പ്രമേഹ രോഗ ചികിത്സയിൽ  ഏറ്റവും കൂടുതൽ ഗവേഷണം നടന്നുകൊണ്ടിരിക്കുന്ന മേഖലയാണ് ടൈപ് ടു ഡയബറ്റിസ്. അതു വരാനുള്ള കാരണങ്ങളെല്ലാം ഏകദേശം ശാസ്ത്രത്തിന് ഇപ്പോൾ അറിയാം. പതിനാലോളം കാരണങ്ങളാണ് ഇപ്പോൾ വ്യക്തമായിട്ടുള്ളത്. ദിവസം മുഴുവൻ ഇരുന്നു ജോലി ചെയ്യുക, വ്യായാമം ഇല്ലാത്ത ജീവിത രീതി, തിരക്കോ മാനസിക സംഘർഷങ്ങളോ കാരണം ഏഴുമണിക്കൂറെങ്കിലും ഉറക്കം കിട്ടാതിരിക്കുക, വയറിനു ചുറ്റുമുള്ള അമിത വണ്ണം, പുകവലി, ഉയർന്ന രക്ത സമ്മർദം, ഉയർന്ന കൊളസ്ട്രോൾ എന്നിവയും പ്രമേഹ രോഗ സാധ്യത കൂട്ടുന്ന ഘടകങ്ങളാണ്.

പ്രമേഹ രോഗ നിർണയത്തിന്റെ പ്രാധാന്യം വർധിപ്പിക്കുന്നത് ഈ രോഗം കാരണം വരാൻ സാധ്യതയുള്ള മറ്റു രോഗങ്ങളാണ്. ഇപ്പോൾ ഉപയോഗത്തിലുള്ള പുതിയ വാക്ക് ‘ഡയബസിറ്റി’യാണ് ഡയബറ്റിസും ഒബിസിറ്റിയും (അമിതവണ്ണം) ചേർന്ന അവസ്ഥയാണിത്. അമിതമായ കൊഴുപ്പു കാരണം ശരീരത്തിന്റെ ഭാരവും കുടവയറും വർധിക്കുന്ന സാഹചര്യമാണ് ഒബിസിറ്റി, അതോടൊപ്പം ഡയബറ്റിസും കൂടി ചേരുമ്പോഴുണ്ടാകുന്ന മഹാമാരിയാണത്. ഡയബറ്റിസിന്റെ അനന്തര ഫലങ്ങൾ ഇന്നു നമുക്ക് അറിയാം. ഹൃദ്രോഗ മരണങ്ങൾ, കാൽപാദങ്ങളിലെ ഉണങ്ങാത്ത മുറിവുകൾ, വ്രണങ്ങൾ, പക്ഷാഘാതം, അന്ധത, മാനസിക സംഘർഷം, ലൈംഗികശേഷിയിലെ നഷ്ടം എന്നിവയെല്ലാം അതിലുൾപ്പെടും.

രക്തത്തിലെ പഞ്ചസാരയുടെ അളവു കൂടുതലാണെങ്കിൽ ഒരു അപകടം സംഭിച്ചാൽപോലും അത് കൂടുതൽ സങ്കീർണതയിലേക്കു നീങ്ങും. ഡയബറ്റിസിന്റെ ഏറ്റവും വലിയ പ്രത്യേകത, അത് എത്ര കൂടി നിന്നാലും പ്രത്യേകിച്ച് രോഗ ലക്ഷണങ്ങൾ അനുഭവപ്പെടാറില്ലെന്നതാണ്. മഞ്ഞപ്പിത്തം വരികയോ ശരീര വേദനയോ അനുഭവപ്പെടുകയോ ചെയ്താൽ നമുക്കു പെട്ടെന്നു ചികിത്സ തേടാനാകും. ഡയബറ്റിസ് അങ്ങനെയല്ല. വർഷങ്ങളോളം അത് അങ്ങനെനിന്ന് മറ്റൊരു ഗുരുതര രോഗത്തിലേക്കു നീങ്ങുമ്പോൾ മാത്രമാണ് രോഗികൾ തിരിച്ചറിയുന്നത്. അങ്ങനെയാണ് രോഗികൾ ഈ രോഗത്തിനു മുന്നിൽ കബളിപ്പിക്കപ്പെടുന്നത്.

∙ പ്രമേഹ രോഗം നിർണയിക്കുന്നതിന് ഇപ്പോൾ അവലംബിക്കുന്ന മാർഗങ്ങൾ എന്തൊക്കെയാണ്? 

