ്.