തുമ്പിയെപ്പോലെ പറക്കും, ശത്രുവിനെ പറപ്പിക്കും; ഇതാ ഇന്ത്യ ‘കാത്തിരുന്ന’ കരുത്തൻ!

ഈ വർഷം മാർച്ചിൽ മോദിയുടെ അധ്യക്ഷതയിൽ ചേർന്ന സുരക്ഷാകാര്യ മന്ത്രിതല സമിതി 15 എൽസിഎച്ച് കോപ്റ്ററുകൾ പ്രതിരോധ സേനകൾക്കു ലഭ്യമാക്കാൻ അനുമതി നൽകി; ഇതിനായി 3887 കോടി രൂപ അനുവദിച്ചു. കോപ്റ്ററുകൾക്ക് ആവശ്യമായ അടിസ്ഥാന സൗകര്യങ്ങൾ സജ്ജമാക്കാൻ 377 കോടിയും അനുവദിച്ചു. 15 കോപ്റ്ററുകളിൽ 10 എണ്ണം വ്യോമസേനയ്ക്കുള്ളതാണ്. അഞ്ചെണ്ണം കരസേനയ്ക്കും.

കഴിഞ്ഞ ദിവസം ജോധ്പുർ താവളത്തിൽ 4 കോപ്റ്ററുകളാണു വ്യോമസേനയ്ക്കു ലഭിച്ചത്. ബാക്കി ആറെണ്ണം അടുത്ത വർഷത്തോടെ ലഭിക്കും. ഈ വർഷം സെപ്റ്റംബറിൽ കരസേനയുടെ ബെംഗളൂരു താവളത്തിൽ ഒരു കോപ്റ്റർ ലഭ്യമാക്കി. ബാക്കി നാലെണ്ണം ഈ മാസം അവസാനത്തോടെ ലഭിക്കും. 

∙ മലനിരകളിലെ പോരാളി

മലനിരകൾക്കു മുകളിലേക്കു പറന്നു കയറി ശത്രുസേനയെ ലക്ഷ്യമിടാനാവുമെന്നതാണ് പ്രചണ്ഡിന്റെ ഏറ്റവും വലിയ സവിശേഷത. 16,000 അടി ഉയരത്തിൽ ആയുധങ്ങൾ, ഇന്ധനം എന്നിവ വഹിച്ച് ലാൻഡ് ചെയ്യാനും പറന്നുയരാനും കെൽപുള്ള ലോകത്തിലെ ഏക കോപ്റ്ററാണിതെന്ന് നിർമാതാക്കളായ എച്ച്എഎൽ അവകാശപ്പെടുന്നു. 

∙ ശത്രുവിനെ വിറപ്പിക്കുന്ന ആയുധശേഷി

ആക്രമണസജ്ജമായ മിസൈലുകൾ, റോക്കറ്റുകൾ, യന്ത്രത്തോക്കുകൾ എന്നിവ വഹിച്ചാണ് പ്രചണ്ഡ് പറക്കുക. ഹെലിന ടാങ്ക് വേധ മിസൈൽ, ശത്രുസേനയുടെ മിസൈലുകൾ, വിമാനങ്ങൾ എന്നിവ തകർക്കുന്ന ഫ്രഞ്ച് നിർമിത എംബിഡിഎ മിസൈൽ, റോക്കറ്റുകൾ, യന്ത്രത്തോക്കുകൾ എന്നിവ പ്രചണ്ഡിലുണ്ട്. പൈലറ്റിനു പിന്നിലിരിക്കുന്ന കോ പൈലറ്റിനാണ് ആക്രമണങ്ങൾ നടത്തുന്നതിന്റെ ചുമതല. അത്യാധുനിക സൗകര്യങ്ങളുള്ള ഹെൽമറ്റാണ് കോ പൈലറ്റ് ധരിക്കുക. കോ പൈലറ്റ് എവിടേക്കു നോക്കുന്നോ അവിടേക്ക് യന്ത്രത്തോക്ക് ഉന്നം പിടിക്കും. ഈ ‘ഹെൽമറ്റ് മൗണ്ടട് ഡിസ്പ്ലേ’ വഴി ശത്രുവിനെതിരെ ഞൊടിയിടയിൽ ഉന്നംപിടിച്ച് ആക്രമിക്കാൻ സാധിക്കും. 

ശത്രുസേനയുടെ വിമാനങ്ങൾ, ഡ്രോണുകൾ എന്നിവ തകർക്കാനുള്ള ദൗത്യത്തെ ‘ഡെഡ്’ എന്നാണു വിശേഷിപ്പിക്കുന്നത് – ‘ഡിസ്ട്രക്‌ഷൻ ഒാഫ് എനിമി എയർ ഡിഫൻസ്’ എന്നതിന്റെ ചുരുക്കപ്പേരാണിത്. ഇതിനു പുറമെ ഭീകരവിരുദ്ധ പ്രവർത്തനങ്ങൾ, തിരച്ചിൽ – രക്ഷാപ്രവർത്തനം (സേർച്ച് ആൻഡ് റെസ്ക്യു) എന്നിവയ്ക്കും പ്രചണ്ഡ് ഉപയോഗിക്കാം. 

∙ അതിർത്തി കാക്കും

പാക്ക്, ചൈന എന്നിവയുമായുള്ള അതിർത്തി മേഖലകളിലാവും പ്രചണ്ഡ് നിലയുറപ്പിക്കുക. കിഴക്കൻ ലഡാക്ക് അതിർത്തിയിൽ ചൈനയുമായി അതിർത്തി സംഘർഷം തുടരുന്ന സാഹചര്യത്തിൽ സേനയിലേക്കുള്ള പ്രചണ്ഡിന്റെ വരവ് ഇന്ത്യയ്ക്കു കരുത്തു പകരും. മിസൈലുകൾ, റോക്കറ്റുകൾ എന്നിവ വഹിച്ച് സിയാച്ചിനിലേക്കു വരെ പറന്നെത്തി ആക്രമണങ്ങൾ നടത്താൻ കെൽപുള്ള പ്രചണ്ഡിനു പാക്കിസ്ഥാനെയും വിറപ്പിക്കാൻ സാധിക്കും. 65 കോപ്റ്ററുകൾ കൂടി ഭാവിയിൽ വ്യോമസേനയ്ക്കു ലഭ്യമാക്കും. കരസേനയ്ക്ക് 95 എണ്ണവും. കോപ്റ്റർ വിദേശ രാജ്യങ്ങളിലേക്ക് കയറ്റുമതി ചെയ്യുന്നതും ഇന്ത്യയുടെ പരിഗണനയിലുണ്ട്. മലേഷ്യ, തായ്‌ലൻഡ്, വിയറ്റ്നാം, അംഗോള, ഈജിപ്ത്, ഇന്തൊനീഷ്യ, ഇക്വഡോർ, നൈജീരിയ എന്നിവ കോപ്റ്റർ വാങ്ങാൻ താൽപര്യമറിയിച്ചിട്ടുണ്ട്. 

English Summary: Explained The Indian-made LCH ‘Prachand’ and its significance