നോൺ–വെജിറ്റേറിയൻ ഭക്ഷണങ്ങൾക്ക് പണം ചെലവഴിക്കുന്നതിൽ കേരളം ഒന്നാമത്

ന്യൂഡൽഹി∙ ഭക്ഷണത്തിനുള്ള ചെലവിൽ നോൺ–വെജിറ്റേറിയൻ ഭക്ഷണങ്ങൾക്കും പഴങ്ങൾക്കും ഉയർന്ന വിഹിതം നീക്കിവയ്ക്കുന്ന സംസ്ഥാനങ്ങളിൽ കേരളം ഒന്നാമത്. നാഷനൽ സ്റ്റാറ്റിസ്റ്റിക്കൽ ഓഫിസിന്റെ (എൻഎസ്ഒ) ഗാർഹിക ഉപഭോഗ സർവേ റിപ്പോർട്ടിലാണ് വിവരങ്ങളുള്ളത്.

കേരളത്തിന്റെ ഗ്രാമീണ മേഖലകളിൽ 23.5% തുകയാണ് മുട്ട, മാംസം, മത്സ്യം എന്നിവയ്ക്കായി മാറ്റിവയ്ക്കുന്നത്. നഗരങ്ങളിൽ ഇത് 19.8 ശതമാനവും. രണ്ടാമത് അസമാണ്, അവരുടെ ഭക്ഷണച്ചെലവിൽ 17 ശതമാനവും (നഗരം) 20 ശതമാനവുമാണ് (ഗ്രാമം) നോൺ–വെജ് ഇനങ്ങൾ. ഗ്രാമീണമേഖലയിൽ ഏറ്റവും കുറവ് ഹരിയാനയിലും (2.1%) നഗരമേഖലകളിൽ ഏറ്റവും കുറവ് രാജസ്ഥാനിലുമാണ് (2.3%).

പഴങ്ങൾ വാങ്ങാനായി കേരളത്തിലെ ഗ്രാമമേഖലകൾ 11.3% തുക നീക്കിവയ്ക്കുമ്പോൾ നഗരമേഖലകളിൽ ഇത് 12%. അതേസമയം, പച്ചക്കറി വാങ്ങുന്നതിന് ഏറ്റവും കുറവ് വിഹിതം മാറ്റിവയ്ക്കുന്ന സംസ്ഥാനവും കേരളമാണ്. ഗ്രാമം: 8.6%, നഗരം: 7.6%.

മെഡിക്കൽ ചെലവുകളിലും കേരളം ഒന്നാമത്

ഭക്ഷ്യേതര ഇനങ്ങളിൽ മെഡിക്കൽ ആവശ്യങ്ങൾക്ക് ഏറ്റവും കൂടുതൽ തുക നീക്കിവയ്ക്കുന്നത് കേരളത്തിലാണ്. ഗ്രാമങ്ങളിൽ ഇത് 17.9%. നഗരങ്ങളിൽ 14.4%. ഗതാഗതച്ചെലവുകളിലും കേരളമാണ് മുന്നിൽ. ഗ്രാമങ്ങളിൽ 18.9%. നഗരങ്ങളിൽ 16.6%.

ഒറ്റനോട്ടത്തിൽ

∙ കേരളത്തിലെ നഗരമേഖലകളിൽ ആളുകൾ നോൺ–വെജ് ഭക്ഷണത്തിനെക്കാൾ കൂടുതൽ പണം ചെലവഴിക്കുന്നത് പ്രോസസ്ഡ് ഫുഡിനും പാനീയങ്ങൾക്കുമാണ്. ഗ്രാമമേഖലകളിൽ നോൺ–വെജ് ഭക്ഷണങ്ങൾ തന്നെ മുന്നിൽ.

∙ രാജ്യത്തെ ഗ്രാമീണമേഖലകളിൽ ഓരോ കുടുംബത്തിന്റെയും പ്രതിമാസ ശരാശരി ചെലവിൽ ധാന്യങ്ങൾക്കുള്ള നീക്കിയിരിപ്പ് ഗണ്യമായി കുറഞ്ഞു. 1999ൽ 22.16 ശതമാനമായിരുന്നത് കഴിഞ്ഞ വർഷം 4.89 ശതമാനമായി കുറഞ്ഞു.

ഭക്ഷ്യവസ്തുക്കൾക്കായി കേരളം ചെലവഴിക്കുന്നത്

ഇനങ്ങൾ ഗ്രാമം നഗരം

ധാന്യങ്ങൾ 8% 7.2%

പാലും പാലുൽപ്പന്നങ്ങളും 9.7% 9.6%

പച്ചക്കറി 8.6% 7.6%

പഴങ്ങൾ 11.3% 12%

മുട്ട, മത്സ്യം, 

മാംസം 23.5% 19.8%

പാനീയങ്ങൾ, പ്രോസസ്ഡ് ഫുഡ് 21.2% 28.4%

മറ്റുള്ളവ 17.7% 15.3%