അന്ന് പർവത മുകളിൽ, ഇന്ന് കടലിന് നടുവിൽ! വിവേകാനന്ദപ്പാറയിലെ ‘മോദിധ്യാന’ത്തിനു പിന്നിലെ രഹസ്യമെന്ത്?

∙ ബംഗാളിലും മോദിയുടെ ക്ഷേത്ര ദർശനം

അവസാന ഘട്ട വോട്ടെടുപ്പു നടക്കുന്നതിനു തൊട്ടുമുൻപായിരുന്നു പ്രധാനമന്ത്രിയുടെ ബംഗാൾ സന്ദർശനം. 400 സീറ്റുകൾ എന്ന നേട്ടത്തിലേക്ക് എത്താൻ പശ്ചിമ ബംഗാളിലെ 42ൽ 30സീറ്റുകൾ നേടാനാകുമെന്ന പ്രതീക്ഷയിലാണ് കൊൽക്കത്തയിലും സൗത്ത് 24 പർഗാനാസിലും ബിജെപി വൻ പ്രചാരണം നടത്തിയത്. ഇതെല്ലാം മുന്നിൽക്കണ്ട് പ്രചാരണ സമയത്ത്, വിവേകാനന്ദൻ സ്ഥാപിച്ച രാമകൃഷ്ണ പ്രസ്ഥാനത്തിന്റെ ഭാഗമായിരുന്ന ശാരദാ ദേവിയുടെ സ്മരണയ്ക്കായി നിർമിച്ച ശ്രീ ശ്രീ ശാരദാ മേയർ ബാരി എന്ന ക്ഷേത്രത്തിലും എത്തി മോദി പ്രാർഥന നടത്തി. 1893ൽ ഷിക്കാഗോയിൽ നടന്ന മത പാർലമെന്റിൽ പങ്കെടുക്കുന്നതിന് മുൻപ് വിവേകാനന്ദൻ ശാരദാദേവിയുടെ അനുഗ്രഹം തേടിയതായാണ് പറയപ്പെടുന്നത്. ഇതോടൊപ്പം തന്നെ കൊൽക്കത്തയിൽ മോദിയുടെ റോഡ്‌ഷോ വിവേകാനന്ദന്റെ തറവാട്ടിലാണ് അവസാനിപ്പിച്ചത് എന്നതും ശ്രദ്ധേയമാണ്.

∙ വോട്ടർമാരുടെ ‘മുന്നിൽ’ ധ്യാനമിരിക്കുന്ന മോദി

ഭക്തനും ചിന്താശീലനും സാംസ്കാരികമായി ആഴത്തിൽ വേരൂന്നിയ നേതാവെന്ന നിലയിലുമുള്ള മോദിയുടെ വ്യക്തിപരമായ പ്രതിച്ഛായ ഉറപ്പിക്കുന്നതിനായി ഇത്തരം സന്ദർശനങ്ങൾ പ്രയോജനപ്പെടുമെന്ന് നിരീക്ഷകർ വിലയിരുത്തുന്നു. പരമ്പരാഗത ഹിന്ദു ആചാരങ്ങളെയും വസ്തുതകളെയും ഏറെ വിലമതിക്കുന്ന ബിജെപിയുടെ പ്രധാന അനുഭാവികളുടെ മനസ്സിൽ ആഴത്തിൽ പതിയാൻ പോന്നതാണ് ഈ ധ്യാന ചിത്രം. കേദാർനാഥിലെ പോലെ കന്യാകുമാരിയിലും ധ്യാനിക്കുന്നതിലൂടെ, യാഥാസ്ഥിതികരും മതത്തെ മുറുകെപിടിച്ചു ജീവിക്കുന്നവരുമായ വോട്ടർമാർക്കിടയിൽ തന്റെ സ്ഥാനം ശക്തിപ്പെടുത്താനാണ് മോദിയുടെ ശ്രമം. ഇന്ത്യയുടെ ആത്മീയ പൈതൃകത്തിന്റെ വക്താവായി അദ്ദേഹത്തെ അടയാളപ്പെടുത്തുകയെന്ന ലക്ഷ്യവും ഈ നീക്കത്തിനുണ്ട്.

∙ ഇതിലും വലിയ ‘പ്രചാരണം’ ഇനിയില്ല

ദിവസങ്ങളോളം ഓടിനടന്ന് മോദി നടത്തിയ പ്രചാരണത്തേക്കാളും വലിയ സ്വാധീനമാണ് ഇത്തരമൊരു ധ്യാനത്തിലൂടെ ബിജെപിക്ക് ഉത്തരേന്ത്യയിൽ ലഭിക്കാൻ പോകുന്നത്. തന്ത്രപരമായ ആശയവിനിമയത്തിലെ ഒരു ‘മാസ്റ്റർക്ലാസ്’ കൂടിയാണ് മോദിയുടെ ഇത്തരം ധ്യാനങ്ങൾ. ദൂരെയുള്ള, ഒറ്റപ്പെട്ട, ശാന്തമായ ഒരിടത്ത് ഭക്തിയോടെ ധ്യാനത്തിലിരിക്കുന്ന ഒരു നേതാവിന്റെ ചിത്രം ശക്തവും ഉദ്വേഗജനകവുമാണ്. ഇത് രാഷ്ട്രീയത്തിൽ ഏറെ സ്വാധീനം ചെലുത്തും, ഫലം ചെയ്യും. കേദാർനാഥും കന്യാകുമാരിയും ഇന്ത്യയുടെ സാംസ്കാരികവും ആത്മീയവുമായ പൈതൃകത്തിന്റെ പ്രതീകങ്ങളാണ്. ഈ സ്ഥലങ്ങളിൽ ധ്യാനിക്കുന്നതിലൂടെ, സാംസ്കാരികത സംബന്ധിച്ച ബിജെപിയുടെ ദേശീയ അജൻഡയെ ശക്തിപ്പെടുത്തുക കൂടിയാണ് മോദി ചെയ്യുന്നതെന്ന നിരീക്ഷണവും ഉയർന്നിട്ടുണ്ട്.

