‘മോദി ഫാഷിസ്റ്റാണെങ്കിൽ എകെജി സെന്റർ ഇവിടെയുണ്ടാകുമോ?’; 75ൽ പിണറായിക്ക് ഇളവ് വരുമോ? തരൂർ ഇടതിലേക്ക് ചായുമോ?– ഗോവിന്ദൻ പറയുന്നു

∙ മൂന്നാംലോക മഹായുദ്ധത്തെപ്പറ്റി ട്രംപ് സംസാരിച്ചു തുടങ്ങിയിട്ടുണ്ട്...?

അയാൾ സംസാരിച്ചു തുടങ്ങിയിട്ടുണ്ട്. ഒരു യുദ്ധത്തിലേക്ക് പോകുന്ന സാഹചര്യം സാമ്രാജ്യത്വത്തിന് ആവശ്യമാണ്. ട്രംപ് തീവ്ര വലതുപക്ഷത്തിന്റെ വക്താവാണ്. പക്ഷേ ഇന്ത്യൻ പരിതസ്ഥിതിയിൽ ഒരു യുദ്ധത്തിലേക്ക് പോകാവുന്ന സാമ്രാജ്യത്വ വൈരുധ്യമില്ല. ഞങ്ങളുടെ 22–ാം പാർട്ടി കോൺഗ്രസ് നടക്കുന്നത് നരേന്ദ്ര മോദി അധികാരത്തിൽ വന്ന ശേഷമാണ്. അപ്പോൾ നരേന്ദ്ര മോദി സർക്കാർ ഫാഷിസ്റ്റ് നിലപാടിൽ കാര്യങ്ങൾ കൈകാര്യം ചെയ്യാൻ ശ്രമിക്കുന്നുവെന്നാണ് ഞങ്ങൾ പറഞ്ഞത്. ഹിന്ദുത്വ പ്രവണ അടിസ്ഥാനപ്പെടുത്തിയായിരുന്നു ഞങ്ങളുടെ വിലയിരുത്തൽ. 23–ാം പാർട്ടി കോൺഗ്രസ് നടന്നപ്പോഴും ഞങ്ങൾ പറയുന്നത് ബിജെപിയാണ് മുഖ്യശത്രുവെന്നാണ്.

ഈ ഇന്ത്യയിലാദ്യമായിട്ട് സിപിഎമ്മാണ് ബിജെപി മുഖ്യശത്രുവെന്ന് പറഞ്ഞത്. 37% വോട്ടേ ബിജെപിക്കുള്ളൂവെന്ന് അന്ന് സിപിഎം ചൂണ്ടിക്കാട്ടി. ബാക്കി 67% ബിജെപി വിരുദ്ധരുടെ വോട്ടുകളാണ്. ഓരോ സംസ്ഥാനങ്ങളും ഓരോ യൂണിറ്റുകളായെടുത്ത് ആ സംസ്ഥാനത്ത് ബിജെപി വിരുദ്ധ വോട്ടുകൾ ഏകോപിപ്പിച്ച് ഏതു മണ്ഡലത്തിൽ ഏതു സ്ഥാനാർഥിയെന്ന് തീരുമാനിച്ച് മുന്നോട്ടുപോയാൽ ഇന്ത്യയിൽ ബിജെപിയെ തോൽപിക്കാമെന്നായിരുന്നു സിപിഎമ്മിന്റെ കാഴ്ചപാട്. അന്നു കോൺഗ്രസ് പോലും ഇതിനെ അംഗീകരിച്ചില്ല. അവർക്ക് പോലും പ്രതീക്ഷയുണ്ടായിരുന്നില്ല. പിന്നീട് അതിന്റെ ഉൽപനമായിട്ടാണ് ഇന്ത്യാ സഖ്യമുണ്ടായത്. ഇന്ത്യാ സഖ്യത്തിന്റെ ശിൽപി സീതാറാം യച്ചൂരിയാണെന്ന് അദ്ദേഹം അന്തരിച്ചപ്പോൾ രാഹുൽ ഗാന്ധിയാണ് പറഞ്ഞത്.

∙ ഇന്ത്യാ സഖ്യം രൂപപ്പെട്ടപ്പോൾ അതിൽ തുടക്കത്തിൽതന്നെ കല്ലുകടി സൃഷ്ടിച്ചത് സിപിഎമ്മല്ലേ?

