സുരേഷ് ഗോപി റിസൽട്ട് തന്നു, ഇനി ആ ബിജെപി ‘തന്ത്രം’ രാജീവിലൂടെ; മോദി അന്നേ സൂചന നൽകി; അധ്യക്ഷന്റെ വരവിനു പിന്നിൽ കൊടകരയും?

∙ ‘യു ആർ ദ് പ്രസിഡന്റ്’

പ്രസിഡന്റാകുന്നതിൽ തനിക്കു താൽപര്യമില്ലെന്നായിരുന്നു രാജീവ് ചന്ദ്രശേഖറിന്റെ ആദ്യകാലത്തെ മറുപടികൾ. എന്നാൽ ബിജെപി നേതാക്കൾ അതിനൊപ്പം ഒരുകാര്യം കൂട്ടിച്ചേർക്കുമായിരുന്നു. നരേന്ദ്രമോദിയും അമിത് ഷായും നേരിട്ടു പറഞ്ഞാൽ പിന്നെ മറുവാക്കുണ്ടാകില്ല. രാജീവ് ചന്ദ്രശേഖറിന്റെ കാര്യത്തിൽ സംഭവിച്ചതും ഇതു തന്നെ. മാർച്ച് 23ന് രാവിലെ 8 മണിക്ക് ബിജെപി ദേശീയ പ്രസിഡന്റ് വിളിച്ചു പറഞ്ഞു. ‘യു ആർ ദ് പ്രസിഡന്റ്’ . കുറച്ചുനേരം നിശ്ശബ്ദനായ ശേഷം തിരിച്ചു ചോദിച്ചു, ‘പൂർണമായും ആലോചിച്ചെടുത്തതാണോ’ എന്ന്. ‘‘പാർട്ടി നേതൃത്വം തീരുമാനിച്ചുറപ്പിച്ചു. കേരളത്തിലെ പാർട്ടിക്കും സമ്മതമാണ്’’. നഡ്ഡ ഇത് പറഞ്ഞപ്പോൾ തന്നെ ഓകെ പറഞ്ഞു രാജീവ് ചന്ദ്രശേഖർ.

∙ പരീക്ഷണത്തിന് പിന്നിൽ മറ്റെന്ത്?

രാജീവ് ചന്ദ്രശേഖറിലൂടെ മറ്റൊരു പരീക്ഷണത്തിനു കൂടിയാണ് ബിജെപി തയാറെടുക്കുന്നത്. നിലവിലുള്ള നേതാക്കളിൽനിന്നുതന്നെ സംസ്ഥാന പ്രസിഡന്റ് സ്ഥാനത്തേയ്ക്ക് ഒരാളെ കൊണ്ടുവന്നാൽ കേരളത്തിലെ ഗ്രൂപ്പ് തർക്കം തുടരുമെന്നും പുതിയ നേതാവ് വേണമെന്നും കേരളത്തിന്റെ സംഘടനാ തിരഞ്ഞെടുപ്പിന്റെ ചുമതലയുണ്ടായിരുന്ന ദേശീയ ജനറൽ സെക്രട്ടറി കേരളത്തിൽ വന്നുപോയ ശേഷം ദേശീയ നേതൃത്വത്തിന് റിപ്പോർട്ട് നൽകിയിരുന്നു. ഈ റിപ്പോർട്ടിൽ തന്നെ രാജീവ് ചന്ദ്രശേഖറിന്റെ പേരിന് മുൻതൂക്കമുണ്ടായിരുന്നു. കെ.സുരേന്ദ്രനു പകരം എം.ടി . രമേശ് വന്നാൽ നിലവിലുണ്ടായിരുന്ന ഗ്രൂപ്പുമൽസരം അതുപോലെ തുടരും. ശോഭാ സുരേന്ദ്രൻ വന്നാലും മറ്റുള്ള വിഭാഗങ്ങളുടെ പ്രതികാരവും നിസ്സഹകരണവുമുണ്ടാകും. ഈ നിസ്സഹകരണം തിരഞ്ഞെടുപ്പു കാലത്ത് ബിജെപിക്കു വല്ലാതെ തിരിച്ചടിക്കുമെന്നും നേതൃത്വത്തിനു മനസ്സിലായി.

വരാൻ പോകുന്നത് കേരളത്തിലെ ബിജെപിക്കു മാത്രമല്ല, മൂന്ന് മുന്നണികൾക്കും നിർണായകമാണ്. ഇവിടെ പിറകോട്ടു പോയാൽ ബിജെപിയുടെ വളർച്ചയ്ക്കു തിരിച്ചടിയാകും.  മാത്രമല്ല, കേരളത്തിലെ ബിജെപിയിലെ രണ്ടുചേരിക്കും തിരിച്ചടിയാകുന്ന തീരുമാനമാണെങ്കിലും രണ്ടു വിഭാഗത്തിനും ആശ്വാസമാകുന്നതാണ് രാജീവിന്റെ വരവ്. സുരേന്ദ്രനു പകരം ശോഭയോ എംടി.രമേശോ വന്നിരുന്നെങ്കിലും സുരേന്ദ്രൻ പക്ഷത്തിന് തിരിച്ചടിയാകുമായിരുന്നു. സുരേന്ദ്രൻ തുടരുന്നതിനായിരുന്നു തീരുമാനമെങ്കിൽ മറുഭാഗത്തിനും നിരാശയാകുമായിരുന്നു. ശത്രുവിന് കിട്ടിയില്ലല്ലോ എന്ന ആശ്വാസമാണ് ഇരുപക്ഷത്തും.