∙ വോട്ടർമാർക്കിടയിലെ സ്വാധീനം

ഈ ആത്മീയ കേന്ദ്രങ്ങളിലേക്കുള്ള മോദിയുടെ യാത്ര വോട്ടർമാർക്കിടയിൽ കാര്യമായ സ്വാധീനം ചെലുത്താൻ സാധ്യതയുണ്ടെന്ന് പ്രതിപക്ഷത്തിനും വ്യക്തം. രാഷ്ട്രീയപരമായി മാത്രമല്ല ആത്മീയമായി നിലകൊള്ളുന്ന നേതാവുമായും ജനം മോദിയെ ചിത്രീകരിക്കും. ഇന്ത്യയുടെ ആത്മീയ പൈതൃകത്തിൽനിന്ന് പ്രചോദനം ഉൾക്കൊണ്ട ശക്തനായ ഒരു നേതാവിന്റെ ഈ ഇരട്ട പ്രതിച്ഛായയ്ക്ക് വോട്ടർമാർക്കിടയിൽ വലിയ പിന്തുണ ലഭിച്ചേക്കും. മോദിയുടെ കേദാർനാഥ്, കന്യാകുമാരി യാത്രകളെല്ലാം ബിജെപിയുടെ പ്രത്യയശാസ്ത്ര ചട്ടക്കൂടിലും ഏറെ സ്വാധീനം ചെലുത്തുന്നുണ്ട്. ദേശീയതയോടും ആത്മീയ മൂല്യങ്ങളോടുമുള്ള പാർട്ടിയുടെ പ്രതിബദ്ധതയെ ഇത് ശക്തിപ്പെടുത്തുന്നതായാണ് വിലയിരുത്തൽ.

∙ വിവേകാനന്ദന്റെ തത്വശാസ്ത്രങ്ങൾക്ക് പിന്നാലെ മോദി

കഴിഞ്ഞ പത്ത് വർഷത്തിനിടെ പ്രധാനമന്ത്രി മോദി സ്വാമി വിവേകാനന്ദന്റെ തത്വശാസ്ത്രത്തെക്കുറിച്ച് പലതവണ പരാമർശിച്ചിട്ടുണ്ട്. ‘ഏക് ഭാരത്, ശ്രേഷ്ഠ ഭാരത്’ പോലുള്ള നിരവധി സർക്കാർ പ്രചാരണങ്ങളിലും പരിപാടികളിലും ആത്മീയ–ദേശീയതയെക്കുറിച്ചുള്ള വിവേകാനന്ദന്റെ ആശയങ്ങളിൽ നിന്നുള്ള ഭാഗങ്ങൾ ഉൾപ്പെടുത്തിയിട്ടുണ്ടെന്നാണ് അണികൾ തന്നെ പറയുന്നത്. അതേസമയം, രാഷ്ട്രീയ ആശയവിനിമയത്തിനുള്ള ഉപകരണമായി മോദി ആത്മീയതയെ ഉപയോഗിക്കുന്നുവെന്നാണ് പ്രതിപക്ഷ പാർട്ടികൾ ആവർത്തിച്ച് ആരോപിക്കുന്നത്. രാഷ്ട്രീയവും മതവും അത്രത്തോളം കെട്ടുപിണഞ്ഞുകിടക്കുന്ന ഒരു രാജ്യത്ത് ഇത്തരം ആത്മീയ പ്രവൃത്തികൾക്ക് വലിയ സ്വാധീനം ചെലുത്താൻ സാധിക്കുമെന്ന യാഥാര്‍ഥ്യവും പ്രതിപക്ഷത്തിനു മുന്നിലുണ്ട്. 

വോട്ടർമാരെ ആകർഷിക്കുന്നതിനും ദക്ഷിണേന്ത്യയിൽ കാലുറപ്പിക്കുന്നതിനുമായി ബിജെപി സജീവമായി പ്രചാരണം നടത്തിയിരുന്നതിനാൽ പ്രധാനമന്ത്രി മോദിയുടെ കന്യാകുമാരി സന്ദർശനം പ്രതീകാത്മകമാണെന്നും പറയാം. തിരഞ്ഞെടുപ്പ് പ്രചാരണ പ്രസംഗങ്ങളിലും പ്രധാനമന്ത്രി തമിഴ് സംസ്‌കാരത്തെ ഏറെ പുകഴ്ത്തിയിരുന്നു. ഇപ്പോൾ തമിഴ്നാട്ടിലെ ക്ഷേത്രങ്ങളിൽ സന്ദർശനം നടത്താനും ധ്യാനമിരിക്കാനും മോദി സമയം കണ്ടെത്തിയിരിക്കുന്നു. ഇതോടൊപ്പം തന്നെ തമിഴ് കവി തിരുവള്ളുവരിന്റെ പ്രതിമയ്ക്ക് മുന്നിൽ പുഷ്പാർച്ചനയും നടത്തി. ദക്ഷിണേന്ത്യ നേരത്തേത്തന്നെ വോട്ടിട്ടു കഴിഞ്ഞതിനാൽ ‘ധ്യാന’ത്തിനപ്പുറം മോദിയുടെ മനസ്സിലെന്താണെന്ന ചോദ്യത്തിന് ഉത്തരം ലഭിക്കാന്‍ ജൂൺ നാലിനു ഫലമെത്തുന്നതു വരെ കാത്തിരിക്കേണ്ടി വരും.