ഞങ്ങൾ ഒരു പ്രശ്നവുമുണ്ടാക്കിയില്ല. ഒരു കമ്മിറ്റിയുണ്ടാക്കാൻ ശ്രമിച്ചപ്പോൾ അതു പറ്റില്ലെന്നാണ് ഞങ്ങൾ പറഞ്ഞത്. അങ്ങനെയൊരു കമ്മിറ്റിയുണ്ടാക്കാൻ പറ്റുമോ ഇന്ത്യയിൽ? കുറേ പാർട്ടികളെ ചേർത്തുവച്ച് ഇന്ത്യയിൽ ഒരു കമ്മിറ്റിയുണ്ടാക്കാൻ നോക്കിയാൽ നിലനിൽക്കുമോ?

∙ കോൺഗ്രസ് ഉൾപ്പെടെ സീറ്റ് വാഗ്ദാനം ചെയ്തിട്ടും സീതാറാം യച്ചൂരിയെ രാജ്യസഭയിലേക്ക് അയയ്ക്കാതിരുന്നതോ?

സീതാറാം യച്ചൂരി പാർട്ടിയുടെ ജനറൽ സെക്രട്ടറി ആയിരുന്നില്ലേ, അദ്ദേഹം രാജ്യസഭയിൽ പോയിട്ട് എന്താ കാര്യം. അവിടെ സംസാരിക്കാൻ വേറെയാളില്ലേ. പാർട്ടിക്ക് നേതൃത്വം കൊടുക്കാൻ ആളെ വേണ്ടേ. സിപിഎമ്മിന് ഒറ്റ ജനറൽ സെക്രട്ടറിയെ ഉള്ളൂ. കോൺഗ്രസിനെ പോലെ നൂറായിരം ജനറൽ സെക്രട്ടറിമാരില്ല.

∙ ഫാഷിസ്റ്റ് അജൻഡ നടപ്പാക്കാൻ രാജ്യത്ത് ശ്രമമില്ലേ?

കോ‍ർപറേറ്റുകളും ഹിന്ദുത്വ ശക്തികളും അമിതാധികാര വാഴ്ചയ്ക്ക് ശ്രമിക്കുന്നുണ്ട്. അതിൽ ആർഎസ്എസുമുണ്ട്. ലോകമെമ്പാടും തീവ്ര വലതുപക്ഷം ശക്തിപ്പെടുകയാണ്. പുതിയ സാമ്പത്തിക നയങ്ങളുമായി ബന്ധപ്പെട്ട് വലതുപക്ഷം വലിയ സാമ്പത്തിക പ്രതിസന്ധി അനുഭവിക്കുന്നുണ്ട്. ആ പ്രതിസന്ധിയുടെ ഉൽപന്നമാണ് നിയോ ഫാഷിസം. ആഗോളവൽക്കരണത്തിന്റെ ഏറ്റവും പ്രധാനപ്പെട്ട ഉൽപനമാണ് നിയോ ഫാഷിസം. സമ്പന്നർ കൂടുതൽ സമ്പന്നരാവുകയാണ്. ആ പ്രതിസന്ധിയെ മുതലെടുത്താണ് ലോകത്തിന്റെ വിവിധ ഭാഗങ്ങളിൽ തീവ്ര വലതുപക്ഷം വളരുന്നത്.

ഭരണകൂട വ്യവസ്ഥയെ കയ്യിലൊതുക്കി ജനാധിപത്യ അവകാശങ്ങളെ ഒഴിവാക്കുന്ന ക്ലാസിക്കൽ ഫാഷിസം പോലെയല്ല നിയോ ഫാഷിസം. വ്യവസ്ഥിതി ഇന്നു നിലനിൽക്കുന്നുണ്ട്. വ്യവസ്ഥിതിയുടെ ഭാഗമായി നടക്കുന്ന തിരഞ്ഞെടുപ്പിലൂടെ അവർ അധികാരത്തിൽ വരും. അധികാരത്തിൽ വന്നാൽ ഭരണഘടനാ സ്ഥാപനങ്ങളെ ഒന്നൊന്നായി അവരുടെ പിടിയിൽ കൊണ്ടുവരും. പടിപടിയായി ഇന്ത്യയെ ഹിന്ദുത്വ രാജ്യമാക്കാനാണ് ഇപ്പോഴത്തെ ശ്രമം. നിയോ ഫാഷിസത്തിന്റെ പുതിയ രീതിയാണിത്. എന്നാൽ നിയോ ഫാഷിസം ഇന്ത്യയിൽ വന്നിട്ടില്ല. ഫാഷിസ്റ്റ് പ്രവണതയേ ഉള്ളൂ. ഇതൊന്നും മനസ്സിലാക്കാതെയാണ് പാർട്ടി എന്തോ തെറ്റു ചെയ്തുവെന്ന് പറഞ്ഞുപരത്തുന്നത്.