ടൈപ് ടു ഡയബറ്റിസ് വരാനുള്ള സാധ്യത കണ്ടുപിടിക്കാൻ ഇപ്പോൾത്തന്നെ പല മാർഗങ്ങളുണ്ട്. എച്ച്ബി എ വൺസി ( രക്തത്തിലെ മൂന്നുമാസത്തെ ഗ്ലൂക്കോസിന്റെ അളവ്) , പോസ്റ്റ് പ്രാൻഡിയൽ ഗ്ലൂക്കോസ് (വെറും വയറ്റിലെ ഗ്ലൂക്കോസും ആഹാരത്തിനു രണ്ടു മണിക്കൂറിനു ശേഷമുള്ള ഗ്ലൂക്കോസും പരിശോധിക്കുന്ന രീതി), താരതമ്യേന ചെലവു കുറഞ്ഞ മാർഗങ്ങളാണിവ. ഈ മാർഗങ്ങളിലൂടെ പ്രമേഹത്തിന്റെ സാധ്യതയുണ്ടോയെന്നും അതു പ്രാരംഭദിശയിലാണോ പ്രമേഹരോഗത്തിലേക്കു മാറിക്കഴിഞ്ഞോ എന്നിവയെല്ലാം നമുക്കു കണ്ടെത്താനാകും. രക്തത്തിലെ കൊളസ്ട്രോളിന്റെ അളവു കൂടുക, കുടവയർ, അമിത രക്ത സമ്മർദ്ദം, ശരീരത്തിന്റെ ഭാരക്കൂടുതൽ എന്നിവയൊക്കെ പ്രമേഹരോഗ സാധ്യതയിലേക്കു വിരൽ ചൂണ്ടുന്ന ഘടകങ്ങളാണ്.

∙ കുട്ടികളിലുൾപ്പെടെ കണ്ടു വരുന്ന ടൈപ് വൺ ഡയബറ്റിസിന്റെ ചികിത്സയിൽ പുതിയ കണ്ടെത്തൽ എന്തു സ്വാധീനമാണ് ഉണ്ടാക്കുക?

ടൈപ് വൺ ഡയബറ്റിസിൽ സൊമറ്റോസ്റ്റാറ്റിനു പങ്കില്ല. ഇപ്പോഴത്തെ കണ്ടെത്തൽ ടൈപ് ടു ഡയബറ്റിസുമായി ബന്ധപ്പെട്ടാണു നടത്തിയിരിക്കുന്നത്.

∙ പ്രമേഹ രോഗ പരിശോധനയിലെ ഇപ്പോഴത്തെ സംവിധാനങ്ങൾ എന്താണ്?

രാവിലെ എഴുന്നേറ്റ് വെറും വയറ്റിൽ രക്തം പരിശോധിക്കുമ്പോൾ അത് നൂറിൽ കൂടുതലാണെങ്കിൽ പ്രമേഹ രോഗ സാധ്യതയാണ് അതു നമുക്കു കാട്ടിത്തരുന്നത്. ആഹാരം കഴിച്ച് രണ്ടുമണിക്കൂർ ശേഷം 140ൽ കൂടുതലാണെങ്കിൽ അതും പ്രമേഹ രോഗ സാധ്യതയാണു കാട്ടിത്തരുന്നത്. പ്രമേഹ പ്രാരംഭ അവസ്ഥയെന്നാണതിനെ വിശേഷിപ്പിക്കുന്നത്. ആഹാരത്തിനു മുൻപുള്ള ഗ്ലൂക്കോസിന്റെ അളവ് 126 ആകുമ്പോഴുംആഹാരത്തിനു ശേഷം രണ്ടു മണിക്കൂർ കഴിഞ്ഞ് 200 ആകുമ്പോഴുമാണ് പ്രമേഹം എത്തിക്കഴിഞ്ഞു എന്നു പറയാനാകുന്നത്.

മൂന്നു മാസത്തെ ശരാശരിയായ എച്ച്ബിഎവൺസി 5.7 ആകുമ്പോഴേക്കും അത് പ്രമേഹ പ്രാരംഭ അവസ്ഥയും 6. 5ആകുമ്പോൾ അത് തീർത്തും പ്രമേഹം ആയിക്കഴിഞ്ഞുവെന്നും മനസ്സിലാക്കാം. വളരെ ആരംഭത്തിലേ തിരിച്ചറിഞ്ഞ് പ്രമേഹം തീരെ ഒഴിവാക്കാൻ കഴിയുന്ന ഒരു മാർഗമാണ് കണ്ടിന്യൂസ് ഗ്ലൂക്കോസ് മോണിറ്ററിങ്. ഓരോ 5 മിനിറ്റിലും 15 മിനിറ്റിലും ഗ്ലൂക്കേസിന്റെ അവവു തിരിച്ചറിഞ്ഞ് നമ്മുടെ ഭക്ഷണം വ്യായാമം എന്നിവയിൽ മാറ്റം വരുത്തിക്കൊണ്ടിരിക്കാം. ഇത് പ്രമേഹ ചികിത്സയ്ക്കു മാത്രമല്ല പ്രതിരോധത്തിനും പ്രധാന പങ്കു വഹിക്കുകയാണ്. ശരീരത്തിലെ ഇൻസുലിന്റെ അളവിന്റെ പരിശോധനയിലൂടെയും പ്രമേഹരോഗ സാധ്യത കണ്ടെത്താൻ കഴിയും.