ശ്രീനഗർ ∙ ജമ്മു – കശ്മീരിലെ കുൽ‌ഗാം, പുൽവാമ ജില്ലകളിൽ ഏറ്റുമുട്ടലിൽ 3 ഭീകരർ കൊല്ലപ്പെട്ടു. ഒരു സൈനികൻ വീരമൃത്യു വരിച്ചു. 2 സൈനികർക്കു പരുക്കേറ്റു. കുൽഗാമിലെ റെഡ്‍വാനിയിൽ ലഷ്കറെ തയിബയിലെ അജാസ് അഹമ്മദ് മക്രു, വാരിസ് അഹമ്മദ് മാലിക്ക് എന്നിവരും പുൽവാമയിലെ ട്രാലിൽ ഇസ്‍ലാമിക് സ്റ്റേറ്റുമായി ബന്ധമുള്ള അൻസർ ഗസവത്തുൽ ഹിന്ദ് എന്ന സംഘടനയിലെ ഷക്കീർ ഹസൻ ദറുമാണ് കൊല്ലപ്പെട്ടത്.
ഒട്ടേറെ കേസുകളിൽ പൊലീസ് തിരഞ്ഞിരുന്നവരാണിവർ. ലഷ്കറിന്റെ ഉന്നത നേതൃത്വവുമായി അടുത്ത ബന്ധമുള്ളയാളാണ് മക്രു. കുൽഗാമിൽ ഏറ്റുമുട്ടലിനിടെ പരുക്കേറ്റ 3 സൈനികരിൽ പ്രകാശ് ജാദവ് ആശുപത്രിയിൽ മരിച്ചു.