നോട്ട് പിൻവലിച്ചതിനു ശേഷം ബിറ്റ്‌കോയിൻ പോലുള്ള ക്രിപ്റ്റോ കറൻസികൾക്ക് ഇന്ത്യയിൽ പ്രചാരം വർധിച്ചതിനപ്പുറത്ത് വിവിധ രംഗങ്ങളിൽ ബ്ലോക്ക്‌ചെയിൻ സാങ്കേതികവിദ്യ രംഗപ്രവേശം ചെയ്തു കഴിഞ്ഞു. സ്റ്റേറ്റ് ബാങ്ക് ഓഫ് ഇന്ത്യയുൾപ്പെടെ ഇന്ത്യയിലും ഗൾഫിലുമുള്ള 27 പ്രമുഖ ബാങ്കുകൾക്കു പങ്കാളിത്തമുള്ള ബാങ്ക്‌ചെയിൻ സംവിധാനം കെവൈസി വിവരങ്ങളുടെ വിശകലനത്തിനും കൈമാറ്റത്തിനുമാണ് പ്രധാനമായും ബ്ലോക്ക് ചെയിൻ ഉപയോഗിക്കുന്നത്.
സ്റ്റേറ്റ് ബാങ്ക് ഓഫ് ഇന്ത്യ ഇതിനോടകം ബാങ്ക് ചെയിൻ അധിഷ്ഠിത കെവൈസി സംവിധാനത്തിലേക്കു മാറിക്കഴിഞ്ഞതായാണ് വിവരം. പ്രൈംടൈം ടെക്നോളജീസ് എന്ന സ്റ്റാർട്ടപ്പിന്റെയും ഇന്റെലിന്റെയും മൈക്രോസോഫ്റ്റിന്റെയും സഹകരണത്തോടെയാണ് ബാങ്ക്‌ചെയിൻ പ്രവർത്തിക്കുന്നത്. ധനകാര്യ സ്ഥാപനമായ ബജാജ് ഫിൻസേർവ് ട്രാവൽ ഇൻഷുറൻസ് രംഗത്ത് ഇതിനോടകം ബ്ലോക്ക്‌ചെയിൻ സാങ്കേതികവിദ്യ ഉപയോഗിക്കാനാരംഭിച്ചിട്ടുണ്ട്.
പോളിസിയെടുത്തയാൾ ക്ലെയിം ചെയ്യുന്നതിനു മുൻപ് തന്നെ തുക അക്കൗണ്ടിലെത്തും വിധം വേഗം ഇടപാടുകൾ നടക്കുന്നു. ഉദാഹരണത്തിന് വിമാനം താമസിച്ചതു മൂലമുണ്ടായ കഷ്ടനഷ്ടങ്ങൾക്ക് ട്രാവൽ ഇൻഷുറൻസ് പോളിസിയെടുത്തയാൾ ക്ലെയിം ചെയ്യും മുൻപ് തന്നെ വിമാനം താമസിച്ച വിവരം ലഭിക്കുന്ന ബ്ലോക്ക്‌ചെയിൻ സംവിധാനം പോളിസിയെടുത്തിട്ടുള്ള, ആ വിമാനത്തിൽ സഞ്ചരിക്കുന്ന എല്ലാവർക്കും അർഹമായ ഇൻഷുറൻസ് തുക നൽകിക്കഴിഞ്ഞിരിക്കും.
റീട്ടെയിൽ കച്ചവടക്കാർക്കു ബിൽ ഡിസ്കൗണ്ട് ചെയ്തു നൽകാൻ ബജാജ് ഇലക്ട്രിക്കൽസ് ബ്ലോക്ക് ചെയിൻ സംവിധാനം ഉപയോഗിച്ചു തുടങ്ങിയിട്ട് ഒരു വർഷത്തിലേറെയായി. ഭൂമി റജിസ്ട്രേഷൻ, ആദായനികുതി തുടങ്ങി അനേകം രംഗങ്ങളിൽ ബ്ലോക്ക് ചെയിൻ സംവിധാനം നടപ്പിലാക്കാൻ വിവിധ സ്റ്റാർട്ടപ്പുകളുടെ നേതൃത്വത്തിൽ പരിശ്രമം നടക്കുന്നുമുണ്ട്. ബ്ലോക്ക്‌ചെയിൻ വരുന്നതോടെ ഇടപാടുകളിലെ നിഗൂഢത ഇല്ലാതാവുകയും തട്ടിപ്പുകൾ അവസാനിക്കുകയും ചെയ്യും. സർക്കാർ സംവിധാനത്തിന്റെ കാലതാമസം പൂർണമായും ഇല്ലാതാവുകയും ചെയ്യും.
കേരളം ഭൂരേഖാ കംപ്യൂട്ടർവൽക്കരണത്തോടു ഗുസ്തി പിടിക്കുമ്പോൾ ആന്ധ്ര പ്രദേശാകട്ടെ സംസ്ഥാനത്തെ മുഴുവൻ ഭൂമി ഇടപാടുകളും ബ്ലോക്ക് ചെയിനിലാക്കി അഴിമതിയും ഭൂമിതട്ടിപ്പും തുടച്ചുനീക്കാൻ ശ്രമം തുടങ്ങിക്കഴിഞ്ഞു.
സ്വീഡിഷ് സ്റ്റാർട്ടപ്പായ ക്രോമവേയുടെ പോസ്റ്റ്‌ചെയിൻ എന്ന ബ്ലോക്ക്‌ചെയിൻ സങ്കേതമാണ് ഇതിനുപയോഗിക്കുന്നത്.
ഭൂരേഖ ബ്ലോക്ക് ചെയിനിലായിക്കഴിഞ്ഞാൽ പിന്നെ സർക്കാരിനു പോലും തിരുത്തൽ നടക്കില്ല. ആന്ധ്ര സർക്കാരിന്റെ ഈ പരിശ്രമം ലോകശ്രദ്ധ നേടിക്കഴിഞ്ഞു.
