ഇന്ത്യക്കാർക്കു തായ്​ലൻഡിലേക്കു വീസ ഫ്രീ പ്രവേശനം, നവംബർ 11 വരെ

വിനോദസഞ്ചാര മേഖല കൂടുതൽ സജീവമാക്കുന്നതിന്റെ ഭാഗമായി കൂടുതൽ വീസ ഇളവുകളുമായി തായ്​ലൻഡ്. ഇന്ത്യയിൽ നിന്നും തായ്​വാനിൽ നിന്നുമുള്ള സഞ്ചാരികൾക്കാണ് വീസ ഇളവുകൾ നൽകാൻ തായ്​ലൻഡ് കാബിനറ്റ് തീരുമാനിച്ചത്. ഈ രാജ്യങ്ങളിൽ നിന്നുള്ള സഞ്ചാരികൾക്കു 2024 നവംബർ 11 വരെ വീസ ഇല്ലാതെ തായ്​ലൻഡിലേക്കു പ്രവേശിക്കാവുന്നതാണെന്നു പ്രധാനമന്ത്രി സ്രെത്ത താവിസിൻ പറഞ്ഞു. രാജ്യത്തിന്റെ സാമ്പത്തിക മേഖലയെ കൂടുതൽ ബലപ്പെടുത്തുക എന്ന ലക്ഷ്യത്തോടു കൂടിയാണ് പുതിയ നടപടി.

വീസ ഇല്ലാതെ എത്തുന്ന സഞ്ചാരികൾക്കു 30 ദിവസം വരെ രാജ്യത്തു തുടരാവുന്നതാണ്. രാജ്യത്തിന്റെ വ്യത്യസ്തവും മനോഹരവുമായ കാഴ്ചകൾ ആസ്വദിക്കാൻ ഈ കാലയളവിൽ സാധിക്കും. കഴിഞ്ഞ വർഷം നവംബറിലാണ് ചില രാജ്യങ്ങളിൽ നിന്നുള്ള വിനോദസഞ്ചാരികൾക്ക് വീസ ഇല്ലാതെ രാജ്യത്തേക്കു പ്രവേശനം അനുവദിച്ചത്. നേരത്തെ, ഇന്ത്യയിൽ നിന്നും തായ്​വാനിൽ നിന്നുമുള്ള സഞ്ചാരികൾക്കു വീസ ഓൺ അറൈവൽ സ്കീമിൽ 15 ദിവസം രാജ്യത്തു താമസിക്കാമായിരുന്നു. എന്നാൽ, ഇപ്പോൾ ഇത് 30 ദിവസമായി വർധിച്ചിരിക്കുകയാണ്. 

ലോകത്തിന്റെ വിവിധ ഭാഗങ്ങളിൽ നിന്നുള്ള വിനോദസഞ്ചാരികൾ ഒഴിവുകാലം ചെലവഴിക്കാൻ എത്തുന്ന രാജ്യമാണ് തായ്​ലൻഡ്. അതുകൊണ്ടു തന്നെ തായ്​ലൻഡിലേക്കു നിരവധി വിനോദസഞ്ചാരികൾ എത്തുന്ന റഷ്യ, ചൈന എന്നിവിടങ്ങളിൽ  നിന്നുള്ള സഞ്ചാരികളെ പ്രോത്സാഹിപ്പിക്കുന്നതിന്റെ ഭാഗമായി വീസ നിയമത്തിൽ നിരവധി ഇളവുകളാണ് വരുത്തിയത്. 

