Image Captured From Youtube Video
സമൂഹ മാധ്യമമായ ട്വിറ്ററിൽ ഏറെ ആരാധകരുള്ള ആളാണ് മഹീന്ദ്ര ആന്റ് മഹീന്ദ്രയുടെ ചെയർമാൻ ആനന്ദ് മഹീന്ദ്ര. തന്റെ കാരുണ്യ പ്രവർത്തനം കൊണ്ടും അദ്ദേഹം ഏറെ ശ്രദ്ധനേടാറുണ്ട്. കഴിഞ്ഞ ദിവസമാണ് മംഗലാപുരം സ്വദേശി വീട്ടമ്മയ്ക്ക് സഞ്ചരിക്കുന്ന ഭക്ഷണ ശാല തുടങ്ങാൻ ബൊലേറോ സമ്മാനിക്കുന്ന വിവരം ട്വിറ്ററിലുടെ പ്രഖ്യാപിച്ചത്. എന്നാൽ ട്വിറ്ററിലൂടെ സൂപ്പർ താരത്തെ ട്രോളി പുലിവാലു പിടിച്ചിരിക്കുകയാണ് അദ്ദേഹം ഇപ്പോൾ.
വിഷ്ണു ചൈതന്യ എന്ന ട്വിറ്റർ ഉപയോക്താവ് ഷെയർ ചെയ്ത വിഡിയോയ്ക്ക് മറുപടിയായാണ് ആനന്ദ് മഹീന്ദ്ര തെലുങ്ക് സൂപ്പർതാരം ബാലകൃഷ്ണയെ ട്രോളിയത്. ബാലകൃഷ്ണയുടെ പുതിയ ചിത്രത്തിൽ 1600 കിലഗ്രാം ഭാരമുള്ള മഹീന്ദ്ര ബൊലേറോ ഒറ്റകൈകൊണ്ട് പൊക്കുന്ന വിഡിയോ ക്ലിപ്പായിരുന്നു വിഷ്ണു ചൈതന്യ അയച്ചു കൊടുത്തത്. ഇനി മുതൽ മഹീന്ദ്ര വർക്ക്ഷോപ്പുകളിൽ ഹൈഡ്രോളിക് ലിഫ്റ്റിന്റെ ആവശ്യമില്ല എന്നായിരുന്നു മഹീന്ദ്രയുടെ ട്രോൾ.
എന്നാൽ ആനന്ദ് മഹീന്ദ്രയുടെ ട്വീറ്റ് വൈറലായതോടെ ബാലകൃഷ്ണ ആരാധകർ കടുത്ത രോഷത്തിലാണ്. തങ്ങളുടെ ബല്ലയ്യയെ കളിയാക്കിയ ആനന്ദ് മഹീന്ദ്രയുടെ വാഹനങ്ങൾ ഇനി വാങ്ങില്ല എന്നാണ് ആരാധകർ പറയുന്നത്. നിങ്ങൾക്ക് ബാലകൃഷ്ണയെ അറിയില്ലായിരിക്കും പക്ഷെ ഞങ്ങൾക്ക് അദ്ദേഹം സൂപ്പർതാരമാണെന്നും ആരാധകർ പറയുന്നു.
രാജ്യത്ത് പൊലീസ് ധാരാളമായി ഉപയോഗിക്കുന്ന വാഹനമാണ് ബൊലേറെ. ചിത്രത്തിൽ ഒരു പൊലീസ് ബൊലേറോയാണ് താരം ഉയർത്തുന്നത്. നിലവിൽ 2.5 ലീറ്റർ എൻജിനാണു ബൊലേറോയിൽ ഉപയോഗിക്കുന്നത്. 3200 ആർപിഎമ്മിൽ 63 ബിഎച്ച്പി കരുത്തും 1400-2200 വരെ ആർപിഎമ്മിൽ 195 എൻഎം ടോർക്കും നൽകുന്നുണ്ട് ഈ എൻജിൻ.
