തുറന്ന പോരിന് തെക്കും വടക്കും; മുന്നിൽനിന്ന് നയിക്കാൻ സ്റ്റാലിൻ; മണ്ഡല പുനർനിർണയത്തിൽ ദക്ഷിണേന്ത്യയ്ക്ക് നഷ്ടമാകുന്നത്...

അതിന്റെ മുൻപന്തിയിൽ തന്നെ തമിഴ്നാടുണ്ടാകുമെന്നതിലും സംശയമില്ല. ഇന്ത്യാ മുന്നണിയിലെ കോൺഗ്രസ് ഉൾപ്പെടെ പല കക്ഷികളുമുണ്ടായിരുന്ന യോഗത്തിൽ മുന്നണിയുടെ ഭാഗമല്ലാത്ത ബിജെഡി, ബിആർഎസ്, ശിരോമണി അകാലി ദൾ എന്നിവയുടെ നേതാക്കൾ കൂടി പങ്കെടുത്തെന്നതു വിഷയം വെറും രാഷ്ട്രീയക്കളിയുടെ ഭാഗമല്ലെന്നതിന്റെ തെളിവായി കാണാം.   

∙ എന്തിന് മണ്ഡല പുനർനിർണയം ?

ഓരോ സംസ്ഥാനത്തെയും ലോക്സഭാ, നിയമസഭാ മണ്ഡലങ്ങളുടെ എണ്ണവും അതിരുകളും നിശ്ചയിക്കുന്ന പ്രക്രിയയാണ് മണ്ഡല പുനർനിർണയം. ഓരോ സെൻസസിനു ശേഷവും മണ്ഡലപുനർനിർണയം നടത്തണമെന്ന് ഭരണഘടനയുടെ 82–ാം വകുപ്പിൽ നിർദേശിക്കുന്നുണ്ട്. 1951 മുതൽ 71 വരെ നടന്ന 3 സെൻസസുകളുടെ അടിസ്ഥാനത്തിൽ 543 സീറ്റുകളായി നിശ്ചയിച്ചു. ഇതിനിടെ, ജനസംഖ്യ വർധിപ്പിച്ചു സീറ്റുകളുടെ എണ്ണം കൂട്ടാൻ പല സംസ്ഥാനങ്ങളും ശ്രമം നടത്തിയിരുന്നു. ഇതു രാജ്യത്തിന്റെ ജനസംഖ്യാ നിയന്ത്രണ പരിപാടിക്കു തിരിച്ചടിയാകുമെന്ന് ഉറപ്പിച്ചതോടെ 1971ലെ സെൻസസോടെ മണ്ഡല പുനർനിർണയ നടപടികൾ മരവിപ്പിച്ചു.

ഭരണഘടന 2 തവണ ഭേദഗതി ചെയ്ത് ഈ മരവിപ്പിക്കൽ 2026 വരെ നീട്ടി. ഈ കാലാവധി ഇപ്പോൾ അവസാനിക്കാൻ പോകുന്നെന്നതാണ് ദക്ഷിണേന്ത്യൻ സംസ്ഥാനങ്ങളുടെ ആശങ്ക. തുറന്ന മനസ്സോടെയുള്ള സുതാര്യമായ ചർച്ചയാണ് ഇക്കാര്യത്തിൽ ആവശ്യമെന്നു നേതാക്കൾ പറയുന്നു. സംസ്ഥാനങ്ങളുടെ ആവശ്യങ്ങളും ആശങ്കകളും പരിഹരിക്കപ്പെടണം. ഇക്കാര്യത്തിൽതിടുക്കത്തിലുള്ള തീരുമാനങ്ങൾ ഒരു പക്ഷേ, വീണ്ടും രാജ്യത്ത് പ്രാദേശികവാദ നീക്കങ്ങൾക്കു വളരാനുള്ള വഴി തുറക്കുമെന്ന ആശങ്കയുമുണ്ട്.

