‘ടീച്ചറുടെ’ വോട്ടുകൾ ബിജെപി കൊണ്ടുപോയോ? വടകരയിൽ സിപിഎം വിയർക്കും ചില ഉത്തരങ്ങൾ തേടി

ഷാഫിയുടെ തിരഞ്ഞെടുപ്പു ജാഥകൾ ആൾക്കടലായപ്പോൾ പരിമിതമായ ആൾക്കൂട്ടംകൊണ്ട് പലപ്പോഴും ടീച്ചറിന് തൃപ്തിപ്പെടേണ്ടി വന്നു. വനിതാ വോട്ടർമാർ കൂടുതലുള്ള മണ്ഡലത്തിൽ കെ.കെ. ശൈലജയുടെ ജനകീയത വോട്ടായി മാറുമെന്നായിരുന്നു സിപിഎം കണക്കുകൂട്ടൽ. നിപ്പയും കോവിഡും പടർന്നു പിടിച്ച കാലത്തെ കെ.കെ.ശൈലജയുടെ പ്രവർത്തനങ്ങളെ മറക്കാൻ കോഴിക്കോടിനും വടകരയ്ക്കും കഴിയുമായിരുന്നുമില്ല. ‘വടേരേന്റെ സ്വന്തം ഷാഫി’ എന്ന ടാഗ് ലൈനോടെ ഷാഫി മത്സരിക്കാനിറങ്ങിയപ്പോൾ, ‘ലോകം ആദരിച്ച ടീച്ചറമ്മ, നാട്യങ്ങളില്ലാതെ വടകരയിൽ’ എന്ന ടാഗ്‌ലൈനുമായി സിപിഎം രംഗത്തുവന്നതിനു പിന്നിലെ ലക്ഷ്യവും മറ്റൊന്നായിരുന്നില്ല. കോവിഡ്–നിപ്പ ‘പ്രതിരോധ’ത്തിനു ബദലായി കോവി‍‍ഡ് കാലത്തെ അഴിമതിയാരോപണങ്ങൾ യുഡിഎഫ് സജീവമായി നിർത്തുകയും ചെയ്തു.

∙ ആ പുതുവോട്ടുകൾ എങ്ങോട്ട്?

വടകര ലോക്സഭാ മണ്ഡലത്തിൽ ഇത്തവണ 1,35,633 കന്നിവോട്ടർമാരാണ് ഉണ്ടായിരുന്നത്. ഒരു ലക്ഷം കടന്ന ഭൂരിപക്ഷം ഷാഫി പറമ്പിലിനു നൽകിയതിൽ ഈ വോട്ടുകളും പ്രധാന പങ്ക് വഹിച്ചിട്ടുണ്ടാകണമെന്നാണ് പാർട്ടി കണക്കുകൂട്ടൽ. യുവജനങ്ങൾക്കിടയിലെ സ്വീകാര്യത, അടുത്തിടെ യുഡിഎഫ് നേതൃത്വത്തിൽ നടന്ന സമരമുഖങ്ങളിലെ സജീവ സാന്നിധ്യം തുടങ്ങിയ ഘടകങ്ങളൊക്കെ ഷാഫി പറമ്പിലിനെ യുവജനങ്ങളുമായി വേഗത്തിൽ ‘കണക്ട്’ ചെയ്യിച്ചിട്ടുണ്ട്. കെ.കെ.ശൈലജയുടെ ജനകീയതയെ മറികടക്കാൻ ഷാഫിയുടെ ‘വൈബിന്’ കഴിഞ്ഞുവെന്നു വേണം കരുതാൻ. പുതുവോട്ടർമാരെ സ്വാധീനിക്കുക പ്രസംഗങ്ങളും പ്രചാരണയോഗങ്ങളുമല്ല, മറിച്ച് സമൂഹമാധ്യമത്തിലെ ഇടപെടലുകളാണെന്നും വടകരയിൽ ആദ്യഘട്ടത്തിൽതന്നെ യുഡിഎഫ് തിരിച്ചറിഞ്ഞിരുന്നു. ആൾക്കൂട്ടത്തിനിടയിൽ നിറഞ്ഞു നിൽക്കുന്ന ‘റീലു’കൾ ഫലം കണ്ടുവെന്ന് വടകര പറയും.

∙ ബോംബ് മുതൽ വിവാദ ചിത്രം വരെ

തിരഞ്ഞെടുപ്പ് പ്രഖ്യാപിച്ചപ്പോൾ മുതൽ രാഷ്ട്രീയ വിവാദങ്ങളുടെ കുത്തൊഴുക്കായിരുന്നു വടകരയിൽ. പാനൂരിൽ ബോംബ് നിർമാണത്തിനിടെയുണ്ടായ സ്ഫോടനത്തിൽ ഒരാൾ കൊല്ലപ്പെടുകയും മറ്റു മൂന്നുപേർക്ക് ഗുരുതരമായി പരുക്കേൽക്കുകയും ചെയ്ത സംഭവത്തിൽ സിപിഎം പ്രതിസ്ഥാനത്തു വന്നത് പാർട്ടിക്ക് തിരിച്ചടിയാവുകയും ചെയ്തു. എത്ര തള്ളിപ്പറഞ്ഞിട്ടും പ്രതികളുടെ പാർട്ടി ബന്ധം വെളിപ്പെട്ടു. യുഡിഎഫ് പാനൂരിൽ സമാധാനറാലി നടത്തിയാണ് വിഷയം പ്രചാരണ ആയുധമാക്കിയത്. അക്രമരാഷ്ട്രീയത്തിനെതിരെ വിധിയെഴുതാൻ ആദ്യം മുതലേ ആവശ്യപ്പെട്ടിരുന്ന യുഡിഎഫിന് കൃത്യസമയത്ത് വീണുകിട്ടിയ അവസരം കൂടിയായിരുന്നു പാനൂരിലെ ബോംബ് സ്ഫോടനം.

