ജയിലിൽ ഗുണ്ടകളുടെ ‘ഇടിമുറി’; സൂപ്രണ്ടിന്റെ കാൽ തല്ലിയൊടിച്ചാലും കേസില്ല; ‘ജോലിക്ക് പ്രതിഫലം ക്വട്ടേഷൻ’

∙ എന്നെ കൊല്ലാൻ വന്നവരെ പൊലീസ് സഹായിച്ചു

എക്സൈസ് സ്റ്റേറ്റ് എൻഫോഴ്സ്മെന്റ് സ്ക്വാഡിലെ അസി.കമ്മിഷണറായിരുന്ന ടി.അനികുമാറിന്റെ വെളിപ്പെടുത്തൽ:

ടി.അനികുമാറിനെ കൊലപ്പെടുത്താൻ ലഹരിക്കേസ് പ്രതി മറ്റൊരു ലഹരിക്കേസ് പ്രതിക്കു ജയിലിൽവച്ച് ഈയിടെ ക്വട്ടേഷൻ നൽകിയെന്ന ഇന്റലിജൻസ് റിപ്പോർട്ട് കഴിഞ്ഞദിവസം പുറത്തുവന്നിരുന്നു. ഈ വർഷം സർവീസിൽനിന്നു വിരമിച്ച അനികുമാർ ലഹരിക്കടത്തു പിടിക്കാനുള്ള സ്ക്വാഡിന്റെ തലവനായിരുന്നു. അതുകൊണ്ടുതന്നെ ഗുണ്ടകളിൽ പലരും ശത്രുക്കൾ. ഇതിനു മുൻപും തനിക്കെതിരെ ക്വട്ടേഷൻ ആക്രമണം ഉണ്ടായിട്ടുണ്ടെന്ന് അദ്ദേഹം പറയുന്നു. രണ്ടരവർഷം മുൻപു നടന്ന ആ സംഭവത്തിലെ പ്രതികളെ രക്ഷപ്പെടാൻ സഹായിച്ചതു പൊലീസാണെന്ന് അദ്ദേഹം വെളിപ്പെടുത്തുന്നു. 

∙ പൊലീസിൽ പരാതി നൽകിയില്ലേ?

അന്നുതന്നെ വഞ്ചിയൂർ പൊലീസ് സ്റ്റേഷനിൽ പരാതി നൽകി. രണ്ടു പ്രതികളെ അറസ്റ്റ് ചെയ്തെങ്കിലും ദുർബലമായ വകുപ്പു ചുമത്തി സ്റ്റേഷൻ ജാമ്യം നൽകി വിട്ടയച്ചു. ഡ്യൂട്ടിയിലുള്ള ഉദ്യോഗസ്ഥനെ കൊലപ്പെടുത്താൻ ശ്രമിച്ചവരെയും ഗൂഢാലോചന നടത്തിയവരെയും പൊലീസ് സഹായിക്കുകയായിരുന്നു. ഇക്കാര്യത്തെക്കുറിച്ചു സ്റ്റേഷൻ ഹൗസ് ഓഫിസറോടു തിരക്കിയപ്പോൾ, ‘വീട്ടിലേക്കു പോകുന്ന വഴിക്കായതിനാൽ ഡ്യൂട്ടിയായി കരുതാൻ പറ്റില്ലല്ലോ’ എന്നായിരുന്നു മറുപടി. എന്റെ ഓഫിസിലെ എസ്എച്ച്ഒയായിരുന്നു അപ്പോൾ ഞാൻ.

ഒരു എസ്എച്ച്ഒ 24 മണിക്കൂറും ഡ്യൂട്ടിയിലുള്ളയാളാണ് എന്നറിയാത്ത ആളല്ല ആ സിഐ. പ്രതികളുടെ സ്വാധീനത്തിന് അവർ വഴങ്ങിയെന്നു ഞാൻ വിശ്വസിക്കുന്നു. കേസ് ഒത്തുതീർപ്പാക്കാനുള്ള ശ്രമമാണ് ഇപ്പോൾ നടക്കുന്നത്. കാസർകോട് മുതൽ തിരുവനന്തപുരം വരെ 2010 മുതലെടുത്ത കേസുകളിൽ വിചാരണ നടക്കാനുണ്ട്. അതിനെല്ലാം ഹാജരാകണം. അതിന്റെ കൂടെയാണ് ആക്രമണഭീഷണി. ‘‘നന്നായി ജോലി ചെയ്യുന്ന ഉദ്യോഗസ്ഥർക്കു പ്രതിഫലം ഗുണ്ടകളുടെ ക്വട്ടേഷനാണെങ്കിൽ ആരാണു സംരക്ഷണം നൽകുക? ആരെയാണു തിരുത്തേണ്ടത്?’’

