കായിക പ്രേമികൾക്ക് എന്നും ഏറെ പ്രിയങ്കരനാണ് എം.എസ് ധോണി. ടീംപ്ലെയർ, ബാറ്റ്സമാൻ, സ്കിപ്പർ, ടീം ലീഡർ അങ്ങനെ ഏതു റോളിൽ വന്നാലും ആരാധകർ ക്യാപ്റ്റൻ കൂളിനെ ഇഷ്ടപ്പെട്ടു.
കഴിഞ്ഞ വർഷം പുറത്തിറങ്ങിയ എം. എസ് ധോനി അൺടോൾഡ് സ്റ്റോറി എന്ന ചിത്രത്തിലൂടെയും ഈ ക്രിക്കറ്റ്താരത്തിന്റെ ജീവിതം ആളുകൾ അടുത്തറിഞ്ഞു. ക്രിക്കറ്റ് ലോകത്തു നിന്നു അദ്ദേഹം വിരമിച്ചപ്പോൾ ആരാധകർ നിരാശരായി.
അതിനുശേഷം ധോണിയെ ജനങ്ങൾ കണ്ടത് സ്നേഹമുള്ള കുടുംബനാഥന്റെ റോളിലാണ് കുഞ്ഞുസിവയുടെ കുസൃതികൾ സമൂഹമാധ്യമങ്ങളിലൂടെ പങ്കുവെച്ച ധോണി വീണ്ടും ആരാധകരുടെ ഹൃദയത്തിലിടം പിടിച്ചു.
കുഞ്ഞിന്റെ ചിത്രങ്ങളും വിഡിയോയുമായി ഇടയ്ക്കിടെ ധോണി പ്രത്യക്ഷപ്പെടുന്നതു കാണാൻ ആരാധകർ കാത്തിരുന്നു. ഇക്കുറി ധോണിയെത്തിയത് കുഞ്ഞുവാവയുടെ വ്യത്യസ്തമായ ഒരു വിഡിയോയുമായാണ്.
അമ്മ സാക്ഷി പറഞ്ഞുകൊടുക്കുന്ന ഐപിഎൽ ടീമിന്റെ പേരുകൾ തെറ്റാതെ ഏറ്റുപറയുന്ന സിവയുടെ വിഡിയോയാണ് ധോണി പങ്കുവെച്ചത്. ഐപിഎൽ ടീമിന്റെ പേരുകൾ കൊഞ്ചിപ്പറയുന്ന സിവയുടെ ദൃശ്യങ്ങൾ പങ്കുവെച്ചുകൊണ്ട് ധോണി പറയുന്നതിങ്ങനെ സിവ ഐപിഎൽ ടീമിന്റെ പേരുകൾ പഠിച്ചു തുടങ്ങുകയാണ്.