∙ വരവേറ്റത് യുഎഇ

യുഎഇയുടെ ബഹിരാകാശ സഞ്ചാരി സുൽത്താൻ അൽ നെയാദിയാണ് ബഹിരാകാശനിലയത്തിൽ റയാനയെയും സംഘത്തെയും വരവേറ്റത്. ബഹിരാകാശത്തെ യുഎഇ–സൗദി കൂടിക്കാഴ്ചയ്ക്കും അങ്ങനെ ഐഎസ്എസ് സാക്ഷ്യം വഹിച്ചു. ഭൂമിയിൽനിന്ന് 430 കിലോമീറ്റർ ഉയരത്തിലുള്ള ഐഎസ്എസിൽ നിലവിൽ 11 പേരാണുള്ളത്. സൗദി, യുഎസ്, യുഎഇ എന്നീ രാജ്യങ്ങൾ കൂടാതെ റഷ്യയിൽനിന്നുള്ള ബഹിരാകാശ സഞ്ചാരിയുമുണ്ട്. ഓരോരുത്തര്‍ക്കും പ്രത്യേകം ലക്ഷ്യങ്ങളും.

ശരീരകോശ ശാസ്ത്രം, ആരോഗ്യം, സുസ്ഥിര വികസനം തുടങ്ങി വ്യത്യസ്ത മേഖലകളിൽ ഗവേഷണം ശക്തമാക്കുന്നതിന്റെ ഭാഗമായാണ് സൗദിയുടെ ഈ ബഹിരാകാശദൗത്യം. ‌സൗദിയുടെ രണ്ടാമത്തെ ബഹിരാകാശ ദൗത്യമാണിത്. ആദ്യ ബഹിരാകാശ സഞ്ചാരിയും ആദ്യ അറബ്, മുസ്‌ലിം സഞ്ചാരിയുമായ സുൽത്താൻ ബിൻ സൽമാൻ രാജകുമാരൻ എഴു ദിവസത്തെ ദൗത്യത്തിനായി 1985 ജൂൺ 17ന് ബഹിരാകാശത്ത് എത്തിയിരുന്നു.

∙ മുത്തശ്ശിയുടെ സമ്മാനം കമ്മലുകൾ

‘‘ഇത് ഞങ്ങളുടെ സ്വപ്നസാക്ഷാൽക്കാരമാണ്..’’ ബഹിരാകാശയാത്ര തുടങ്ങും മുൻപ് റയാന പറഞ്ഞ ഈ വാക്കുകളിലുണ്ട് അവരുടെ ആകാശത്തോളം ഉയർന്ന പ്രതീക്ഷയും ഭൂമിയോളം വിശാലമായ ആത്മവിശ്വാസവും. മാതൃരാജ്യത്തിനും മനുഷ്യരാശിക്കും വേണ്ടിയുള്ള ചരിത്ര നേട്ടങ്ങൾ കൈവരിക്കണമെന്ന ആഗ്രഹത്തോടെയാണ് ബഹിരാകാശത്തേക്ക് പോകുന്നതെന്നും ഈ അനുഭവം ആവേശഭരിതരാണെന്നുമാണ് യാത്രയ്ക്കു മുൻപ് ആക്‌സിയം സ്‌പേസ് നടത്തിയ വാർത്താസമ്മേളനത്തിൽ റയാനയും അലി അൽ ഖർനിയും പറഞ്ഞത്.

സൗദി യുവാക്കളുടെ കഴിവുകളിൽ വിശ്വാസമർപ്പിച്ച നേതൃത്വത്തിനാണ് എല്ലാ നന്ദിയും. ബഹിരാകാശത്തേക്ക് പോകുന്ന ആദ്യത്തെ സൗദി, അറബ് മുസ്‌ലിം വനിത എന്ന നിലയിൽ രാജ്യത്തെ പ്രതിനിധീകരിക്കുന്നതിൽ അഭിമാനിക്കുന്നുവെന്നും റയാന പറയുന്നു. 10 വർഷമായി ശാസ്ത്ര, മെഡിക്കൽ ഗവേഷണ മേഖലകളിൽ പ്രവർത്തിക്കുന്നു. ബഹിരാകാശത്തേക്ക് പോകുന്നുവെന്ന് മുത്തശ്ശി അറിഞ്ഞപ്പോൾ 60 വർഷത്തിലേറെ പഴക്കമുള്ള രണ്ടു കമ്മലുകളാണ് സമ്മാനമായി തന്നതെന്ന് അവർ പറഞ്ഞത് ഒരു കുട്ടിയുടെ കൗതുകച്ചിരിയോടെയാണ്.

സൗദിക്കാരൻ എന്ന നിലയിൽ ശാസ്ത്ര പുരോഗതിയുടെ എല്ലാ മേഖലകളിലും മാന്യമായ സാന്നിധ്യം ഉറപ്പിച്ചിരിക്കയാണെന്ന് അലി അൽഖർനി പറയുന്നു. വ്യോമസേനയിൽ പൈലറ്റായി ജോലി ചെയ്ത അനുഭവ സമ്പത്തുമായി ബഹിരാകാശത്ത് പരീക്ഷണങ്ങൾ നടത്താൻ കാത്തിരിക്കുകയാണെന്നാണ് അദ്ദേഹം പുറപ്പെടും മുൻപ് പറഞ്ഞത്.

∙ യുഎസിലെ പരിശീലനം

യാത്രയ്ക്ക് തയാറെടുക്കാൻ തീവ്രമായ പ്രത്യേക പരിശീലനമാണ് ഇരുവരും നേടിയത്. റയാനയും അലിയും യുഎസിൽ ഒരു വർഷത്തോളം നീണ്ട കഠിന പരിശീലനത്തിനു ശേഷമാണ് ബഹിരാകാശയാത്രയ്ക്ക് ഒരുങ്ങിയത്. മികച്ച കഴിവുകളും അനുഭവപരിചയവും ഉയർന്ന ശാരീരികക്ഷമതയും മാനസിക വഴക്കമുള്ളവരുമാണിവർ. ബഹിരാകാശ പരിസ്ഥിതിയുമായി പൊരുത്തപ്പെടാൻ ഇത് അവരെ പ്രാപ്തരാക്കി. എൻജിനീയറിങ്, റോബട്ടിക്‌സ്, ലൈഫ് സപ്പോർട്ട് സിസ്റ്റങ്ങൾ എന്നിങ്ങനെ വിവിധ മേഖലകളിൽ ഇവർ അസാധാരണമായ കഴിവ് പ്രകടിപ്പിക്കുകയും ചെയ്തു. ഇവരുടെ ബഹിരാകാശ ദൗത്യം ബഹിരാകാശം തൊട്ടതോടെ ഗവേഷണ മേഖലയിൽ സൗദി അറേബ്യയ്ക്കു മുന്നിൽ പുതിയ യുഗമാണ് തുറക്കുന്നത്. 

English Summary: Story of Rayyana Barnawi, the First Woman Astronaut from Saudi Arabia