ആരിഫ് ഖാനെ ബിഹാറിലേക്കു മാറ്റിയതിനു പിന്നിലെന്ത്? ബിജെപി ഒഴിച്ചിട്ട ആ സീറ്റ് ആർക്ക്? ഇന്ത്യാ സഖ്യത്തിലും വിള്ളൽ വീഴുമോ?

പിണറായി സർക്കാരിനെ പ്രതിപക്ഷത്തെ പോലെ കടന്നാക്രമിച്ചിരുന്ന കേരള മുൻ ഗവർണർ ആരിഫ് മുഹമ്മദ് ഖാനെ, എൻഡിഎ സർക്കാരിന്റെ നെടുന്തൂണായ നിതീഷ് കുമാറിന്റെ ബിഹാറിലേക്ക് മാറ്റിയത് എന്തിനാവും? ‘2025’ എന്നതാണ് ഇതിനുള്ള ഒറ്റവാക്കിലെ ഉത്തരം. ഈ വർഷം രാജ്യത്ത് തിരഞ്ഞെടുപ്പ് നടക്കുന്ന രണ്ട് സംസ്ഥാനങ്ങളിൽ ഒരെണ്ണം ബിഹാറാണ്. മറ്റൊന്ന് രാജ്യ തലസ്ഥാനവും. ഈ രണ്ട് തിരഞ്ഞെടുപ്പും ബിജെപിയെ സംബന്ധിച്ചിടത്തോളം അതിനിർണായകമാണ്. ഡൽഹിയിൽ തുടർഭരണം ലഭിച്ചാൽ, നിലവിൽ മുഖ്യമന്ത്രിപദം ഒഴിഞ്ഞിരിക്കുന്ന അരവിന്ദ് കേജ്‌രിവാളിന്റെ തിരിച്ചുവരവിനുള്ള വൻ അവസരമായിരിക്കും. എന്തു വിലകൊടുത്തും അതിനെ പ്രതിരോധിക്കുകയെന്നതാണ് ബിജെപി ലക്ഷ്യം. ബിഹാറിലാകട്ടെ എപ്പോൾ വേണമെങ്കിലും മറുകണ്ടം ചാടാവുന്ന നിതീഷിന് മേൽ ബിജെപിക്ക് ഒരു കണ്ണുവേണ്ടത് അത്യാവശ്യവും.

തലസ്ഥാനം പിടിക്കാൻ പുറപ്പെടുമ്പോൾ സ്വന്തം തലയിലും മാറ്റം വരികയാണെന്ന സത്യവും ബിജെപിക്കു മുന്നിലുണ്ട്. ജനുവരിയില്‍ ബിജെപിക്ക് പുതിയ ദേശീയ അധ്യക്ഷൻ വരും എന്നതാണ് അതിൽ പ്രധാനം. ആരാവും ജെ.പി.നഡ്ഡയ്ക്കു പകരം ബിജെപിയെ നയിക്കുക? ആരായാലും, ശതാബ്ദി ആഘോഷത്തിലേക്കു കടക്കുന്ന ആർഎസ്എസിനെ മനസ്സിൽ കണ്ടുമാത്രമേ ഈ തീരുമാനമെടുക്കാൻ ബിജെപിക്ക് സാധിക്കുകയുള്ളൂ.

ബിജെപിക്ക് മാത്രമല്ല മറ്റു പാർട്ടികൾക്കും 2025 നിർണായകമാണ്. സീതാറാം യച്ചൂരിയുടെ നിര്യാണം ഒഴിച്ചിട്ട സിപിഎം അഖിലേന്ത്യാ ജനറൽ സെക്രട്ടറിയുടെ പദവിയിലെത്തുന്നത് ആരാവും എന്നോർത്ത് കേരളവും ആകാംക്ഷയിലാണ്. പക്ഷേ ഇതറിയാൻ ഏപ്രിൽ വരെ കാക്കണം. തിരഞ്ഞെടുപ്പുകളിൽ ബിജെപിയെ നേരിടാൻ ഇന്ത്യാ സഖ്യം ഉയർത്തെഴുന്നേൽക്കുമോ എന്നതാണ് പ്രതിപക്ഷ ക്യാംപിൽനിന്ന് അറിയേണ്ട മറ്റൊരു കാര്യം. 2024 ഇന്ത്യയെ ഉഴുതുമറിച്ച പൊതുതിരഞ്ഞെടുപ്പിന്റെ വർഷമായിരുന്നെങ്കിൽ 2025 തലമുറമാറ്റത്തിന്റെ വർഷമാണ്. പുതിയ തലവന്മാർ പാർട്ടി ഭരിക്കാൻ എത്തുന്ന വർഷം. രാഷ്ട്രീയത്തിലും നിയമനിർമാണത്തിലും മതപരമായ വിഷയങ്ങളിലും സമരങ്ങളിലും വരെ തർക്കങ്ങള്‍ തുടരുമ്പോൾ അതിനൊരു തീർപ്പുകൽപിക്കാൻ 2025നു സാധിക്കുമോ?

