ആ പെൺകുട്ടി ചോദിച്ചു, ‘ഈ പണി പറ്റില്ലെങ്കിൽ നിർത്തിപ്പൊയ്ക്കൂടേ?’; ദാഹമകറ്റാൻ പൈപ്പ് വെള്ളം; ഫ്ലാറ്റുകളിൽ ഊരുവിലക്ക്; ആരു കാണും ഈ ദുരിതം!

കേരളത്തിൽ ഓൺലൈൻ ഡെലിവറി മേഖലയിൽ തൊഴിലെടുക്കുന്നവരെത്ര? കൃത്യമായ കണക്കില്ല. ഗിഗ് തൊഴിലാളികളെന്നു വിളിക്കപ്പെടുന്ന ഇവരുടെ റജിസ്ട്രേഷനോ കണക്കെടുപ്പോ ആരും നടത്തിയിട്ടില്ല. സ്ഥിരവരുമാനം കിട്ടുന്ന ജോലി ശരിയാകുംവരെ ഒരു മാർഗമെന്ന നിലയിലാണ് പലരും ഈ മേഖലയിലെത്തുന്നത്. എന്നാൽ, തിരികെപ്പോക്കില്ലാതെ കുരുങ്ങിപ്പോകുന്നവരേറെ. മറ്റൊരു മാർഗത്തെക്കുറിച്ചു ചിന്തിക്കാൻപോലുമാകാതെ അവർ ഓടിക്കൊണ്ടേയിരിക്കും. ഓർഡർ ചെയ്ത സാധനങ്ങൾ എത്തിക്കാൻ വൈകിയതിൽ അധിക്ഷേപിച്ചതിനെത്തുടർന്നു തമിഴ്നാട്ടിൽ ജീവനൊടുക്കിയ ഡെലിവറി ജീവനക്കാരൻ ബിരുദപഠനത്തിനിടെ പാർട്‌ടൈം ആയി ജോലി ചെയ്തിരുന്ന പത്തൊൻപതുകാരനാണ്. ഏറെപ്പേർക്കു താൽക്കാലിക വരുമാനമാർഗമായി മാറിയ ഈ പുത്തൻ ജോലിയിൽ പ്രശ്നങ്ങളേറെ.

∙ പഠിക്കാൻ ഓടി, പക്ഷേ...

ഏറ്റവും കഷ്ടപ്പാടുനിറഞ്ഞ കാലത്താണ് കോഴിക്കോട്ട് ഫുഡ് ഡെലിവറി ജോലി ചെയ്തത്. ബിരുദപഠനം കഴിഞ്ഞ സമയം. രാത്രി പന്ത്രണ്ടുവരെ ജോലി ചെയ്യും. ഭക്ഷണം കഴിക്കാനുള്ള ഇടവേളപോലും കിട്ടാറില്ലായിരുന്നു. ഗതാഗതക്കുരുക്കിലൂടെ യാത്ര ബുദ്ധിമുട്ട്. വൈകിയാൽ അവഹേളനവും തട്ടിക്കയറലും. നെഗറ്റീവ് റിവ്യൂ കിട്ടാതിരിക്കാൻ പരമാവധി ശ്രമിക്കണം. പഠിക്കാൻ സമയം കിട്ടാത്ത അവസ്ഥയായി. തമിഴ്നാട്ടിലെ ബിഎഡ് പ്രവേശനപരീക്ഷ പാസായതോടെ ജോലി ഉപേക്ഷിച്ചു എന്നു പറയുകയാണ് റഹീം (യഥാർഥ പേരല്ല).

