അവർ 'ഭരണഘടനാ വിരുദ്ധർ': കേന്ദ്രവും സമ്മതിച്ചു, പരീക്ഷയിൽ ശ്രദ്ധ വേണമായിരുന്നു; രാഷ്‌ട്രപതി പറഞ്ഞതും പറയാൻ 'മറന്നതും'

പ്രധാനമായും, മൂന്നാം നരേന്ദ്ര മോദി സർക്കാരിന്റെ പ്രവർത്തന ലക്ഷ്യങ്ങൾ വിശദീകരിക്കുന്നതാണ് രാഷ്ട്രപതി ദ്രൗപദി മുർമു പാർലമെന്റിന്റെ സംയുക്ത സമ്മേളനത്തിൽ നടത്തിയ പ്രസംഗം. അതിൽ, പ്രതിപക്ഷത്തിനെതിരെ പരോക്ഷ വിമർശനമുണ്ട്. അപ്പോൾ ഭരണഘടനയെക്കുറിച്ചും അടിയന്തരാവസ്ഥയെക്കുറിച്ചും  പരാമർശവും ഉൾപ്പെടുക സ്വാഭാവികം. ഭരണഘടനയുടെ 86–ാം വകുപ്പ്, രാഷ്ട്രപതിക്ക് പാർലമെന്റിലെ ഒാരോ സഭയെയും വെവ്വേറെയും, സംയുക്തമായും അഭിസംബോധന ചെയ്യാനുള്ള അവകാശം വ്യക്തമാക്കുന്നു. ഒാരോ വർഷത്തെയും ആദ്യ സമ്മേളനത്തിലും, പുതിയ സർക്കാർ രൂപീകരിച്ച ശേഷമുള്ള ആദ്യ സമ്മേളനത്തിലും ഇരുസഭകളെയും ഒരുമിച്ച് രാഷ്ട്രപതി അഭിസംബോധന ചെയ്യുന്നതു സംബന്ധിച്ചാണ് 87–ാം വകുപ്പ്. പുതിയ സർക്കാരിന്റെ ആദ്യ സമ്മേളനം എന്ന നിലയ്ക്കാണ് രാഷ്ട്രപതി ദ്രൗപദി മുർമുവിന്റെ  പ്രസംഗം. 

∙ വ്യക്തമായ ഭൂരിപക്ഷം

ആദ്യ ഭാഗത്ത്, കഴിഞ്ഞ ലോക്സഭാ തിരഞ്ഞെടുപ്പിനെക്കുറിച്ച് രാഷ്ട്രപതി പരാമർശിക്കുന്നു. വ്യക്തമായ ഭൂരിപക്ഷമുള്ള സുസ്ഥിര സർക്കാരിനെയാണ് ഇത്തവണ ഇന്ത്യയിലെ ജനം തിരഞ്ഞെടുത്തിട്ടുള്ളത് എന്ന് അതിൽ പറയുന്നു. 2019ൽ പുതിയ സർക്കാർ അധികാരമേറ്റശേഷം പാർലമെന്റിന്റെ ആദ്യ സമ്മേളനത്തിൽ അന്നത്തെ രാഷ്ട്രപതി റാംനാഥ് കോവിന്ദ് പറഞ്ഞു: ‘വ്യക്തമായ വിധിയെഴുത്താണ് ജനം നടത്തിയിരിക്കുന്നത്. ആദ്യ സർക്കാരിന്റെ പ്രവർത്തനം വിലയിരുത്തിയശേഷം, രണ്ടാം തവണയ്ക്കായി ശക്തമായ പിന്തുണയാണ് നൽകിയിരിക്കുന്നത്.’

എന്നാൽ‍, 2024ലെ വിധിയെഴുത്ത് വ്യക്തമായ ഭൂരിപക്ഷമുള്ള സുസ്ഥിര സർക്കാരിന് എന്നുള്ളത് സംശയകരമായ പ്രസ്താവമാണ്. ദേശീയ ജനാധിപത്യ സഖ്യത്തിന് ഭൂരിപക്ഷം ലഭിച്ചു; മുഖ്യഭരണകക്ഷിയായ ബിജെപിക്ക് കഴിഞ്ഞ രണ്ടു തവണത്തേതിൽനിന്നു ഭിന്നമായി തനിച്ചു ഭരണത്തിനുള്ള സീറ്റെണ്ണം ലഭിച്ചില്ല. സർക്കാരിന്റെ സുസ്ഥിരത പ്രധാന സഖ്യകക്ഷികളുടെ നിലപാടിനെ ആശ്രയിച്ചിരിക്കും എന്നതാണ് സ്ഥിതി.

