ഇടിഞ്ഞു, ഇനി കുതിക്കും; വിദേശ നിക്ഷേപവും വൻതോതിൽ; ഓഹരി വിപണിയിൽ ലാഭം കൂട്ടാം, നഷ്ടം കുറയ്ക്കാം; ഇതാ ചില ‘വെറൈറ്റി’ തന്ത്രങ്ങൾ

രൂപയുടെ മൂല്യം ഇടിയുകയാണെങ്കിൽ അതിൽ നിന്ന് ഐടി കമ്പനികൾ പോലുള്ള സേവന കയറ്റുമതി വിഭാഗത്തിലെ ഓഹരികൾ നേട്ടമുണ്ടാക്കും. വൻ ഇടിവുകൾക്കുശേഷം തിരിച്ചുവരവിന്റെ സൂചന ആദ്യം നൽകുന്നത് ചിലപ്പോഴെങ്കിലും ലോഹക്കമ്പനികളുടെ (മെറ്റൽ) ഓഹരികളാണ്. ഒരു മികച്ച മെറ്റൽ ഓഹരി പോർട്ട്ഫോളിയോയിലുണ്ടെങ്കിൽ മുന്നോട്ടുപോകാനുള്ള പ്രതീക്ഷ ലഭിക്കും. പോർട്ട്ഫോളിയോ തിരഞ്ഞെടുക്കുമ്പോൾ ഭാവിയിലെ രാജ്യത്തിന്റെ വികസം, ഇനിയും വികസിക്കാൻ സാധ്യതയുള്ള മേഖലകൾ, ഏറ്റവും വേഗത്തിൽ വൈവിധ്യവൽക്കരണം നടപ്പാക്കുന്ന കമ്പനികൾ തുടങ്ങിയ ഘടകങ്ങൾ ശ്രദ്ധിക്കാം.

∙ പവർ ഓഫ് ‘ആവറേജിങ്’

വലിയ തിരുത്തലുകൾ ആവറേജിങ്ങിനുള്ള ഏറ്റവും മികച്ച അവസരമാണ്. കൈവശമുള്ള ഓഹരികളുടെ വില കുറയുമ്പോൾ വാങ്ങുന്നതുവഴി അവയുടെ ശരാശരി വില കുറയ്ക്കാം. ഇവയുടെ വില കൂടുമ്പോൾ ലാഭവും കൂടും. എന്നാൽ ആവറേജിങ് ചെയ്യുമ്പോൾ പ്രത്യേകം കരുതൽ വേണം. ഇടിവുകൾക്കു ശേഷം തിരികെക്കയറിത്തുടങ്ങുമ്പോൾ ആവറേജ് ചെയ്യുകയെന്നതാണ് ഒരു സ്ട്രാറ്റജി. വളരെ കുറച്ച് എണ്ണം മാത്രം വാങ്ങി ആവറേജ് ചെയ്യുകയുമാവാം. ചാർട്ടുകളുടെ സഹായത്തോടെ കൃത്യമായി അപഗ്രഥിച്ച് ആവറേജ് ചെയ്യാം. വീണ്ടും താഴേക്കാണ് പോക്കെങ്കിൽ ആവറേജ് ചെയ്യാതെയുമിരിക്കാം.

∙ വിശ്വാസമാണ് എല്ലാം

ഇടിവുകളിൽ ഭയന്ന്, നഷ്ടത്തിൽ ഓഹരികൾ വിറ്റൊഴിവാക്കാതെ വിപണിയെ വിശ്വസിച്ച് മുന്നോട്ടുപോകുകയെന്നത് ഒരു മികച്ച സ്ട്രാറ്റജി തന്നെയാണ്. വലിയ ഇടിവുകൾ വളരെ വേഗത്തിൽ മറികടന്ന് മുന്നോട്ടുകുതിക്കുന്ന ചരിത്രമാണ് ഓഹരി വിപണിക്കുള്ളത്. ‘പാനിക് സെല്ലിങ്’ ഒരു പരിധി വരെ ഒഴിവാക്കുകയാണു വേണ്ടത്. വളരെ വേഗത്തിൽ എടുക്കുന്ന തീരുമാനത്തിന്റെ പേരിൽ ഇങ്ങനെ വിൽക്കുന്ന ഓഹരികൾ പിന്നീട് മികച്ച വിലയിൽ വാങ്ങാൻ കഴിഞ്ഞില്ലെന്നും വരാം. പക്ഷേ ഇടിവിന്റെ തുടക്കത്തിൽ വിൽക്കാൻ കഴിഞ്ഞ ട്രേഡർമാർക്ക് ആദായ വിലയിൽ കൂടുതൽ ഓഹരികൾ വാങ്ങി, കൂടുതൽ ലാഭമുണ്ടാക്കാനും കഴിയും. വിപണിയുടെ സ്വഭാവം പ്രവചിക്കാനാവാത്തതിനാൽ ആവേശത്തിന്റെ പുറത്തുള്ള വാങ്ങൽ– വിൽക്കലുകൾ ഒഴിവാക്കാം.

