ഇപ്പോഴും ആർക്കും വിശ്വസിക്കാനായിട്ടില്ല ശ്രീദേവിയുടെ മരണവാർത്ത. സൗന്ദര്യവും ആത്മവിശ്വാസവുംകൊണ്ട് കരിയറിലും ജീവിതത്തിലും ജയിച്ചു നിന്ന അവരെ മരണം തട്ടിയെടുത്താലും ആ കണ്ണിലെ തിളക്കം മാത്രം മതി തങ്ങൾക്ക് എന്നുമവരെ ഓർത്തെടുക്കാൻ എന്നു പറയുകയാണ് ആരാധകർ.
ശ്രീദേവിയുടെ വിവിധ അഭിനയ മുഹൂർത്തങ്ങളിൽ അവർ കണ്ണുകൾ കൊണ്ടു ജാലവിദ്യ കാട്ടിയപ്പോഴുള്ള ദൃശ്യങ്ങളാണ് ഇപ്പോൾ ആരാധകർ സമൂഹമാധ്യമങ്ങളിലൂടെ പങ്കുവെച്ചുകൊണ്ടിരിക്കുന്നത്.
കണ്ണുകൾകൊണ്ട് കഥ പറയുന്ന ശ്രീദേവിയുടെ ജിഫുകൾ വ്യാപകമായി പ്രചരിക്കുമ്പോൾ ആരാധകരുടെ ഹൃദയം വിങ്ങുകയാണ്. ബോളിവുഡിലെ നിറയൗവനത്തിന്റെ മരണത്തെക്കുറിച്ചും സൗന്ദര്യശസ്ത്രക്രിയകളെക്കുറിച്ചും ഊഹാപോഹങ്ങൾ പരക്കുമ്പോഴും അതൊന്നും വിശ്വസിക്കാത മരണത്തിനപ്പുറവും തങ്ങളുടെ പ്രിയ നായികയെ ആരാധിക്കുകയാണവർ.
കേവലം ഒരു കണ്ണിറുക്കൽ കൊണ്ട് നാഷണൽ ക്രഷ് ആയി മാറിയ പുതുമുഖ നായികയൊക്കെ ശ്രീദേവിയുടെ കണ്ണുകളിലെ മായാജാലത്തിനു മുന്നിൽ മാറിനിൽക്കുമെന്നാണ് ആളുകൾ പറയുന്നത്. പ്രിയതാരത്തിന്റെ ഭൗതിക ശരീരം ഭൂമിവിട്ടുപോയാലും തിളങ്ങുന്ന കണ്ണുകളോടെ നിറഞ്ഞചിരിയോടെ ശ്രീദേവിയെന്നും ഉള്ളിൽ നിറഞ്ഞുനിൽക്കുമെന്നു തന്നെ അവർ ഉറച്ചു വിശ്വസിക്കുന്നു.