∙ ബജറ്റിലെന്തൊക്കെ?

ജൂലൈ മൂന്നാം വാരത്തിലാണ് മൂന്നാം മോദി സർക്കാരിന്റെ ആദ്യ ബജറ്റ് അവതരിപ്പിക്കുന്നത്. ബജറ്റിലെ പ്രഖ്യാപനങ്ങളുടെ സ്വഭാവത്തെക്കുറിച്ച് രാഷ്ട്രപതി ഇന്നലെ സൂചന നൽകിയിട്ടുണ്ട്. അതനുസരിച്ച്:

ആയുഷ്മാൻ ഭാരത് ആരോഗ്യ ഇൻഷുറൻസ് പദ്ധതിയുടെ ആനുകൂല്യം 70 വയസ് കഴിഞ്ഞ എല്ലാവർക്കും ലഭ്യമാക്കുമെന്നത് ബിജെപിയുടെ ഇത്തവണത്തെ തിരഞ്ഞെടുപ്പു വാഗ്ദാനമായിരുന്നു. നടപ്പാക്കുമെന്ന് ഇപ്പോൾ രാഷ്ട്രപതി വ്യക്തമാക്കിയിരിക്കുന്ന ഈ വാഗ്ദാനവും ബജറ്റിൽ പ്രതീക്ഷിക്കാവുന്നതാണ്. പിൻവലിക്കേണ്ടി വന്ന കൃഷി നിയമങ്ങളും അവയുടെ പേരിൽ കർഷകരെ അകറ്റിയതും ബിജെപിക്ക് തിരഞ്ഞെടുപ്പിലുണ്ടായ നഷ്ടത്തിന്റെ പ്രധാന കാരണങ്ങളിലൊന്നാണ്. കാർഷിക മേഖലയ്ക്കായി മോദി സർക്കാർ ഇതുവരെ എന്തൊക്കെ ചെയ്തുവെന്ന് വിശദമായി പറയുന്നതിനൊപ്പം, ജൈവകൃഷി ഉൾപ്പെടെയുള്ള മേഖലകളിൽ നൽകാൻ‍ ഉദ്ദേശിക്കുന്ന ഊന്നലും രാഷ്ട്രപതി വ്യക്തമാക്കുന്നു. ഭാവിയെ ‘ഹരിതയുഗം’ എന്നു വിശേഷിപ്പിച്ച്,  വ്യവസായം, ഗതാഗതം തുടങ്ങിയ മേഖലകളിൽ മുതൽമുടക്ക് വർധിപ്പിക്കാനുള്ള പദ്ധതികളും രാഷ്ട്രപതി സൂചിപ്പിക്കുന്നു.

∙ പറഞ്ഞതും പറയാത്തതും

ഇടുങ്ങിയ സ്വാർഥതാൽപര്യങ്ങളാൽ ജനാധിപത്യത്തിന്റെ അന്തസത്തയ്ക്ക് കോട്ടം തട്ടിയിരിക്കുന്നുവെന്നാണ് രാഷ്ട്രപതിയുടെ വിമർശനം. ഇത് പാർലമെന്ററി സംവിധാനത്തെ മാത്രമല്ല, രാജ്യത്തിന്റെ വികസനയാത്രയെയും ബാധിക്കുമെന്ന മുന്നറിയിപ്പുമുണ്ട്. സുസ്ഥിരമല്ലാത്ത സർക്കാരുകൾക്ക് പരിഷ്കാരങ്ങൾ നടപ്പാക്കാനും സുപ്രധാന തീരുമാനങ്ങളെടുക്കാനും സാധിച്ചില്ലെന്നും വ്യക്തമായ വിധിയെഴുത്തിലൂടെ ആ സ്ഥിതിക്ക് ജനം മാറ്റം വരുത്തിയിരിക്കുന്നു എന്നുമാണ് വിലയിരുത്തൽ.