∙ എഐയുമായി ബന്ധപ്പെട്ട ചർച്ചകളും സംസ്ഥാന സമ്മേളനത്തിനു മുന്നോടിയായി വലിയ രീതിയിൽ നടന്നിട്ടുണ്ടല്ലോ. പ്രചാരണത്തിന്റെ ഭാഗമായി ഇ.കെ.നായനാരുടെ എഐ വിഡിയോ ഉപയോഗിച്ചിട്ടുണ്ട്..?

എഐ എന്നു പറയുന്നത് ലോകത്ത് ഇപ്പോൾ കണ്ടെത്തിയതിൽ ഏറ്റവും അവസാനത്തെ സാങ്കേതിക വിദ്യയാണ്. ലോകത്തുണ്ടാകുന്ന ശാസ്ത്രസാങ്കേതിക വിദ്യയിലടക്കമുള്ള മാറ്റങ്ങളെ മുഴുവൻ ഉൾക്കൊള്ളാൻ കഴിയുന്ന വിശാലതയുള്ള ഒരു ദർശനമാണ് മാർക്സിസം. സങ്കുതിചമല്ല മാർക്സിസം, കാലഹരണ ദോഷമില്ല. പക്ഷേ മറ്റെല്ലാ ദർശനങ്ങൾക്കും കാലഹരണ ദോഷമുണ്ട്. എഐയെ പാർട്ടി ഉൾക്കൊള്ളും. എന്നാൽ വർഗപരമായി പരിശോധിക്കുമ്പോൾ ഉൽപാദന വിതരണഘടന പൂർണമായും മുതലാളിത്തത്തിന്റെ ഭാഗമായി വരികയാണ്.

ഇന്ത്യയിൽ ഒരു ശതമാനത്തിന്റെ കയ്യിൽ സമ്പത്ത് കേന്ദ്രീകരിക്കുകയാണ്. അങ്ങനെയൊരു സമൂഹത്തിൽ മുതലാളിത്തത്തിന്റെ കയ്യിൽ എഐ പോലുള്ള ഉൽപാദന ഉപാധികൾ എത്തപ്പെട്ടാൽ ആ സമ്പത്ത് മുഴുവൻ കോർപറേറ്റുകളുടെ കയ്യിലാകും. നേരെ മറിച്ച് ഇതു സമൂഹത്തിന്റെ ഭാഗമായാൽ സമ്പത്ത് സമൂഹത്തിന്റെ കയ്യിലാകും. സമൂഹത്തിന്റെ കയ്യിൽ എഐ വന്നാൽ‌ അധ്വാനത്തിന്റെ സമയം കുറയും, വരുമാനം കൂടും. അതു സാമൂഹിക പരിവർത്തനത്തിലേക്ക് നീങ്ങും. പുതിയ സാമൂഹിക വ്യവസ്ഥ ലോകത്ത് രൂപപ്പെട്ട് വരും. അങ്ങനെ എഐ സോഷ്യലിസത്തിലേക്ക് വഴിയൊരുക്കും

∙ ലോക്സഭാ തിര‍ഞ്ഞെടുപ്പിൽ തൃശൂരിലൂടെ ബിജെപി അക്കൗണ്ട് തുറന്നു. ഇനി നിയമസഭയിലേക്ക് കൂടുതൽ‌ സീറ്റുകളാണ് അവരുടെ ലക്ഷ്യം. ബിജെപിയുടെ വളർച്ച തടയാൻ സംസ്ഥാന സമ്മേളനത്തിൽ പുതിയ അടവുകൾക്ക് രൂപംനൽകുമോ?

