യാതൊരു മുന്നൊരുക്കങ്ങളുമില്ലാതെ നിൽക്കുമ്പോൾ കെട്ടിടത്തിനു മുകളിൽ നിന്നൊരാൾ പെട്ടന്ന് താഴേക്കു വരുന്നതു കണ്ടാൽ എന്തു ചെയ്യും? സംഭവ സ്ഥലത്തു നിന്ന് ഓടിപ്പോകുമോ അതോ താഴേക്കു വീഴുന്നയാളെ വെറുംകൈകൾ കൊണ്ട് താങ്ങി നിർത്തുമോ? ചൈനയിലെ ധീരനായ പൊലീസ് ഓഫീസർ ചെയ്തത് ഇതിൽ രണ്ടാമത്തെ കാര്യമാണ്.
ഒരു പന്തു ക്യാച്ച് ചെയ്യും പോലെ ലളിതമായാണ് അദ്ദേഹം കെട്ടിടത്തിന്റെ മുകളിൽ നിന്നു താഴെവീണ യുവതിയെ ക്യാച്ച് ചെയ്തത്. അതുകൊണ്ടു മാത്രമാണ് നിസാരമായ പരുക്കുകളോടെ യുവതിക്ക് രക്ഷപെടാൻ പറ്റിയത്. യാതൊരു സുരക്ഷാക്രമീകരണങ്ങളും ഇല്ലാതിരുന്നിട്ടും യുവതിയെ രക്ഷിക്കാൻ ശ്രമിച്ചാൽ തനിക്കും പരുക്കുപറ്റുമെന്നറിയാമായിരുന്നിട്ടും ആ പൊലീസ് ഉദ്യോഗസ്ഥൻ മനസാന്നിധ്യം കൈവിടാതെ ആ സാഹസത്തിനു മുതിർന്നു.
ഭർത്താവിനോടു വഴക്കിട്ട് യുവതി കെട്ടിടത്തിന്റെ മുകളിൽ നിന്ന് ചാടിയതാണെന്നും അല്ല വീണതാണെന്നും എന്നൊക്കെയുള്ള മട്ടിൽസ്ഥിരീകരിക്കാത്ത റിപ്പോർട്ടുകളുണ്ട്. എന്തായാലും ഈ അപ്രതീക്ഷിത സംഭവം പൊലീസ് ഉദ്യോഗസ്ഥനു നൽകിയത് ഒരു ഹീറോ ഇമേജാണ്.