ഗൾഫ് രാജ്യമായ സൗദി അറേബ്യ ജാപ്പനീസ് സാങ്കേതിക വിദ്യയാണ് നിരത്തിലെ താപനില കുറയ്ക്കാൻ ഉപയോഗിച്ചത്. ജാപ്പനീസ് കമ്പനിയായ സുമിറ്റോമോയുമായി ചേർന്നായിരുന്നു പദ്ധതി. കാൽനടക്കാർ ഉപയോഗിക്കുന്ന നടപ്പാതകളിലെ താപം കുറയ്ക്കുകയായിരുന്നു ലക്ഷ്യം. ജപ്പാനിൽ ടോക്കിയോ ഒളിംപിക്സിനോട് അനുബന്ധിച്ചും താപനില കുറയ്ക്കുന്നതിനുള്ള ശ്രമങ്ങൾ നടത്തിയിരുന്നു. ഇതിന് പുറമെ  ചൂട് ആഗിരണം ചെയ്യാൻ സഹായിക്കുന്ന തരം കുറ്റിച്ചെടികളും ജപ്പാനിൽ റോഡരികിൽ നട്ടുപിടിപ്പിച്ചിട്ടുണ്ട്.

∙ നീല റോഡ് ലോകം അറിഞ്ഞത് ഖത്തറിലൂടെ

2022 ൽ ലോകകപ്പിന്റെ ആതിഥേയത്വം വഹിക്കാനൊരുങ്ങിയ ഖത്തർ നേരിട്ട പ്രധാന പ്രശ്നം രാജ്യത്തെ കഠിനമായ താപനിലയായിരുന്നു. പ്രധാന നിരത്തുകളിലെ താപനില കുറയ്ക്കുക എന്ന ഉദ്ദേശത്തോടെ തലസ്ഥാനമായ ദോഹയിലെ തിരക്കേറിയ നിരത്തിനെ നീലയാക്കി മാറ്റാനാണ് തീരുമാനിച്ചത്. ലൊസാഞ്ചൽസ്, മക്ക, ടോക്കിയോ എന്നിങ്ങനെയുള്ള  പ്രധാന സ്ഥലങ്ങളിൽ നീലനിറം പൂശിയ റോഡുകൾ വർഷങ്ങൾക്ക് മുൻപേ പ്രത്യക്ഷപ്പെട്ടെങ്കിലും ലോകത്തിന്റ ശ്രദ്ധ ആകർഷിച്ചത് ഖത്തർ അവരുടെ റോഡുകളെ നീലനിറത്തിൽ മുക്കിയെടുത്തപ്പോഴാണ്.

പരീക്ഷണമെന്ന രീതിയിലാണ് ഖത്തർ  റോഡിൽ ആദ്യമായി നീലനിറം പൂശിയത്. ചൂടിനെ പ്രതിഫലിപ്പിക്കുന്ന നിറം പൂശിയ റോഡിൽ താപനില കുറയുന്നുണ്ടോ എന്ന് പരിശോധിക്കാനായി സെൻസറുകളും സ്ഥാപിച്ചു. താപനിലയിലെ വ്യത്യാസം അറിയുന്നതിനായി ഇതിനോട് ചേർന്നുള്ള ടാറിട്ട കറുത്തപ്രതലമുള്ള റോഡിലും സെൻസറുകൾ വച്ചിട്ടുണ്ട്. സൗരവികിരണത്തിന്റെ 50 ശതമാനം വരെ ആഗിരണം ചെയ്യാതെ പ്രതിഫലിപ്പിക്കുന്നതിനാൽ  നീലനിറം പൂശിയ റോഡിലെ താപനിലയിൽ വലിയ കുറവുണ്ടാകുമെന്നാണ് കണക്കാക്കുന്നത്. ഖത്തറിന്റെ പൊതുമരാമത്ത് അതോറിറ്റിയായ അഷ്ഗാൽ താപനിലയിലുണ്ടാകുന്ന മാറ്റം നിരീക്ഷിക്കുന്നുമുണ്ട്.  ജാപ്പനീസ് സാങ്കേതിക വിദ്യയിലാണ് ഖത്തർ റോഡിന് നീല നിറം നൽകിയത്. ഇതിനായി ഉപയോഗിക്കുന്ന വസ്തുക്കളെ കുറിച്ചുള്ള വിവരം ലഭ്യമല്ല. ചൂട് ആഗിരണം ചെയ്യുന്ന പദാർഥം മൂന്ന് കോട്ടുകളായാണ് അടിക്കുന്നത്. 