കെ.കെ.ശൈലജയുടെ വ്യാജ വിഡിയോ പ്രചരിപ്പിക്കുന്നു എന്ന വിവാദമായിരുന്നു മറ്റൊന്ന്. പറയാത്ത പ്രസ്താവനകൾ പ്രചരിപ്പിക്കുന്നു എന്നായിരുന്നു ശൈലജ പറഞ്ഞതെങ്കിലും അശ്ലീല ചിത്രങ്ങൾ പ്രചരിപ്പിക്കുന്നു എന്നതിലേക്ക് വിവാദം മാറി. കേരളം കണ്ട ഏറ്റവും മോശം പ്രതികരണങ്ങളാണ് സൈബർ ലോകത്ത് പിന്നീടുണ്ടായത്. യുഡിഎഫ് എതിർ സ്ഥാനാർഥിയുടെ അശ്ലീല ചിത്രങ്ങൾ പ്രചരിപ്പിക്കുന്നു എന്നും വടകരയിലെ സ്ത്രീകൾ മറുപടി പറയും എന്ന നിലയിലുമെല്ലാമുള്ള അവകാശവാദങ്ങളെത്തി. പക്ഷേ, അശ്ലീല ചിത്രങ്ങൾ എന്നു താന്‍ പറഞ്ഞിട്ടില്ലെന്ന് പിന്നീട് ശൈലജയ്ക്കു തന്നെ തിരുത്തിപ്പറയേണ്ടി വന്നു. സമൂഹമാധ്യമങ്ങളിലെ ചർച്ചയ്ക്കപ്പുറം വടകരയിൽ അതൊരു ആയുധമാക്കാൻ എൽഡിഎഫിന് കഴിഞ്ഞതുമില്ല.

‘കാഫിറായ ശൈലജയ്ക്ക് വോട്ടു ചെയ്യരുത്’ എന്ന മെസേജ് പ്രചരിപ്പിക്കുന്നു എന്നതായിരുന്നു വോട്ടെടുപ്പിന് ഒരു ദിവസം മുൻപ് വടകരയിലെ എൽഡിഎഫിന്റെ പ്രചാരണായുധം. അത് വ്യാജ സ്ക്രീൻഷോട്ട് ആണെന്ന് യുഡിഎഫും. മെസേജ് പ്രചരിപ്പിച്ചയാളെ കണ്ടെത്തിയാൽ 10 ലക്ഷം നൽകാമെന്ന് മുസ്‌ലിം ലീഗ് പ്രഖ്യാപിക്കുകയും ചെയ്തു. ആ അന്വേഷണവും തേഞ്ഞുമാഞ്ഞുപോകുന്ന കാഴ്ചയാണ് പിന്നീട് കണ്ടത്.

38 ശതമാനം മുസ്‌ലിം ജനസംഖ്യയുള്ള വടകരയിൽ ഷാഫി ജയിച്ചാൽ അത് വർഗീയ വോട്ടുകൾ നേടിയാവുമെന്നായിരുന്നു തുടക്കം മുതൽ സിപിഎം ഒളിഞ്ഞും തെളിഞ്ഞും നടത്തിയിരുന്ന ആരോപണം. അങ്ങനെയാണെങ്കിൽ മുസ്‌ലിം ഭൂരിപക്ഷമുള്ള കുറ്റ്യാടിയിലെയും നാദാപുരത്തെയും നിയമസഭാ തിരഞ്ഞെടുപ്പു ഫലം കൂടി പരിശോധിക്കണമെന്നും യുഡിഎഫ് തിരിച്ചടിച്ചു. 2021 നിയമസഭാ തിരഞ്ഞെടുപ്പിൽ രണ്ടിടത്തും ജയിച്ചത് സിപിഎമ്മായിരുന്നു. പാർട്ടിക്ക് വോട്ടു ചെയ്തവരെ അപമാനിക്കരുതെന്ന തരത്തിലുള്ള പ്രചാരണവും ഇതോടൊപ്പം യുഡിഎഫ് ഉയർത്തി.

