ദുബായ്∙ ബാറ്റ്സ്മാൻ ഉയർത്തി അടിച്ച പന്ത് ഫീൽഡർമാരുടെ തലയ്ക്കു മുകളിലൂടെ പറന്ന് ഗാലറിയിൽ ചെന്നു വീഴുന്നു. തകർപ്പനൊരു സിക്സ് കണ്ട ആവേശത്തിൽ ആരാധകരും ബാറ്റിങ് ടീമും ആഹ്ലാദിച്ച് തിമിർക്കുമ്പോൾ അംപയർ അതാ ബാറ്റ്സ്മാൻ പുറത്തായതായി വിധിക്കുന്നു. ഇതെന്താണ് സംഭവമെന്ന സംശയം എല്ലാവരുടെയും മുഖത്ത്!
ദുബായിൽ നടക്കുന്ന പാക്കിസ്ഥാൻ സൂപ്പർ ലീഗിലാണ് രസകരമായ സംഭവമുണ്ടായത്. പെഷവാർ സാൽമിയും ക്വറ്റ ഗ്ലാഡിയേറ്റേഴ്സും തമ്മിലായിരുന്നു മൽസരം. ടോസ് നേടിയ പെഷവാർ സാൽമി ക്വറ്റയെ ബാറ്റിങ്ങിന് അയച്ചു. ക്വറ്റ ഇന്നിങ്സിലെ 20–ാം ഓവർ ബോൾ ചെയ്യാനെത്തിയത് പാക്കിസ്ഥാൻ താരം കൂടിയായ വഹാബ് റിയാസ്. ക്രീസിൽ മറ്റൊരു പാക്ക് താരം അൻവർ അലി.
മൂളിപ്പറന്നെത്തിയ ആദ്യ പന്ത് അൻവർ അലി ലോങ് ഓണിലൂടെ ഗാലറിയിലെത്തിച്ചു. ക്വറ്റ ആരാധകർ സിക്സ് ആഘോഷിക്കുന്നതിനിടെ അംപയർ ഔട്ട് വിളിച്ചു. പന്ത് സിക്സ് പറത്താനുള്ള ശ്രമത്തിനിടെ അൻവർ അലിയുടെ കാൽ സ്റ്റംപിൽ തട്ടി ബെയ്‌ൽ താഴെവീണിരുന്നു. ഇതോടെയാണ് അംപയർ ഔട്ട് വിളിച്ചത്. എന്തായാലും മൽസരം പെഷവാർ സാൽമി ജയിച്ചു. ആദ്യം ബാറ്റുചെയ്ത് ക്വറ്റ എട്ടു വിക്കറ്റ് നഷ്ടത്തിൽ 141 റൺസെടുത്തപ്പോൾ പെഷവാർ രണ്ടു പന്തു ബാക്കിനിൽക്കെ അഞ്ച് വിക്കറ്റ് നഷ്ടത്തിൽ ലക്ഷ്യം മറികടന്നു.
