കൊച്ചുകുട്ടികൾ പോലും ഈ അത്‌ലറ്റിനെ കാണുമ്പോൾ മൂക്കത്ത് വിരൽവെച്ച് ചിരിക്കും. കാര്യം കക്ഷി മൈതാനത്ത് പുലിയാണെങ്കിലും ഒരു റൈഡിൽ കയറിയാൽ അവരുടെ ധൈര്യമെല്ലാം കാറ്റുകുത്തിയ ബലൂൺപോലെ ചൊങ്ങിപ്പോകും. ഐറിഷ് ഫുഡ്ബോളറായ മേഗനാണ് ട്വിറ്ററിലെ പുതിയ ചർച്ചാ വിഷയം. ഫ്ലോറിഡയിലെ സുഹൃത്തിനൊപ്പം തീം പാർക്കിലെ റൈഡിൽ കയറുന്നതിന്റെ വിഡിയോ പുറത്തായതോടെയാണ് കക്ഷി താരമായത്.
റൈഡ് ആകാശത്തേക്ക് ഉയരുന്തോറും ഉറക്കെക്കരയുന്ന മേഗനും റൈഡിലെ സാഹസികത ആസ്വദിച്ച് അട്ടഹസിച്ചു ചിരിക്കുന്ന കൂട്ടകാരിയുമാണ് വിഡിയോയിലുള്ളത്. സ്വതവേ ഇത്തരം റൈഡുകളൊക്കെ പേടിയുള്ള മേഗൻ കൂട്ടുകാരിയുടെ നിർബന്ധത്തിനു വഴങ്ങിയാണ് റൈഡിൽ കയറിയത്. റൈഡ് അവസാനിക്കുന്നതു വരെ മേഗൻ നിർത്താതെ നിലവിളിക്കുന്നുണ്ട്.
എന്റെ ആത്മാവ് ശരീരം വിട്ടപ്പോൾ എന്ന അടിക്കുറിപ്പോടെയാണ് മേഗൻ രസകരമായ ഈ വിഡിയോ പങ്കുവെച്ചിരിക്കുന്നത്. നിരവധി ട്വീറ്റുകളും റി ട്വീറ്റുകളുമായി തരംഗമായിക്കൊണ്ടിരിക്കുകയാണ് വിഡിയോ.