∙ കണക്കുകൾ പറയുന്നത്

1200 വോട്ടിന് കെ.കെ.ശൈലജ ജയിക്കുമെന്നു സിപിഎം പറഞ്ഞ മണ്ഡലത്തിൽ ഒന്നേകാൽ ലക്ഷം വോട്ട് നേടിയുള്ള ഷാഫിയുടെ വിജയത്തിൽ ടിപിയും ‘പിണറായി ഫാക്ടറും’ വരെ കാരണമായിട്ടുണ്ടെന്നത് വ്യക്തം. അപ്പോഴും പക്ഷേ ഒരു ചോദ്യം ബാക്കി. എവിടെനിന്നാണ് ഇത്രയും വലിയ വോട്ടു ചോർച്ചയുണ്ടായത്? നിയമസഭാ മണ്ഡലം തിരിച്ചുള്ള കണക്കുകൾ വരുന്നതോടെ അക്കാര്യത്തിൽ കൂടുതൽ വ്യക്തതയുണ്ടാകും. എങ്കിലും ചില സൂചനകള്‍ ഇങ്ങനെയാണ്:

2016 നിയമസഭാ തിരഞ്ഞെടുപ്പിൽ, വടകര ലോക്സഭാ മണ്ഡലത്തിലെ കുറ്റ്യാടി ഒഴികെയുള്ള മണ്ഡലങ്ങൾ എൽഡിഎഫിന്റെ കയ്യിലായിരുന്നു. 2019ലെ ലോക്സഭാ തിരഞ്ഞെടുപ്പിൽ തലശ്ശേരി ഒഴികെയുള്ള എല്ലാ മണ്ഡലങ്ങളിലും വ്യക്തമായ ലീഡ് നിലനിർത്തിയതാകട്ടെ യുഡിഎഫും. കൂത്തുപറമ്പിൽ മാത്രമാണ് അന്ന് യുഡിഎഫ് സ്ഥാനാർഥി മുരളീധരന്റെ ലീഡ് 4133ലേക്കു താഴ്ന്നത്. 2021ലെ നിയമസഭാ തിരഞ്ഞെടുപ്പിൽ വടകര ഒഴികെയുള്ള ആറിടങ്ങളിലും എൽഡിഎഫ് വിജയിച്ചു. കെ.കെ.രമയുടെ വിജയം വടകരയുടെ രാഷ്ട്രീയ ചരിത്രത്തിലെ നിർണായക ഏടുമായി.

ലോക്സഭയിൽ തുടർച്ചയായ പരാജയം നേരിടുമ്പോഴും വടകരയിൽ എൽഡിഎഫിന്റെ വോട്ടുവിഹിതം കാര്യമായ ചാഞ്ചാട്ടങ്ങളില്ലാതെ നിന്നിരുന്നു. 2009ൽ 42.31 ശതമാനമായിരുന്നു എൽഡിഎഫ് വോട്ടു ശതമാനം. 2014ൽ എ.എൻ. ഷംസീർ മത്സരിച്ചപ്പോൾ അത് 43.03 ശതമാനത്തിലെത്തി. എന്നാൽ 2019ൽ ജയരാജൻ മത്സരിക്കാനെത്തിയപ്പോൾ വോട്ടു വിഹിതം 41.47 ശതമാനത്തിലേക്കു താഴുകയായിരുന്നു. ഇത്തവണ ശൈലജ ടീച്ചറുടെ വോട്ടു ശതമാനം പിന്നെയും താഴ്ന്ന് 39.45 ശതമാനത്തിലെത്തി. 

2004 മുതൽ ഇതുവരെയുള്ള കണക്കെടുത്താൽ വടകരയിൽ യുഡിഎഫിനു ലഭിച്ച ഏറ്റവും ഉയർന്ന വോട്ടുശതമാനമാണ് ഇത്തവണ ഷാഫി സ്വന്തമാക്കിയത്– 49.65%. 2004ൽ 36.05, 2009ൽ 48.82, 2014ൽ 43.37, മുരളീധരൻ മത്സരിച്ച 2019ൽ 49.42 എന്നിങ്ങനെയായിരുന്നു വോട്ടുശതമാനം. യുഡിഎഫിന് 2019നേക്കാൾ 0.23% വോട്ടാണു വർധിച്ചിരിക്കുന്നത്. അതേസമയം, എൽഡിഎഫിനു കുറഞ്ഞത് 2.02 ശതമാനം വോട്ടും. 

ഈ 2.02% വോട്ടാണ് ഇനി എൽഡിഎഫിനു തലവേദനയാകാൻ പോകുന്നത്. ഈ വോട്ട് എവിടേക്കു പോയി? അവിടെയാണ് ബിജെപിയുടെ വോട്ടുകണക്ക് തലയ്ക്കു മുകളിലെ വാളായി മാറിയതും. 2019ൽ 7.52 ശതമാനമായിരുന്നു ബിജെപിയുടെ വോട്ടുശതമാനം. എന്നാല്‍ ഇത്തവണ അത് 9.97 ശതമാനമായി മാറി. 2.45 ശതമാനത്തിന്റെ വളർച്ച. സിപിഎമ്മിനു നഷ്ടമായ രണ്ടു ശതമാനം വോട്ടാണോ ബിജെപിയിലേക്കു മറിഞ്ഞത്? വരുംനാളുകളിൽ ആ അന്വേഷണവും പാർട്ടിക്ക് നടത്തിയേ മതിയാകൂ.