രാജ്യത്തെ മുൻനിര ടെലികോം സേവനദാതാക്കളായ റിലയൻസ് ജിയോ വരിക്കാരെ പിടിച്ചുനിർത്താനായി വൻ ഓഫറുമായി രംഗത്ത്. പുതുവൽസരം പ്രമാണിച്ച് 399 രൂപയ്ക്ക് റീചാർജ് ചെയ്താൽ മുഴുവൻ തുകയും തിരിച്ചു നൽകുന്ന ക്യാഷ്ബാക്ക് ഓഫറാണ് ജിയോ അവതരിപ്പിക്കുന്നത്. ജിയോ ഹാപ്പി ന്യൂ ഇയർ ഓഫർ പ്രകാരം റീചാർജ് ചെയ്താൽ 399 രൂപ എജിയോ കൂപ്പൺ ലഭിക്കും.
ഡിസംബർ 28 മുതൽ ജനുവരി 31 വരെയാണ് ഓഫർ. 399 രൂപയുടെ റീചാർജിൽ ഉപയോക്താക്കൾക്ക് 84 ദിവസത്തേക്ക് 126 ജിബി ഡേറ്റ (പ്രതിദിനം 1.5 ജിബി നിരക്കിൽ), സൗജന്യ എസ്എംഎസ്, സൗജന്യ കോൾ വരെ ഉപയോഗിക്കാം. ഇതോടൊപ്പം ജിയോ സെലിബ്രേഷൻ പാക്ക് 2 ജിബി അധിക ഡേറ്റയും ഇതോടൊപ്പം ലഭിക്കും. അഞ്ചു ദിവസത്തേക്ക് ഈ ഡേറ്റ ഉപയോഗിക്കാം.
399 റീചാർജ് പാക്ക് ചെയ്യുന്നവർക്ക് 399 രൂപയുടെ എജിയോ വൗച്ചറായാണ് ക്യാഷ്ബാക്ക് പണം ലഭിക്കുക. എജിയോയിൽ നിന്ന് 1000 രൂപയ്ക്ക് മുകളിലുള്ള പർച്ചേസിന് 399 രൂപയുടെ കൂപ്പൺ ഉപയോഗിക്കാം. കൂപ്പൺ മൈജിയോ ആപ്പ് വഴിയാണ് നൽകുന്നത്. ഈ വൗച്ചറുകൾ മാര്‌ച്ച് 15 ന് മുൻപ് ഉപയോഗിക്കേണ്ടതുണ്ട്.