∙ ദീർഘകാല ലക്ഷ്യത്തിനായി

ഓഹരി അധിഷ്ഠിത നിക്ഷേപങ്ങൾ ദീർഘകാല ലക്ഷ്യങ്ങൾക്കായുള്ള നിക്ഷേപമായി കരുതുകയാണ് ഏറ്റവും നല്ലത്. ക്ഷമയും സാമ്പത്തിക അച്ചടക്കവും സ്വത്ത് വർധിപ്പിക്കാനിടയാക്കും. ഓഹരി വിപണിയിൽ ഹ്രസ്വകാല മാറ്റങ്ങളോട് പ്രതികരിച്ച് നിക്ഷേപം പുനഃക്രമീകരിക്കുന്നത് പലപ്പോഴും ബുദ്ധിപരമായ തീരുമാനമാകില്ല. വിപണിയിലെ തിരുത്തലുകൾ നിക്ഷേപകനു കുറഞ്ഞ വിലയിൽ കൂടുതൽ യൂണിറ്റുകൾ വാങ്ങുന്നതിനുള്ള നിക്ഷേപ അവസരം നൽകുന്നുണ്ട്. സാമ്പത്തിക വിദഗ്ധരുടെ നിർദേശം അനുസരിച്ച് നിക്ഷേപിക്കുകയാണെങ്കിൽ നഷ്ട സാധ്യത കുറയ്ക്കാനുമാകും.

∙ വന്നു തുടങ്ങി ശുഭസൂചനകൾ

അമേരിക്കൻ തിരഞ്ഞെടുപ്പ് ഫലം ഡോളറിന്റെ അതിവേഗ കുതിപ്പിന് ഇടയാക്കുന്നുണ്ട്. ഡോളർ ഇൻഡെക്സ് കുതിക്കുന്നതും ഇന്ത്യൻ വിപണിയിൽ നിന്നുള്ള വിദേശ നിക്ഷേപകരുടെ പിൻമാറ്റത്തിന് ആക്കം കൂട്ടിയിരുന്നു. താരതമ്യേന ചെറിയ വിലയിൽ ലഭ്യമാകുന്ന ചൈനീസ് ഓഹരികളിലേക്ക് വിദേശ നിക്ഷേപകർ കൂട്ടത്തോടെ പോയതും ഇന്ത്യൻ വിപണികളെ തളർത്തി. എന്നാൽ മാറ്റത്തിന്റെ സൂചനകൾ പല കോണുകളിൽ നിന്നും വന്നുതുടങ്ങിയിട്ടുണ്ട്. ആദ്യ സൂചന നൽകിയത് സിഎൽഎസ്എ എന്ന ആഗോള ബ്രോക്കിങ് സ്ഥാപനമാണ്. ചൈനയേക്കാൾ ആകർഷകമായ വിപണി ഇന്ത്യയിലേതാണെന്ന് അവർ പറഞ്ഞു കഴിഞ്ഞു. ചെറിയ വിലയ്ക്ക് ഇന്ത്യൻ ഓഹരികൾ വാങ്ങാമെന്നു സ്വപ്നം കാണുന്നത് നടക്കാത്ത സ്വപ്നമാണെന്നു കൂടി സ്ഥാപനം പറഞ്ഞിട്ടുണ്ട്.

ഗോൾഡ്മാൻ സാക്ക്സ്, മോർഗൻ സ്റ്റാൻലി തുടങ്ങിയ വമ്പൻമാരുംചൈനീസ് ഓഹരി നിക്ഷേപം സൂക്ഷിച്ചുമാത്രമെന്ന നിലപാടുമായി പിന്നാലെ രംഗത്തെത്തി. ഓഹരികൾക്കു വില കുറവാണെങ്കിലും വളർച്ചയുടെ കാര്യത്തിൽ ഉറപ്പില്ലെന്നാണ് ഇവരുടെ വിലയിരുത്തൽ. ഇന്ത്യൻ ഓഹരി വിപണിയിലേക്ക് വൻതോതിൽ വിദേശനിക്ഷേപം തിരികെയെത്താനുള്ള വാതിലുകൾ തുറക്കുന്നതാണ് ഈ രാജ്യാന്തര സ്ഥാപനങ്ങളുടെ നിരീക്ഷണങ്ങൾ. മാത്രമല്ല, രാജ്യത്തെ വൻകിട നിക്ഷേപ സ്ഥാപനങ്ങളും ഓഹരി വാങ്ങാൻ പണവുമായി കാത്തിരിക്കുന്നു. ഒപ്പം ഒട്ടേറെ, ചെറുകിട നിക്ഷേപകരും. നിരാശയ്ക്കല്ല, പ്രതീക്ഷയ്ക്കുള്ള വകയാണു കൂടുതൽ.