സമൂഹമാധ്യമങ്ങൾ കുറച്ചു ദിവസമായി ഒരു പെൺകുട്ടിയുടെ പിന്നാലെയാണ്. പ്രിയ പ്രകാശ് വാരിയർ എന്ന പെൺകുട്ടിയെ ഒറ്റരാത്രികൊണ്ട് പ്രശസ്തയാക്കിയതോ ഒരു ഗാനരംഗത്തിലെ ലളിതമായ അഭിനയവും. ഒമർ ലുലുവിന്റെ അഡാർ ലൗവിലെ ഗാനരംഗത്തിൽ വേറെയും മൊഞ്ചത്തിമാരും സുന്ദരന്മാരും ഉണ്ടായിരുന്നെങ്കിലും ആരാധകർ കൂടുതൽ ഫോക്കസ് ചെയ്തത് പ്രിയയുടെ കണ്ണിറുക്കലിലേയ്ക്കാണ്.
കാഴ്ചയിലും അഭിനയത്തിലും തങ്ങളും സൂപ്പറാ എന്നു കാട്ടിത്തരുകയാണ് അഡാർലൗവ് ടീമിലെ കൗമാരക്കൂട്ടം. ചിത്രത്തിലെ ഗാനരംഗത്തിൽ അഭിനയിച്ച മിടുക്കന്മാരും മിടുക്കികളും ചേർന്നവതരിപ്പിച്ച ഡബ്സ്മാഷും വൈറലായിക്കൊണ്ടിരിക്കുകയാണ്. അപാരമായ ടൈമിങ്ങും അസാധ്യമായ അഭിനയവുംകൊണ്ട് പരസ്പരം മൽസരിക്കുകയാണ് ചങ്ങാതിക്കൂട്ടം.
ചിത്രത്തിലെ പെൺകുട്ടി രാജ്യാന്തരതാരമായതും ചിത്രത്തിലെ ഗാനരംഗത്തെക്കുറിച്ചുള്ള വിവാദങ്ങൾ കൊഴുക്കുമ്പോഴും അതിനെയൊന്നും കൂസാതെ ആരാധകർ വിഡിയോ കണ്ട് യുവതാരങ്ങളെ പ്രോത്സാഹിപ്പിക്കുകയാണ്.