∙ തോക്ക് സംഘത്തിന്റെ ഓപ്പറേഷൻ

കൊച്ചിയിലെ ഗുണ്ടകളിൽ പലരും രണ്ടു ലക്ഷം മുതൽ 4 ലക്ഷം രൂപ വരെ വിലയുള്ള ജർമൻ, യുഎസ് പിസ്റ്റളുകൾ കൈവശം സൂക്ഷിക്കുന്നവരാണ്. വൻതോതിലുള്ള തോക്ക് കള്ളക്കടത്തും ഇപ്പോൾ കൊച്ചിയിലുണ്ട്. കേരളത്തിനു പുറത്തുനിന്നുള്ള ‘ക്വട്ടേഷനു’കൾ കിട്ടണമെങ്കിൽ കയ്യിൽ തോക്കു വേണം. ഏതാനും മാസം മുൻപാണ് കൊച്ചിയിലെ ‘തോക്ക് സംഘം’ കർണാടകയിൽ ഓപ്പറേഷൻ നടത്തിയത്. റോഡ് മാർഗം കൊണ്ടുവരുന്ന ഒരു കോടി രൂപയുടെ കള്ളപ്പണം തട്ടാനായിരുന്നു പദ്ധതി. തോക്കുധാരികളായ ഗുണ്ടാസംഘം അതിവേഗം പണി നടത്തി. പക്ഷേ, വണ്ടിയിൽനിന്നു കിട്ടിയ ബാഗുകളിൽ നോക്കിയപ്പോൾ ഗുണ്ടാനേതാവിന്റെ കണ്ണുതള്ളി. ഒരു കോടി പ്രതീക്ഷിച്ചിടത്ത് 50 കോടി! പിന്നെ ആലോചിച്ചില്ല; വണ്ടിയടക്കം മുക്കി. ലോക്സഭാ തിരഞ്ഞെടുപ്പിനു വേണ്ടി കൊണ്ടുവന്ന കള്ളപ്പണമായിരുന്നു അത്.  രാഷ്ട്രീയനേതാക്കൾ ഇടപെട്ട പരിപാടിയായതുകൊണ്ട് ഗുണ്ടാസംഘത്തിനു ചെറിയൊരു പേടി. കേരളത്തിലെ അഭിഭാഷകനെ വിവരം ധരിപ്പിച്ചു. ‘‘പറ്റിയതു പറ്റി, എത്രയും വേഗം കേരളത്തിലെത്തൂ’’ എന്നായിരുന്നു ഉപദേശം. 

ഇതേസമയം കർണാടകയിൽ സമാന്തരമായി മറ്റൊരു ക്വട്ടേഷൻ നടന്നു. നഷ്ടപ്പെട്ട 50 കോടിയും കള്ളപ്പണമായതുകൊണ്ടു കേസാക്കാൻ പറ്റില്ല. പക്ഷേ, കർണാടക പൊലീസിലെതന്നെ കുപ്രസിദ്ധനായ ഒരു ഉദ്യോഗസ്ഥനെ പണി ഏൽപിച്ചു. പോയ പണം വണ്ടിസഹിതം തിരിച്ചുപിടിക്കണം. പണം തട്ടിയവർക്കു മറുപണി കൊടുക്കണം. അങ്ങനെ ബെംഗളൂരു പൊലീസ് സംഘം അതീവരഹസ്യമായി കൊച്ചിയിലേക്കു പുറപ്പെട്ടു. അപ്പോൾതന്നെ കേരള പൊലീസിലെ മിടുക്കർ ആ വിവരം മണത്തറിഞ്ഞു. പക്ഷേ, പൊലീസിലെതന്നെ ചാരന്മാർ സംഗതി ഗുണ്ടാസംഘത്തിന്റെ ചെവിയിൽ എത്തിച്ചു. പിടിക്കപ്പെടുമെന്ന് ഉറപ്പായതോടെ ഗുണ്ടാത്തലവൻ വീണ്ടും നിയമോപദേശം തേടി.

കർണാടകയിലെ രാഷ്ട്രീയ–അധോലോക കൂട്ടുകെട്ടുകളെ വിറപ്പിച്ച വിഷയമായതുകൊണ്ട് ഗുണ്ടാത്തലവൻ ‘എൻകൗണ്ടറിൽ’ കൊല്ലപ്പെടുമെന്ന് ഉറപ്പായിരുന്നു. കേരളത്തിലെത്തുംവരെ പിടികൊടുക്കരുതെന്നായിരുന്നു നിയമോപദേശം. ശരീരത്തിൽ മുറിവുണ്ടാക്കി ഗുണ്ടാത്തലവൻ സ്വകാര്യാശുപത്രിയിൽ ചികിത്സ തേടി. എന്നിട്ടു കൊച്ചി സിറ്റി പൊലീസിനെ വിവരമറിയിച്ചു. പിടികിട്ടാപ്പുള്ളിയായിരുന്ന ഗുണ്ടാത്തലവൻ അങ്ങനെ കേരള പൊലീസിന്റെ പിടിയിലായി. കർണാടകയിൽ നിന്നുള്ള ‘ക്വട്ടേഷൻ പൊലീസ് സംഘം’ എത്തുംമുൻപേ അയാൾ അഴിക്കുള്ളിൽ സുരക്ഷിതനായി. കാപ്പ കൂടി ചുമത്തിയതോടെ ഒരു വർഷത്തേക്കു ജീവിതം സർക്കാർ ചെലവിലുമായി. കള്ളപ്പണ നീക്കം ചോർത്തിയവരെ രാഷ്ട്രീയ നേതാക്കൾതന്നെ കണ്ടെത്തി പ്രശ്നം പരിഹരിച്ചു. കൊച്ചിയിലെ സംഘത്തിന്റെ പക്കലെത്തിയ 50 കോടിയുടെ കാര്യം തൽക്കാലം അവരും മറന്നു. പൊലീസിനുള്ളതു പൊലീസിനും ഗുണ്ടയ്ക്കുള്ളതു ഗുണ്ടയ്ക്കും!

നാളെ: ഗുണ്ടയ്ക്ക് എന്തു കാപ്പ !