∙ വരുന്നുണ്ട്, രണ്ട് തിരഞ്ഞെടുപ്പുകൾ

ഡൽഹിയിലും ബിഹാറിലും നടക്കാനിരിക്കുന്ന നിയമസഭാ തിരഞ്ഞെടുപ്പുകളാണ് ഇക്കൊല്ലം രാഷ്ട്രം ഉറ്റുനോക്കുന്ന രണ്ടു ജനവിധികളെന്നു നേരത്തേ പറഞ്ഞല്ലോ. കേന്ദ്രത്തിലെ ഏറ്റവും വലിയ സഖ്യകക്ഷികളിലൊന്നായ ജെഡിയുവും ഒപ്പം ബിജെപിയും വിജയപ്രതീക്ഷയിൽ തന്നെയാണ്. എൻഡിഎ വിജയം മാത്രമല്ല, അതിൽതന്നെ തങ്ങൾക്കനുകൂലമായ ഒരു ബാലൻസ് കൂടി ഉണ്ടാകണമെന്ന് ബിജെപി സ്വകാര്യമായി ആഗ്രഹിക്കുന്നുണ്ടാകും. ഒക്ടോബർ-നവംബർ മാസങ്ങളിലായാണ് ബിഹാർ തിരഞ്ഞെടുപ്പ്. പലതവണ ചേരിമാറിയിട്ടുള്ള നിതീഷ് കുമാറിന്റെ മനസ്സിൽ പുതിയ നീക്കങ്ങളെന്തെങ്കിലുമുണ്ടോ എന്ന ആശങ്ക ബിജെപിക്കുണ്ട്. എന്നാൽ കേന്ദ്രഭരണത്തിലെ ശക്തമായ പങ്കാളിത്തം മറിച്ചൊന്നും ചിന്തിക്കാൻ നിതീഷിനെ പ്രേരിപ്പിക്കില്ലെന്ന് ബിജെപി കരുതുന്നു. എന്നാൽ അതോടൊപ്പം, സമ്മർദശക്തിയാണെന്ന സ്ഥിതി സീറ്റ് വിഭജനത്തിലടക്കം നിതീഷ് കാണിക്കുമെന്ന ആശങ്കയും അവർക്കുണ്ട്.

84 സീറ്റുള്ള ബിജെപി 48 സീറ്റുള്ള നിതീഷ് കുമാറിന് മുഖ്യമന്ത്രിക്കസേര വിട്ടുനൽകിയത് നിവൃത്തിയില്ലാത്തതുകൊണ്ടാണ്. 73 സീറ്റ് നേടിയ ആർജെഡിയും 16 സീറ്റോടെ നില മെച്ചപ്പെടുത്തിയ കോൺഗ്രസുമടങ്ങുന്ന പ്രതിപക്ഷ സഖ്യത്തിന് 104 സീറ്റുള്ളതിനാൽ നിതീഷിന് ഭരണം നൽകിയതിനാലാണ് 138 സീറ്റോടെ എൻഡിഎക്ക് ഭരണം നേടാനായത്. തങ്ങളുടെ ഇരട്ടിയോളം സീറ്റുള്ള പാർട്ടിയാണെന്ന പരിഗണനയൊന്നും നിതീഷ് നൽകിയേക്കില്ല എന്ന ആശങ്ക ബിജെപിക്കുണ്ട്. നിതീഷുമായി ആശയവിനിമയം ശക്തമാക്കാൻ കൂടി ലക്ഷ്യമിട്ടാവാം പുതിയ ഗവർണർ മാറ്റം പോലും. ആരിഫ് മുഹമ്മദ് ഖാൻ ഇടക്കാലത്തെങ്കിലും നിതീഷുമടങ്ങിയ ജനതാ പരിവാറിന്റെ ഭാഗമായിരുന്നല്ലോ.

മറുപക്ഷത്ത് എങ്ങനെയും ബിഹാർ ഭരണം പിടിക്കുകയെന്ന ലക്ഷ്യത്തിലാണ് ആർജെഡി നേതാവ് തേജസ്വി യാദവ്. രാഷ്ട്രീയമായി ജെഡിയുവിനെക്കാൾ ജനസ്വാധീനം തങ്ങൾക്കുണ്ടെന്നാണ് ആർജെഡിയുടെ പ്രതീക്ഷ. ബിജെപി കഴിഞ്ഞ തവണ നേടിയ സീറ്റുകൾ അവർക്കു നിലനിർത്താനാവില്ലെന്നും അദ്ദേഹം കരുതുന്നു. ജാതി സെൻസസ് അടക്കമുള്ള വിഷയങ്ങൾ ഏറ്റവുമധികം ഉയർത്തപ്പെടുന്ന തിരഞ്ഞെടുപ്പാകും ബിഹാറിലേതെന്നതും ഇന്ത്യയുടെ രാഷ്ട്രീയ ശ്രദ്ധ ബിഹാറിലേക്കു തിരിയാൻ കാരണമാകും.