2024 ന്റെ ആദ്യ നാലു മാസങ്ങളിൽ തായ്​ലൻഡിലേക്ക് എത്തിയ സഞ്ചാരികളുടെ എണ്ണം ഗണ്യമായി വർധിച്ചു. രാജ്യത്തെ വിനോദ സഞ്ചാര - കായിക മന്ത്രാലയത്തിന്റെ കണക്ക് അനുസരിച്ച് 12 മില്യൺ സഞ്ചാരികളാണ് ഈ കാലയളവിൽ എത്തിയത്. കഴിഞ്ഞ വർഷം ഇതേ സമയവുമായി താരതമ്യം ചെയ്യുമ്പോൾ സഞ്ചാരികളുടെ എണ്ണത്തിൽ 39 ശതമാനം വർധനയാണ് ഉണ്ടായിരിക്കുന്നത്. ഈ വർഷം രാജ്യത്ത് എത്തിയ ആകെ സഞ്ചാരികളിൽ പകുതിയും ചൈന, മലേഷ്യ. റഷ്യ, സൗത്ത് കൊറിയ, ഇന്ത്യ എന്നീ രാജ്യങ്ങളിൽ നിന്നാണ്. ഇതിൽ നിന്നു തന്നെ തായ്​ലൻഡിന്റെ വിനോദസഞ്ചാര മേഖലയിൽ ഈ രാജ്യങ്ങൾ എത്രത്തോളം പ്രധാനപ്പെട്ടതാണെന്നു വ്യക്തമാണ്.

കോവിഡ് 19 കൊണ്ടു വന്ന വെല്ലുവിളികളെ മറികടക്കാനാണ് തായ്​ലൻഡ് വീസ ഇളവുകളുമായി എത്തിയിരിക്കുന്നത്. ഇന്ത്യ, തായ്​വാൻ എന്നീ രാജ്യങ്ങൾക്കുള്ള വീസ ഇളവുകൾ നീട്ടുമ്പോൾ രാജ്യത്തെ വിനോദസഞ്ചാരമേഖലയുടെ പുനരുജ്ജീവനം ആണ് തായ്​ലൻഡ് ലക്ഷ്യം വയ്ക്കുന്നത്. ഇന്ത്യയിൽ നിന്നുള്ള വിനോദസഞ്ചാരികളുടെ ഏറ്റവും പ്രിയപ്പെട്ട ഇടങ്ങളിൽ ഒന്നാണ് തായ്​ലൻഡ്. ലക്ഷക്കണക്കിന് ആളുകളാണ് ഇന്ത്യയിൽ നിന്ന് തായ്​ലൻഡിലേക്ക് ഓരോ വർഷവും എത്തുന്നത്. മനോഹരമായ സംസ്കാരവും ആരെയും ആകർഷിക്കുന്ന ബീച്ചുകളും തിരക്കുള്ള നഗരങ്ങളും ഒക്കെയായി സഞ്ചാരികളെ ആകർഷിക്കുകയാണ് തായ്​ലൻഡ്.

ബാങ്കോക്കിലെ തിരക്കേറിയ തെരുവുകളിൽ നിന്ന് ഫുക്കെറ്റ് പോലുള്ള മനോഹരമായ ദ്വീപുകളിലേക്കു വ്യത്യസ്തമായ ഒരു യാത്രയാണ് തായ്​ലൻഡ് ഓരോ സഞ്ചാരിക്കും നൽകുന്നത്. തായ്​ലൻഡ് ഇന്ത്യയിൽ നിന്നുള്ള വിനോദസഞ്ചാരികൾക്ക് ഒരു അവധിക്കാല കേന്ദ്രം മാത്രമല്ല, വളരെ അടുത്തുള്ളതും ചെലവ് താങ്ങാൻ കഴിയുന്നതുമായ ഒരു സ്ഥലം കൂടിയാണ്. തെരുവുകളിലെ കടകളിൽ നിന്നു കിട്ടുന്ന രുചികരമായ ഭക്ഷണങ്ങളും പുരാതന ക്ഷേത്രങ്ങളും ശാന്തമായ ബീച്ചുകളുമെല്ലാം ഓരോ സഞ്ചാരിയെയും തായ്​ലൻഡിലേക്ക് ആകർഷിക്കുന്നു. തായ്​ലൻഡിന്റെ ആതിഥേയത്വവും ചലനാത്മകമായ രാത്രികളും സമ്പന്നമായ സംസ്കാരവും ഇന്ത്യൻ സഞ്ചാരികൾക്ക് ഈ രാജ്യം അത്രയേറെ പ്രിയപ്പെട്ടതാക്കുന്നു.