താരതമ്യേന കുറഞ്ഞ വിലയില്‍ മികച്ച സൗകര്യങ്ങള്‍ വാഗ്ദാനം ചെയ്ത് വിപണിയിലെത്തിയ കൂള്പാഡ് നോട്ട് 3 ഫോണുകള്‍ക്ക് മികച്ച വരവേല്‍പ്പാണ് ലഭിച്ചിരിക്കുന്നത്. ഫിംഗര്‍ പ്രിന്റ് സ്കാനറോട് കൂടിയ സ്മാര്‍ട്ട് ഫോണായ കൂള്പാഡ് നോട്ട് 3 ഫോണുകള്‍ കഴിഞ്ഞ ദിവസം 5 മിനിറ്റ് സമയം കൊണ്ട് 15000 യൂണിറ്റുകളാണ് ആമസോണിലെ ഓണ്‍ലൈന്‍ ഫ്ലാഷ് സെയിലിലൂടെ വിറ്റുപോയത്. അതോടൊപ്പം 5 ലക്ഷം ആളുകള്‍ ഈ ഫോണ്‍ വാങ്ങാന്‍ ഇതുവരെ രജിസ്റ്റര്‍ ചെയ്തിട്ടുമുണ്ടെന്നുള്ളത് കൂള്‍പാഡിന്റെ വമ്പിച്ച ജനപ്രീതിയാണ് വ്യക്തമാക്കുന്നത്. ഒക്ടോബര്‍ 27-ന് നടക്കുന്ന അടുത്ത ഓണ്‍ലൈന്‍ വില്‍പനയില്‍ ഇന്ത്യന്‍ സ്മാര്‍ട്ട്ഫോണ്‍ വിപണിയിലെ മികച്ച നേട്ടമാണ് കൂള്പാഡ് ലക്ഷ്യമിടുന്നത്.
വില കുറഞ്ഞ പുതിയ 4ജി ഫോണുമായി ഇന്ത്യൻ വിപണിയിലെത്തിയ കൂൾപാഡ് നോട്ട് 3 ഒക്ടോബർ 20 ന് ആമസോണിന്റെ ഇന്ത്യൻ ഇ-കൊമേഴ്സ് പോർട്ടലിലൂടെയാണ് വിപണിയിലെത്തിച്ചത്. ചൈനയിൽ നിന്നുള്ള ടെലികോം എക്യുപ്മെന്റ് നിര്‍മ്മാണ കമ്പനിയായ കൂൾപാഡ് ഇന്ത്യൻ വിപണിയിൽ പുതിയ 4 ജി ഫോണുകളുമായി സജീവമാകുന്നതിന്റെ ഭാഗമായാണ് കൂൾപാഡ് നോട്ട് 3 ഇന്ത്യന്‍ വിപണിയിലെത്തിയത്.
1280 x 720 പിക്സൽ റെസലൂഷൻ നൽകുന്ന 5.5 ഇഞ്ച് ഐ.പി.എസ് ഡിസ്പ്ലേയോട് കൂടിയ ഫോണിന് 1.3 ജിഗാ ഹെട്സ് വേഗതയുള്ള ഒക്ടാകോർ മീഡിയടെക് പ്രോസസറാണ് കരുത്ത് പകരുന്നത്. 3 ജിബി റാമും 16 ജിബി ആന്തരിക സ്റ്റോറേജുമായെത്തുന്ന ഫോണിന് 3000 എം.എ.എച്ച് ശേഷിയുള്ള ബാറ്ററിയാണുള്ളത്.പ്രോസസറിനൊപ്പം പ്രവർത്തിക്കുന്ന മാലി ടി - 720 എംപി 2 ജി.പി.യു കൂൾപാഡ് നോട്ട് 3 സ്മാർട്ട് ഫോണിനെ ഗെയിമിംഗ് ഡിവൈസാക്കി മാറ്റും.
ആൻഡ്രോയ്ഡ് 5.1 ലോലിപോപ്പ് ഒ .എസിൽ പ്രവർത്തിക്കുന്ന ഈ കൂൾപാഡ് സ്മാർട്ട്ഫോഫോണിന്റെ 13 മെഗാപിക്സൽ പ്രധാന ക്യാമറ f/2.0 വരെ അപേർച്ചർ നൽകുന്നതാണ്. എൽ.ഇ.ഡി ഫ്ലാഷോട് കൂടിയ ഈ ക്യാമറ 5പി ലെൻസ് എലമന്റോട് കൂടിയതാണ്. 5 മെഗാപിക്സൽ വ്യക്തത നൽകുന്ന സെൽഫി ഷൂട്ടറാണ് ഈ ഫോണിനുള്ളത്. ഈ സൗകര്യങ്ങളെല്ലാം വെറും 8999 രൂപയ്ക്ക് ലഭിക്കുന്നുവെന്നാണ് കൂള്പാഡ് നോട്ട് 3 യുടെ ജനപ്രീതിക്ക് പിന്നിലെ പ്രധാന കാരണമായി ചൂണ്ടിക്കാട്ടുന്നത്.
Disclaimer
ഇവിടെ പോസ്റ്റ് ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ്ണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാറിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.