ഡൽഹിയിൽ നിയമസഭയിലേക്ക് കേജ്‌രിവാളിന് വൻവിജയം സമ്മാനിച്ച അതേ വോട്ടർമാരാണ് ലോക്സഭയിലേക്ക് ആകെയുള്ള ഏഴു സീറ്റിലും ബിജെപിയെ ജയിപ്പിച്ചുവിട്ടത്. കേസുകളിൽ കുരുക്കി അരവിന്ദ് കേജ്‌രിവാൾ എന്ന രാഷ്ട്രീയ നേതാവിനെ ഇല്ലാതാക്കാനുള്ള ബിജെപിയുടെ ശ്രമം ജനം തിരിച്ചറിയുമെന്നു തന്നെയാണ് എഎപിയുടെ പ്രതീക്ഷ. അതേസമയം, 25 വർഷത്തിനുശേഷം രാജ്യതലസ്ഥാനത്തെ ഭരണം തിരിച്ചുപിടിക്കാനുള്ള അവസരമായാണ് ബിജെപി ഇൗ തിരഞ്ഞെടുപ്പിനെ കാണുന്നത്. ഒപ്പം കേജ്‌രിവാൾ എന്ന ഏറ്റവും കരുത്തനായ, ഒരുപക്ഷേ രാഹുൽ ഗാന്ധിയേക്കാൾ അവർ ഭയപ്പെട്ടിരുന്ന രാഷ്ട്രീയശത്രുവിനെ നിഷ്കാസനം ചെയ്യാനുള്ള സുവർണാവസരവും.

കേജ്‌രിവാളിന്റെ ജയിൽവാസമടക്കമുള്ള സംഭവവികാസങ്ങളെ ജനം എങ്ങനെ കാണുന്നു, ആം ആദ്മി പാർട്ടി മുന്നോട്ടുവച്ച ക്ഷേമഭരണമെന്ന സങ്കൽപത്തിൽ അവർ ഇപ്പോഴും വിശ്വാസമർപ്പിക്കുന്നുണ്ടോ എന്നീ കാര്യങ്ങളാകും ഡൽഹിയിലെ വിധി നിർണയിക്കുക. ഏതായാലും 2025ലെ ഏറ്റവും ശക്തമായ രാഷ്ട്രീയ പോരാട്ടത്തിനാകും ഡൽഹി വേദിയൊരുക്കുക എന്നുറപ്പ്. നരേന്ദ്ര മോദി, നിതീഷ് കുമാർ, അരവിന്ദ് കേജ്‌രിവാൾ എന്നീ മൂന്നു നേതാക്കളുടെ വ്യക്തിപ്രഭാവത്തിന്റെ മാറ്റുരയ്ക്കലും ഇൗ തിരഞ്ഞെടുപ്പുകളിൽ ദൃശ്യമാകും.

∙ തലമാറാൻ രാഷ്ട്രീയ പാർട്ടികൾ

ജനുവരിയിൽ ബിജെപിക്ക് പുതിയ ദേശീയ അധ്യക്ഷൻ വരും. ബിജെപിക്കകത്തുപോലും അതാരാകുമെന്നതിൽ വ്യക്തതയില്ല. മോദിയുടെയും അമിത് ഷായുടെയും മനസ്സിലിരിപ്പു പോലെയാകും കാര്യങ്ങൾ എന്നു വ്യക്തം. ജെ.പി.നഡ്ഡയ്ക്കു പകരം ആരു വരുമെന്ന ചോദ്യമുയരുമ്പോൾ 18-ാം ലോക്സഭയുടെ മുൻനിരയിലെ ഒഴിച്ചിട്ട ഒരു സീറ്റ് ചില സംശയങ്ങളുയർത്തുന്നുണ്ട്. ഒരു ലോക്സഭാംഗമായിരിക്കുമോ പുതിയ ബിജെപി പ്രസിഡന്റ് എന്നതാകുമത്. ആർഎസ്എസ് ബന്ധത്തിലുണ്ടായ ചില ഉലച്ചിലുകൾ, യുപി തിരഞ്ഞെടുപ്പ് തുടങ്ങിയ വെല്ലുവിളികളാണ് പുതിയ പ്രസിഡന്റിനു നേരിടാനുണ്ടാവുക. സഖ്യകക്ഷി ഭരണമാകുമ്പോൾ മറ്റു പാർട്ടികളുമായി നല്ല ബന്ധം നിലനിർത്തുന്നതിനു നേതൃത്വം നൽകേണ്ട ചുമതലയുമുണ്ടാകും. ആരാധനാലയ സംഘർഷങ്ങളടക്കം പാർട്ടി അണികളെയും ഇതര സംഘപരിവാർ ഘടകങ്ങളെയും നിയന്ത്രിച്ചു നിർത്തുകയും സംഘർഷമൊഴിഞ്ഞ ഭരണാനുകൂല സാഹചര്യമൊരുക്കുകയും ചെയ്യേണ്ടതും പാർട്ടി അധ്യക്ഷന് തലവേദന സൃഷ്ടിക്കാവുന്ന കാര്യങ്ങളാണ്.