ആ പെൺകുട്ടി ചോദിച്ചു: നിർത്തിപ്പൊയ്ക്കൂടേ..? ആ 61 വയസ്സുകാരനു മറുപടിയുണ്ടായിരുന്നില്ല....‘വാഹനത്തിരക്കിനിടെ സ്കൂട്ടർ ഒതുക്കിവച്ച് ഭക്ഷണ പാക്കറ്റ് കൊടുക്കുമ്പോൾ ആ പെൺകുട്ടി ദേഷ്യത്തിൽ പറഞ്ഞത് ‘ഈ പണി പറ്റില്ലെങ്കിൽ നിർത്തിപ്പൊയ്ക്കൂടേ’ എന്നാണ്. സ്ഥലം കണ്ടെത്താൻ ബുദ്ധിമുട്ടിയിരുന്നു; പിന്നെ, വൺവേയും. മറുപടി പറയാതെ ഞാൻ പോന്നു. എനിക്ക് 61 വയസ്സായി. എട്ടു വർഷമായി ഡെലിവറി പാർട്നറായി ജോലി ചെയ്യുന്നു. ഇതു പോയാൽ വേറെ മാർഗമില്ല. ’– കൊച്ചിയിലും പരിസരത്തുമായി ഡെലിവറി പാർട്നറായി പ്രവർത്തിക്കുന്ന പ്രസാദിന്റെ വാക്കുകൾ.

‘തുടക്കകാലത്ത് കമ്പനി നല്ല ഓഫറുകൾ തന്നിരുന്നു. ഇപ്പോൾ ജോലിസമയം മാറി; മെഡിക്കൽ ഇൻഷുറൻസിൽപോലും മാറ്റം വന്നു. ഡെലിവറി ഓട്ടത്തിനിടെ അപകടമുണ്ടായാൽ നിശ്ചിതതുകയുടെ ക്ലെയിം കിട്ടും. ബാക്കി തനിയെ കണ്ടെത്തണം. വാഹനത്തിന് എന്തെങ്കിലും സംഭവിച്ചാൽ കയ്യിൽനിന്നു കാശെടുക്കണം. നമ്മുടെയിടയിൽ നല്ല ആളുകളും ഏറെയുള്ളതുകൊണ്ടാണ് പിടിച്ചുനിൽക്കുന്നത്. മഴയിൽ കുടുങ്ങിയപ്പോൾ ‘അൽപം വൈകിയേക്കുമെന്ന്’ ഒരിക്കൽ കസ്റ്റമറോടു പറഞ്ഞു. ‘തിരക്കിടേണ്ട, മഴ മാറിയിട്ടു വന്നാൽ മതി. ഭക്ഷണം തണുത്താൽ ചൂടാക്കി കഴിച്ചോളാം’ എന്നു പറഞ്ഞ് അവർ ആശ്വസിപ്പിച്ചു.

∙ ഓട്ടം നിർത്തി; നിർത്തേണ്ടിവന്നു

‘ഓൺലൈൻ ഭക്ഷണ വിതരണരംഗത്തു വർ‌ഷങ്ങളോളം പ്രവർത്തിച്ചു. ഈ മേഖലയിലുള്ളവരുടെ ആവശ്യങ്ങൾക്കായി നടന്ന സമരങ്ങളിലും സജീവമായിരുന്നു. ദിവസംമുഴുവൻ ഓടിയാലും വീട്ടുചെലവിനുള്ളതു കിട്ടാതായതോടെ ജോലി മതിയാക്കി. അവധിദിവസങ്ങളിലും ഓടണം. ഡെലിവറി സ്ഥാപനത്തിന്റെ യൂണിഫോമിൽ മാളുകളിലും ഫ്ലാറ്റുകളിലുമൊക്കെ ഞങ്ങളെ കാണുന്നത് പല സെക്യൂരിറ്റി സ്റ്റാഫിനും അലർജിയാണ്. ചിലയിടത്തു പ്രധാന ലിഫ്റ്റിൽ കയറാൻ സമ്മതിക്കില്ല. മുൻപു ദിവസം ശരാശരി 1300 രൂപ കിട്ടിയിരുന്നു. പിന്നീട് കുറഞ്ഞു കുറഞ്ഞു വന്നു’ – കൊച്ചി കുമ്പളങ്ങി സ്വദേശി വിപിൻ വിൻസന്റിന്റെ വാക്കുകൾ.