കൊടകര കുഴൽപ്പണക്കേസ് ഉണ്ടാക്കിയ നാണക്കേടിനും പരിഹാരം കാണേണ്ടതുണ്ടെന്ന് ആർഎസ്എസ് വളരെ  നേരത്തേ തന്നെ ബിജെപി ദേശീയ നേതൃത്വത്തിനെ അറിയിച്ചിരുന്നു. അതിന് നിലവിലുള്ള നേതൃത്വത്തെ മാറ്റിയാലും വിശ്വാസ്യതയുള്ള മറ്റൊരു നേതാവ് വരാതെ പ്രശ്നം മാറില്ലെന്നതായിരുന്നു പ്രശ്നം. രാജീവ് ചന്ദ്രശേഖറിനെപ്പോലെ ‘പെർഫോമൻസ് ’ ട്രാക്ക് റെക്കോർഡുള്ള നേതാവ് വരുന്നതോടെ മറ്റു വിവാദങ്ങൾ ചർച്ചയിലേക്കു തിരിച്ചുവരില്ലെന്നാണ് ബിജെപിയിലെ സാധാരണ നേതാക്കളും വിശ്വസിക്കുന്നത്.

∙ ആർഎസ്എസ് പിന്തുണ അനിവാര്യം

സംഘകുടുംബത്തിലൂടെ വളർന്നുവന്നയാളല്ലെങ്കിലും ആർഎസ്എസിന് അടുപ്പമുള്ളയാളാണ് രാജീവ് ചന്ദ്രശേഖർ. മാതൃകയായി അവതരിപ്പിക്കാവുന്ന നേതാവാണ് രാജീവെന്ന് ആർഎസ്എസും വിശ്വസിക്കുന്നു.  ആർഎസ്എസ് നേതാക്കളുടെ അഭിപ്രായം ബിജെപി ദേശീയ നേതൃത്വം തേടിയപ്പോൾ ആർഎസ്എസ് കേരള ഘടകം പിന്തുണയറിയിച്ചിരുന്നു. വിവിധ തട്ടിൽ നിൽക്കുന്ന കേരള ബിജെപിയുടെ പ്രവർത്തനം ഏകോപിപ്പിക്കാൻ ആർഎസ്എസിന്റെ പിന്തുണ രാജീവ് ചന്ദ്രശേഖറിന് അനിവാര്യമാണ്. ഇടക്കാലത്ത് ബിജെപിയുടെ നേതൃനിരയിൽനിന്ന് പിൻവലിച്ച അവരുടെ സംഘടനാ ജനറൽ സെക്രട്ടറിയെ തിരികെ കൊടുക്കാൻ ആർഎസ്എസ് തയാറെടുക്കുന്നുവെന്നാണ് വിവരം. ജൂണിൽ നടക്കുന്ന ആർഎസ്എസ് വാർഷിക പ്രചാരക് ബൈഠക്കിൽ ഇക്കാര്യം തീരുമാനിക്കും. പ്രസിഡന്റുണ്ടെങ്കിലും ആർഎസ്എസ് നിയോഗിക്കുന്ന സംഘടനാ സെക്രട്ടറിയാണ് ദൈനംദിന പ്രവർത്തനങ്ങൾക്കെല്ലാം ചുക്കാൻ പിടിക്കുന്നത്. ആർഎസ്എസ് പ്രതിനിധി തിരിച്ചെത്തുന്നതോടെ രാജീവ് ചന്ദ്രശേഖറിനു കാര്യങ്ങൾ എളുപ്പമാകും.

∙ പകുതി ഭാരവാഹികൾ പുതുതായെത്തും

നിലവിലുള്ള സംസ്ഥാന ഭാരവാഹികളിലും മാറ്റം വരും. പകുതിയോളം പുതിയ ഭാരവാഹികളെത്തും. അതേസമയം സംസ്ഥാനത്തെ മുതിർന്ന നേതാക്കളെ പരമാവധി ഉൾക്കൊണ്ടുപോകണമെന്ന നിർദേശമാണ് രാജീവ് ചന്ദ്രശേഖറിനു നൽകിയിട്ടുള്ളത്. ബിജെപിയുടെ ദക്ഷിണേന്ത്യൻ സ്വപ്നങ്ങൾക്ക് കേരളത്തിൽ കാര്യമായി ശ്രദ്ധ വേണമെന്നാണ് ബിജെപി ദേശീയ നേതൃത്വത്തിന്റെ നിലപാട്. രണ്ട് കേന്ദ്രമന്ത്രിമാർക്കു പുറമേ കേരളത്തിൽ രണ്ടു പേർക്ക് ഗവർണർ സ്ഥാനം നൽകിയതും ഇതിന്റെ ഭാഗമായാണ്. അനിൽ ആന്റണിയെയും എ.പി.അബ്ദുള്ള കുട്ടിയെയും ദേശീയ ഭാരവാഹികളാക്കിയാണ് പാർട്ടിയിലേക്കു സ്വീകരിച്ചതുതന്നെ . കേരളത്തിൽ ന്യൂനപക്ഷ വിഭാഗങ്ങൾക്ക് കൂടുതൽ പരിഗണന നൽകണമെന്ന ഉദ്ദേശവും ബിജെപിക്കുണ്ട്. പുതിയ സംസ്ഥാന ഭാരവാഹിപ്പട്ടികയിൽ ഇതിനു പ്രത്യേക ശ്രദ്ധപതിപ്പിക്കാനും നിർദേശമുണ്ട്.