ഹൂസ്റ്റണിൽ പള്ളിയിൽ വെടിവയ്പ്പ് നടത്തിയ സ്ത്രീയെ സുരക്ഷാ ഉദ്യോഗസ്ഥർ കൊലപ്പെടുത്തി

ഹൂസ്റ്റൺ ∙ ഹൂസ്റ്റണിലെ ജോയൽ ഓസ്റ്റീൻ ലേക്‌വുഡ് പള്ളിയിൽ വെടിവയ്പ്പ് നടത്തിയ സ്ത്രീയെ സുരക്ഷാ ഉദ്യോഗസ്ഥർ വെടിവച്ച് കൊലപ്പെടുത്തി. വെടിവയ്പ്പിൽ രണ്ട് പേർക്ക് പരുക്കേറ്റു. പരുക്കേറ്റവരിൽ ഒരാൾ കുട്ടിയാണ്. കുട്ടിയുടെ നില ഗുരുതരമാണ്. 50 വയസ്സ് പ്രായമുള്ള ഒരാൾ കാലിന് പരുക്കേറ്റ് ചികിത്സയിലാണ്. അഞ്ച് വയസ്സ് പ്രായം തോന്നിക്കുന്ന ഒരു ആൺകുട്ടിയെ അനുഗമിച്ച് പള്ളിയിൽ പ്രവേശിച്ച യുവതി വെടിയുതിർക്കുകയായിരുന്നുവെന്ന് പൊലീസ് മേധാവി ട്രോയ് ഫിന്നർ അറിയിച്ചു. ഇതേ തുടർന്ന് യുവതിക്ക് നേരെ സുരക്ഷാ ഉദ്യോഗസ്ഥർ വെടിവയ്ക്കുകയായിരുന്നു. 

ഒറ്റപ്പെട്ട സംഭവമാണെന്നും പൊതുജനങ്ങൾക്ക് കൂടുതൽ അപകടമൊന്നും ഉണ്ടാകില്ലെന്നും പൊലീസ് കരുതുന്നു. യുവതിയുടെ വ്യക്തിഗത വിവരങ്ങൾ പുറത്തുവിട്ടിട്ടില്ല.