∙ അപ്രഖ്യാപിത വിലക്ക്

കൊച്ചിയിലെ ചുട്ടുപൊള്ളുന്ന പകലിൽ 25 കിലോ പലചരക്കു സാധനങ്ങളുമായി കിലോമീറ്ററുകൾ സ്കൂട്ടർ ഓടിച്ചാണ് ആ ഡെലിവറി പാർട്നർ പാർപ്പിടസമുച്ചയത്തിലെത്തിയത്. 6 ടവറുകളുള്ള അവിടെ ആദ്യ ടവറിനു മുന്നിൽത്തന്നെ സെക്യൂരിറ്റി ജീവനക്കാരൻ തടഞ്ഞു. ഡെലിവറി പാർട്നർമാരെ വാഹനത്തിൽ അകത്തേക്കു കടത്തിവിടേണ്ടെന്നു തീരുമാനമുണ്ടത്രേ. ഡെലിവറി ജീവനക്കാരൻ സാധനങ്ങളും താങ്ങിയെടുത്ത് ആറാം ടവർ തേടി നടക്കേണ്ടിവന്നു. സെക്യൂരിറ്റിക്കാരും ഡെലിവറി ബോയ്സും തമ്മിലുള്ള തർക്കം കയ്യേറ്റത്തിലും പൊലീസ് കേസിലും വരെ എത്തിയ ധാരാളം സംഭവങ്ങളുണ്ട്. പുറത്തുനിന്നെത്തിയ ആളെന്ന നിലയിൽ നിയമനടപടി മിക്കപ്പോഴും ഡെലിവറിക്കാർക്ക് എതിരാകും. കൊച്ചിയിൽ ചില മാളുകളുടെ പ്രധാന കവാടങ്ങളിൽ ഓൺലൈൻ ഭക്ഷണ വിതരണ സ്ഥാപനങ്ങളുടെ യൂണിഫോം ധരിച്ചെത്തുന്നവർക്ക് അപ്രഖ്യാപിത വിലക്കാണെന്നു ഫുഡ് ഡെലിവറി പാർട്നർമാർ ചൂണ്ടിക്കാട്ടുന്നു.

∙ അന്നവുമായി പാഞ്ഞു; അപകടം കിടപ്പിലാക്കി

കേരള – തമിഴ്നാട് അതിർത്തിയിൽ കന്യാകുമാരി ജില്ലയിലെ പനച്ചമൂട്ടിൽനിന്നാണ് മാങ്കോട് മേലേ പാലുക്കുഴി ആർ.അനീഷ (29) തിരുവനന്തപുരത്ത് ഓൺലൈൻ ഭക്ഷണ വിതരണത്തിനെത്തിയിരുന്നത്. ദിവസേന നഗരത്തിലേക്കും തിരിച്ചു വീട്ടിലേക്കുമായി 100 കിലോമീറ്റർ സ്കൂട്ടർ ഓടിക്കണം. ഇതിനു പുറമേയാണ് ഭക്ഷണപ്പൊതിയുമായുള്ള ഓട്ടം. ഭക്ഷണത്തിന്റെ ഓർ‍ഡറുമായി സ്കൂട്ടറിൽ പോകുന്നതിനിടയിൽ പേരൂർക്കടയ്ക്കു സമീപം ടിപ്പർ ലോറി ഇടിച്ചു; 2023 ഡിസംബർ 23ന്. ഇടതുകാലിലൂടെ ലോറി കയറിയിറങ്ങി. മെഡിക്കൽ കോളജ് ആശുപത്രിയിൽ എത്തിച്ചെങ്കിലും കാൽ മുറിച്ചു മാറ്റണമെന്നു ഡോക്ടർമാർ പറഞ്ഞു.