കടുവയോട് കിടപിടിക്കും! ലോകത്ത് ജീവിച്ചിരുന്ന വമ്പൻ ചീറ്റ, ഇന്നത്തേതിന്റെ മൂന്നിരട്ടി ഭാരം

ഇന്ത്യയിലേക്ക് ചീറ്റകൾ വന്നത് അടുത്തകാലത്തെ വലിയ വാർത്തകളിലൊന്നായിരുന്നല്ലോ. മധ്യപ്രദേശിലെ കുനോ ദേശീയോദ്യാനത്തിലാണ് ഇവ താമസിക്കുന്നത്. ഇപ്പോഴിതാ ലോകത്ത് ഇതുവരെ ജീവിച്ചിട്ടുള്ളതിൽ ഏറ്റവും വലുപ്പമേറിയ ചീറ്റകളുടെ വിവരങ്ങൾ വെളിപ്പെടുത്തിയിരിക്കുകയാണ് ശാസ്ത്രജ്ഞർ. അകിനോണിക്സ് പ്ലീസ്റ്റോസിനിയസ് എന്നാണ് ഈ വമ്പൻ ചീറ്റയുടെ ശാസ്ത്രനാമം. 5 ലക്ഷം വർഷം മുൻപ് യൂറേഷ്യൻ മേഖലകളിലാണ് ഈ ചീറ്റ വിഹരിച്ചിരുന്നത്. ചൈനയിൽ നിന്നാണ് ഇവയുടെ ഫോസിൽ ആദ്യമായി കണ്ടെത്തിയത്.

സിംഹം, കടുവ, ജാഗ്വർ പുലി, ലെപ്പേർഡ് പുലി തുടങ്ങിയ ജീവിലോകത്തെ വീരശൂരപരാക്രമികൾ അടങ്ങിയ മാർജാര കുടുംബത്തിൽപെട്ടതാണു ഇന്നത്തെ ചീറ്റകൾ. എന്നാൽ വലുപ്പത്തിൽ ഇവ ചെറുതാണ്. അകിനോണിക്സ് ചീറ്റയാകട്ടെ ഇന്നത്തെ കടുവയോട് വലുപ്പത്തിൽ കിടപിടിക്കുന്നവയായിരുന്നു. ഇന്നത്തെ കാലത്തെ ചീറ്റകളുടെ മൂന്നിരട്ടി ഭാരം ഇവയ്ക്കുണ്ടായിരുന്നു. ഏകദേശം 190 കിലോവരെയൊക്കെ ഇവയ്ക്ക് ഭാരം വച്ചിരുന്നു.

ചിത്രയ എന്ന സംസ്‌കൃത വാക്കിൽ നിന്നോ, അല്ലെങ്കിൽ ചിതാ എന്ന ഹിന്ദി/ഉർദ്ദു വാക്കിൽ നിന്നോ ആണ് ചീറ്റ എന്ന പേര് വന്നിട്ടുള്ളതെന്ന് കരുതപ്പെടുന്നു. ലോകത്തിലെ സവിശേഷ മൃഗങ്ങളിലൊന്നാണ് ചീറ്റകൾ. ലോകത്തിലെ ജീവികളിൽ ഏറ്റവും വേഗത്തിൽ ഓടാനുള്ള കഴിവാണ് ചീറ്റകളെ അദ്വിതീയരാക്കുന്നത്. മണിക്കൂറിൽ 80 മുതൽ 100 വരെ കിലോമീറ്റർ വേഗത്തിൽ ഓടാനുള്ള കഴിവ് ഇവയ്ക്കുണ്ട്. മനുഷ്യരുടെ സാധാരണ വേഗം മണിക്കൂറിൽ 13 കിലോമീറ്റർ എന്നതാണ്. ഏറ്റവുമുയർന്ന വേഗം മനുഷ്യർ കൈവരിച്ചിട്ടുള്ളത് മണിക്കൂറിൽ 43.99 എന്ന വേഗവും (ഉസൈൻ ബോൾട്ട്).

ചീറ്റകൾക്ക് കടുവ, സിംഹം, പുലി എന്നിവയെപ്പോലെ ഗർജിക്കാനുള്ള കഴിവില്ല. നാട്ടുപൂച്ചയുൾപ്പെടെ അടങ്ങിയ മാർജാരകുടുംബത്തിനെ രണ്ട് വിഭാഗങ്ങളായി തരംതിരിച്ചിരിക്കുന്നു.പാന്ഥറിനെ, ഫെലിനെ എന്നീ വിഭാഗങ്ങളായാണ് ഈ തരംതിരിവ്. ഫെലിനെ വിഭാഗത്തിൽ ചീറ്റകൾ മുതൽ നാട്ടുപൂച്ചകൾ വരെയുണ്ട്. ഫെലിനെയിൽ ഉൾപ്പെടുന്ന ജീവികൾക്ക് ശ്വാസനാളിക്ക് സമീപം എപിഹ്യാൽ ബോൺ എന്ന ഒരു ചെറിയ എല്ലുണ്ട്. ഗർജിക്കാനുള്ള കഴിവ് ഇവയ്ക്ക് ഇല്ലാതെ പോയത് അക്കാരണത്താലാണ്. എന്നാൽ പാന്ഥറിനെ വിഭാഗത്തിലുൾപ്പെടുന്ന സിംഹത്തിനും കടുവയ്ക്കും പുലിക്കും ഈ എല്ലിനു പകരം ലിഗമെന്‌റുകളാണ്. അതിനാൽ തന്നെ ഇവയ്ക്ക് കിലോമീറ്ററുകൾ സഞ്ചരിക്കുന്ന ഗർജനശബ്ദങ്ങൾ പുറപ്പെടുവിക്കാം.

ആഫ്രിക്കയിലും ഇറാനിലെ ചില പ്രദേശങ്ങളിലും മാത്രമാണ് ചീറ്റകൾ അധിവസിക്കുന്നത്. ഒറ്റയ്‌ക്കോ അല്ലെങ്കിൽ അഞ്ചോ ആറോ മൃഗങ്ങൾ അടങ്ങിയ ഗ്രൂപ്പുകളായോ ആണ് ചീറ്റകൾ ജീവിക്കുന്നത്. ആഫ്രിക്കയിലെ ചീറ്റകൾ തെക്കുകിഴക്കൻ ആഫ്രിക്കൻ, വടക്കുകിഴക്കൻ ആഫ്രിക്കൻ, വടക്കുപടിഞ്ഞാറൻ ആഫ്രിക്കൻ ഉപവിഭാഗങ്ങളിൽപെടുന്നവയാണ്. ഇറാനിലുള്ളത് ഏഷ്യാട്ടിക് ചീറ്റയാണ്, പണ്ട് ഇവ ഇന്ത്യയിൽ ഉണ്ടായിരുന്നു. ചീറ്റകൾ പൊതുവെ നാണംകുണുങ്ങികളായ മൃഗങ്ങളാണ്. സിംഹം പോലുള്ള ശക്തരായ മൃഗങ്ങളുമായി സംഘർഷം ഉടലെടുക്കുന്ന പക്ഷം ഇവ പൊരുതാനല്ല, മറിച്ച് ഓടിരക്ഷപെടാനാണു ശ്രമിക്കുക. മനുഷ്യരെ ആക്രമിക്കാനും ചീറ്റയ്ക്ക് വലിയ താൽപര്യമില്ല. വനങ്ങളിലും മറ്റും ചീറ്റകൾ മനുഷ്യരെ ആക്രമിച്ചു കൊലപ്പെടുത്തിയ സംഭവങ്ങളും കുറവാണ്..