∙ പ്ലാസ്റ്റിക് ‘തിന്നും’ റോഡ് പരിസ്ഥിതിക്ക് അനുയോജ്യം

ബംഗാളിൽ ഇപ്പോൾ നിർമ്മിക്കപ്പെട്ട റോഡ് നീല നിറം കൊണ്ടാണ് വ്യത്യസ്തമാകുന്നതെങ്കിലും അതിലെ നിർമ്മാണത്തിൽ പ്ലാസ്റ്റിക് മാലിന്യം ഉപയോഗിച്ചിട്ടുണ്ടെന്നതും പ്രത്യേകം പറയേണ്ടതാണ്. ഒരു ഗ്രാമീണ റോഡിന്റെ നിർമാണത്തിന് ഇത്രയും പാരിസ്ഥിതിക പ്രാധാന്യം അധികാരികള്‍ നൽകിയത് പ്രശംസനീയമാണ്. നമ്മുടെ രാജ്യത്ത് റോഡ് നിർമ്മാണത്തിൽ പ്ലാസ്റ്റിക് ഉപയോഗിക്കാൻ ആരംഭിച്ചിട്ട് വർഷങ്ങളേറെയായി. 2004ൽ ചെന്നൈ നഗരത്തിൽ ആയിരം കിലോ പ്ലാസ്റ്റിക് ഉപയോഗിച്ച് റോഡ് നിർമിച്ചിരുന്നു.

ചെന്നൈയ്ക്ക് പിന്നാലെ ജംഷഡ്പൂരിലും അഗർത്തലയിലും സമാനമായ സാങ്കേതിക വിദ്യയിൽ റോഡുകൾ നിർമ്മിക്കപ്പെട്ടു. നഗരങ്ങളിലെ തദ്ദേശ ഭരണകൂടങ്ങൾക്ക് തലവേദനയാകുന്ന പ്ലാസ്റ്റിക് മാലിന്യം കുറയ്ക്കുന്നതിന് വേണ്ടി റോഡ് നിർമിക്കുമ്പോൾ ടാറിനൊപ്പം പ്ലാസ്റ്റിക് മാലിന്യവും കൂട്ടിച്ചേർക്കാൻ 2015 നവംബറിൽ കേന്ദ്ര സർക്കാർ നിർദ്ദേശം നൽകിയിരുന്നു. കഴിഞ്ഞ വർഷം 3000 കിലോ പ്ലാസ്റ്റിക് ഉപയോഗിച്ച് ബെംഗളൂരു നഗരത്തിന്റെ ഔട്ടർ റിങ് റോഡുമായി ചേരുന്ന റോഡ് നിർമിച്ചിരുന്നു. രാജ്യത്ത് ഉദ്ദേശം 703 കിലോമീറ്ററോളം ദേശീയ പാത പ്ലാസ്റ്റിക് മാലിന്യം ഉപയോഗിച്ച് നിർമിച്ചിട്ടുണ്ട്. 

∙ പ്ലാസ്റ്റിക് റോഡില്‍ കേരളവും മുന്നിൽ, വരുമോ നീല റോഡ്!

സംസ്‌കരിച്ച പ്ലാസ്റ്റിക് മാലിന്യം റോഡ് നിർമാണത്തിനുപയോഗിക്കുന്നതിൽ കേരളവും ഒട്ടും പിന്നിലല്ല.  4967.31 കിലോമീറ്റർ റോഡ് നിർമ്മാണത്തിൽ പ്ലാസ്റ്റിക് മാലിന്യം ഉപയോഗിച്ചിട്ടുണ്ട്. ഹരിതകർമസേന പ്രവർത്തകരുടെയും തദ്ദേശസ്വയംഭരണ  സ്ഥാപനങ്ങളുടെയും സഹായത്തോടെ ക്ലീൻ കേരള  കമ്പനി ശേഖരിച്ച പ്ലാസ്റ്റിക് മാലിന്യങ്ങളാണ് റോഡ് നിർമ്മാണത്തിന് ഉപയോഗിക്കുന്നത്. 2800 മെട്രിക് ടൺ പ്ലാസ്റ്റിക് മാലിന്യമാണ് ഇതിനകം ഉപയോഗിച്ചതെന്ന് സർക്കാർ രേഖകൾ വ്യക്തമാക്കുന്നു. 

ആഗോളതാപനം, പ്ലാസ്റ്റിക് മാലിന്യം ഉയർത്തുന്ന പാരിസ്ഥിതിക പ്രശ്നങ്ങൾ എന്നിവ ചെറുക്കാൻ വലിയ പ്രാധാന്യമാണ് ലോകമെമ്പാടുമുള്ള ഭരണകൂടങ്ങൾ നൽകുന്നത്. ഇതിന്റെ മികച്ചൊരു ഉദാഹരണമാണ് ബംഗാളിൽ പിറന്ന നീല റോഡ്. ഇക്കാര്യത്തിൽ ബംഗാളിന്റെ പാത കേരളവും പിന്തുടരുമെന്ന് കരുതാം. 

English Summary: India's First Eco-Friendly Blue Road with Plastic Waste is Built in a Bengali Village