പ്രിയപ്പെട്ട മീനൂട്ടി: മീനാക്ഷിക്കു പിറന്നാൾ ആശംസകളുമായി കാവ്യ മാധവൻ

മീനാക്ഷി ദിലീപിനു പിറന്നാൾ ആശംസകളുമായി കാവ്യ മാധവൻ. ദിലീപിനും മഹാലക്ഷ്മിക്കുമൊപ്പം മീനാക്ഷിയുടെ പിറന്നാൾ ആഘോഷിക്കുന്ന ചിത്രങ്ങൾ പങ്കുവച്ചായിരുന്നു നടിയുടെ ആശംസ. ‘‘പ്രിയപ്പെട്ട മീനൂട്ടിക്ക് ജന്മദിനാശംസകൾ നേരുന്നു’’, ചിത്രങ്ങൾക്കൊപ്പം കാവ്യാ മാധവൻ ഇൻസ്റ്റാഗ്രാമിൽ കുറിച്ചു.

മീനാക്ഷി സഹോദരി മഹാലക്ഷ്മിയെ കൊഞ്ചിക്കുന്ന ചിത്രങ്ങളാണ് കാവ്യ ഏറെയും പങ്കുവച്ചിരിക്കുന്നത്. മീനാക്ഷിയുടെ 24-ാം ജന്മദിനമാണിന്ന്. ചെന്നൈയിൽ എംബിബിഎസ് പൂർത്തിയാക്കിയ മീനാക്ഷി ഇപ്പോൾ ഹൗസ് സർജൻസി ചെയ്യുകയാണ്. അഭിനയത്തോടല്ല, ഡോ. മീനാക്ഷി എന്നറിയപ്പെടാനാണ് മകൾക്ക് താല്‍പര്യമെന്ന് ഒരു അഭിമുഖത്തിൽ ദിലീപ് പറഞ്ഞിരുന്നു.  

ദിലീപിനൊപ്പം ജീവിതം തുടങ്ങിയശേഷം മകൾ മീനാക്ഷിയെ സ്വന്തം മകളെപ്പോലെയാണ് കാവ്യാ മാധവൻ ചേർത്തുപിടിച്ചിട്ടുള്ളത്. മീനാക്ഷിയോടൊപ്പം സന്തോഷകരമായ നിമിഷങ്ങൾ ചെലവഴിക്കുന്ന ചിത്രങ്ങൾ കാവ്യ സമൂഹ മാധ്യമങ്ങളിൽ പങ്കുവക്കാറുണ്ട്. മീനാക്ഷിയും കാവ്യയോടൊപ്പമുള്ള സ്നേഹ ചിത്രങ്ങൾ ആണ് പങ്കുവക്കാറുള്ളത്.  

മഹാലക്ഷ്മി പിറന്നതിനു ശേഷം ഏറെ പ്രിയമോടെ  കുഞ്ഞനുജത്തിയെ ചേർത്തുപിടിക്കുന്ന മീനാക്ഷിയുടെ ചിത്രങ്ങൾ എന്നും വൈറലായിരുന്നു.  ഇന്നും മീനാക്ഷിയുടെ പിറന്നാൾ ദിവസം അനുജത്തി മഹാലക്ഷ്മിയെ കെട്ടിപ്പിടിച്ചിരിക്കുന്ന മീനാക്ഷിയുടെ ഒരുപിടി ചിത്രങ്ങളാണ് കാവ്യാ മാധവൻ പിറന്നാൾ ആശംസയോടൊപ്പം പങ്കുവച്ചിരിക്കുന്നത്.