തൃശൂരിൽ ബിജെപി എങ്ങനെയാണ് ജയിച്ചത്? കോൺഗ്രസിന്റെ 86,000 വോട്ട് ബിജെപിയിലേക്ക് പോയി. നേമത്തും അതായിരുന്നു സ്ഥിതി. അതു പിന്നെ സിപിഎം പൂട്ടിയില്ലേ. അതുപോലെ തൃശൂരിലും പൂട്ടും. 33 സീറ്റ് കിട്ടിയാൽ കേരളം ഭരിക്കുമെന്നാണ് ബിജെപി പറയുന്നത്. അതൊന്നും നടക്കില്ല. അവസാനം നടന്ന തദ്ദേശ ഉപതിരഞ്ഞെടുപ്പുകളിൽ 17 സീറ്റുകളിൽ എൽഡിഎഫാണ് ജയിച്ചത്. കോൺഗ്രസിന്റെ ഒരു സീറ്റിൽ എസ്ഡിപിഐയാണ് വിജയിച്ചത്. ജമാ അത്തെ ഇസ്‌ലാമിയും എസ്ഡിപിഐയും ലീഗും കോൺഗ്രസും ചേർന്ന് കേരളത്തിൽ ഒരൊറ്റ മുന്നണിയായി പ്രവർത്തിക്കുകയാണ്. ഈ ഐക്യം കോൺഗ്രസാണ് ഉണ്ടാക്കുന്നത്. ഒരു ഭാഗത്ത് അവർ ബിജെപിയുമായി ബന്ധമുണ്ടാക്കും. മറുഭാഗത്ത് തീവ്ര ഹിന്ദുത്വ വിരുദ്ധരായി നടക്കുന്ന ന്യൂനപക്ഷ വർഗീയ നിലപാടുകൾ ഉള്ളവർക്കൊപ്പവും ചേരും.

∙ സംസ്ഥാനത്ത് കോൺഗ്രസ് ദുർബലപ്പെടുന്നു എന്നാണോ വിലയിരുത്തൽ?

ഒരു സംശയവുമില്ലല്ലോ. ഞങ്ങൾ മൂന്നാംവട്ടവും അധികാരത്തിൽ വരും. ഇടതുപക്ഷം ചെയ്യുന്നത് നല്ല കാര്യങ്ങളാണെന്ന് ശശി തരൂർ പറഞ്ഞല്ലോ. 1.52 ലക്ഷം കോടിയുടെ പുതിയ നിക്ഷേപമാണ് കേരളത്തിലേക്ക് വരാനുള്ളത്. വികസിത മുതലാളിത്ത രാജ്യങ്ങളിലെ ജനങ്ങളുടെ ജീവിത നിലവാരത്തിലേക്ക് കേരളത്തിലെ ജനങ്ങളുടെ ജീവിത നിലവാരം മാറും. ഇരുപതു വർഷത്തിനുള്ളിൽ അതു നടക്കും. അതാണ് എൽഡിഎഫ് ലക്ഷ്യംവയ്ക്കുന്ന നവകേരളം. അക്കാര്യങ്ങളടക്കം സംസ്ഥാന സമ്മേളനത്തിൽ വിശദമായി ചർച്ച ചെയ്യും.

∙ പലപ്പോഴും പ്രതിപക്ഷത്തെക്കാൾ‌ സിപിഎം– സർക്കാർ നിലപാടുകളെ മൂർച്ചയോടെ വിമർശിക്കുന്നത് സിപിഐ ആണല്ലോ?

സിപിഎം വേറൊരു പാർട്ടി, സിപിഐ വേറൊരു പാർട്ടി. ഒരു മൂർച്ചയുമില്ല. രണ്ടും ഇടതുപക്ഷത്തിന്റെ ഭാഗമായി നിൽക്കുന്ന പാർട്ടിയാണ്. എന്തെങ്കിലും സംശയമുണ്ടെങ്കിലും അതൊക്കെ തീർത്താണ് എൽഡിഎഫ് മുന്നോട്ടുപോകുന്നത്. അതിലൊരു ബുദ്ധിമുട്ടുമില്ല. പാലക്കാട്ടെ ഡിസ്റ്റിലറി വിവാദം സ്പിരിറ്റ് ലോബിക്ക് വേണ്ടി പ്രതിപക്ഷം നടത്തുന്ന കളിയാണ്.

∙ കെ.വി. തോമസിനെപോലെ ശശി തരൂർ എൽഡിഎഫിലേക്ക് എത്തുമെന്ന പ്രതീക്ഷയുണ്ടോ?

അതൊക്കെ അദ്ദേഹത്തോട് ചോദിക്കണം. ശശി തരൂർ എന്താവുമെന്നത് നമുക്ക് പ്രശ്നമുള്ള കാര്യമല്ല. പക്ഷേ കേരളം വികസന പാതയിലാണെന്ന് തരൂർ പറഞ്ഞിട്ടുണ്ട്. കേരളത്തിന്റെ വളർച്ച പൂർണമായി പ്രതിപക്ഷം ഉൾക്കൊള്ളണം. ഞങ്ങൾ പറഞ്ഞുകൊണ്ടിരുന്നതാണ് തരൂർ ഇപ്പോൾ‌ പറഞ്ഞത്.