മണ്ഡലപുനർനിർണയത്തിനെതിരെ നിയമസഭകളിൽ പ്രമേയം പാസാക്കും. പ്രത്യേക സമിതി പ്രധാനമന്ത്രിയെയും രാഷ്ട്രപതിയെയും നേരിൽക്കണ്ട് പ്രമേയം കൈമാറാനും തീരുമാനമായി. മണ്ഡലപുനർനിർണയത്തിനു തമിഴ്നാട് എതിരല്ലെന്നും നീതിയുക്തമായി ഇതു നടത്തണമെന്നാണ് ആവശ്യപ്പെടുന്നതെന്നും സ്റ്റാലിൻ പറഞ്ഞു. സംസ്ഥാനത്തിന്റെ ശബ്ദം അടിച്ചമർത്തപ്പെട്ടാൽ പലർക്കും മണിപ്പുരിന്റെ അവസ്ഥയുണ്ടാകുമെന്നും അദ്ദേഹം പറഞ്ഞു. പ്രഥമ സംയുക്ത കർമ സമിതി (ജെഎസി) യോഗത്തിൽ ഏറ്റവും കൂടുതൽ പ്രതിനിധികൾ പങ്കെടുത്തതു കേരളത്തിൽ നിന്നായതു വഴി, മണ്ഡല പുനർനിർണയ നീക്കത്തിൽ ഏറ്റവും കൂടുതൽ ശബ്ദമുയർത്താനും കേരളത്തിനായി. ഇപ്പോഴത്തെ നീക്കമനുസരിച്ച് മണ്ഡല പുനർനിർണയം നടത്തിയാൽ ബിജെപി അംഗങ്ങളുടെ എണ്ണം കുത്തനെ വർധിക്കുമെന്നും അതിനായുള്ള രഹസ്യ അജൻഡയാണു നടപ്പാക്കാൻ ശ്രമിക്കുന്നതെന്നും കേരളത്തിൽ നിന്നുള്ള നേതാക്കൾ ചൂണ്ടിക്കാട്ടി.  

∙ ആശങ്ക വെറുതെയോ...?

മണ്ഡല പുനർനിർണയത്തിൽ ഒരു സംസ്ഥാനത്തോടും അനീതി കാണിക്കില്ലെന്ന് പ്രധാനമന്ത്രി നരേന്ദ്ര മോദി കഴിഞ്ഞ വർഷം വ്യക്തമാക്കിയിരുന്നതായി കേന്ദ്രമന്ത്രി നിർമലാ സീതാരാമൻ പറയുന്നു.  മണ്ഡലപുനർനിർണയം നടക്കണമെങ്കിൽ സെൻസസ് നടത്തേണ്ടതുണ്ടെന്നു കേന്ദ്ര ആഭ്യന്തരമന്ത്രി അമിത് ഷാ പറഞ്ഞു. തുടർന്ന് ഒരു ഡീലിമിറ്റേഷൻ കമ്മിഷൻ രൂപീകരിക്കും, അത് എല്ലാ സംസ്ഥാനങ്ങളും സന്ദർശിച്ച് ചർച്ചകൾ നടത്തും. അതൊരു നീണ്ട പ്രക്രിയയാണ്. ഇതെല്ലാം സംഭവിക്കുന്നതിന് മുമ്പ് തന്നെ ഡിഎംകെ ഈ പ്രക്രിയയ്ക്കെതിരെ സംസാരിക്കുകയാണെന്നും നിർമല കുറ്റപ്പെടുത്തി. ഡീലിമിറ്റേഷൻ കമ്മിഷൻ മുമ്പാകെ തമിഴ്നാടിന് അവരുടെ ആശങ്കകൾ അറിയിക്കാമെന്നും അവർ പറഞ്ഞു. ജനസംഖ്യ ഒരു മാനദണ്ഡം മാത്രമാണെന്നും നിരവധി ഘടകങ്ങളുണ്ടെന്നും നിർമല സീതാരാമൻ പറയുന്നു.