അടച്ചിട്ട സിൽവർസ്റ്റോൺ സർക്യൂട്ടിൽ ചില ഭാഗങ്ങൾ നേരത്തേ തന്നെ ചിത്രീകരിച്ചിരുന്നു. അതിനു ശേഷമായിരുന്നു ജൂലൈ രണ്ടാം വാരത്തിൽ നടന്ന പരിശീലന, യോഗ്യതാ റൗണ്ടുകളും പ്രധാന റേസും സിനിമയ്ക്കായി ചിത്രീകരിച്ചത്. യഥാർഥ റേസിന്റെ ഇടവേളകളിലും തങ്ങൾക്കാവശ്യമായ ദൃശ്യങ്ങളെല്ലാം ചിത്രത്തിന്റെ അണിയറക്കാർ പകർത്തി. സർക്യൂട്ടിലെ ത്രസിപ്പിക്കുന്ന പോരാട്ട രംഗങ്ങളും പിറ്റ് ലെയ്നിലെ ടയർ മാറ്റത്തിന്റെ ദൃശ്യങ്ങളുമെല്ലാം ക്യാമറകൾ ഒപ്പിയെടുത്തു. 

പലർക്കും ബ്രാഡ് പിറ്റിനെ കണ്ട് കൗതുകമടക്കാനായിരുന്നില്ല. യഥാർഥ ഡ്രൈവർമാരുമായി പിറ്റ് ഇതിനിടെ കുശലാന്വേഷണം നടത്തുകയും ചെയ്തു. പക്ഷേ യഥാർഥ മത്സരത്തിലെ വിജയി വെസ്റ്റപ്പന് പ്രിറ്റിന്റെ വരവ് അത്ര പിടിച്ചില്ലെന്നാണു സംസാരം. ‘‘എന്തൊക്കെപ്പറഞ്ഞാലും സിനിമ എന്നത് ഒരു ഷോയല്ലേ? അതിൽ എല്ലാം യാഥാർഥ്യബോധത്തോടെ കാണിക്കാനാകുമോ? അവർ (സിനിമാസംഘം) ഇവിടെനിന്ന് ചില ഷോട്ടുകളൊക്കെ എടുക്കുമായിരിക്കും. പക്ഷേ എന്നെ സംബന്ധിച്ച് അതൊന്നും ഒരു വിഷയമേയല്ല...’’ എന്നായിരുന്നു സിനിമയെപ്പറ്റി ചോദിച്ചപ്പോൾ വെർസ്റ്റപ്പന്റെ മറുപടി. തന്റെ ഗ്രാൻപ്രി വിജയത്തേക്കാൾ ബ്രാഡ് പിറ്റിന്റെ ഷൂട്ടിനെപ്പറ്റിയുള്ള വാർത്ത വൈറലായതിന്റെ ചൊരുക്കായിരിക്കുമോ അദ്ദേഹത്തിന് എന്ന ചോദ്യവും ഉയരുന്നുണ്ട്.

ചിത്രത്തിന്റെ ആധികാരികത ഉറപ്പാക്കാനാണ് യഥാർഥ സർക്യൂട്ടിൽത്തന്നെ ചിത്രീകരണം വേണമെന്നു സംവിധായകൻ ശഠിച്ചതെന്നും റിപ്പോർട്ടുകളുണ്ട്. അതോടൊപ്പം ഗ്രാഫിക്സും സിജിഐയും കൂടി ചേരുന്നതോടെ ചിത്രം പ്രേക്ഷകമനസ്സിലൂടെ ഇരമ്പിപ്പായുമെന്നാണു പ്രതീക്ഷ. 2024 അവസാനമോ 2025 ആദ്യമോ ചിത്രം പുറത്തിറങ്ങും. ഒരു മാസത്തോളം തിയറ്ററിൽ പ്രദർശിപ്പിച്ചതിനു ശേഷമായിരിക്കും ആപ്പിൾ ടിവിയിൽ ചിത്രത്തിന്റെ സ്ട്രീമിങ്. ഈ രീതി അപൂർവമായാണ് ആപ്പിൾ അനുവദിക്കാറുള്ളത്. 

എഫ് 1 കഥകൾ പറഞ്ഞു കയ്യടി നേടിയ വമ്പൻ ചിത്രങ്ങളുടെ കൂട്ടത്തിലേക്കാണ് ബ്രാഡ് പിറ്റുമെത്തുന്നത്. ഏറെ പ്രേക്ഷകശ്രദ്ധ പിടിച്ചു പറ്റിയ റഷിനെയും സെന്നയെയുമെല്ലാം ഈ ചിത്രം കടത്തിവെട്ടുമോ എന്നതും കാത്തിരുന്നു കാണണം.

∙ റഷ് (2013)

ഫോർമുല വൺ ചരിത്രത്തിലെ കുപ്രസിദ്ധമായ വൈരാഗ്യത്തിന്റെ കഥ പറയുന്നതാണ് റഷ് എന്ന ഹോളിവുഡ് ചിത്രം. എഫ് വൺ സർക്യൂട്ടിന്റെ ഇന്നലെകളിൽ എരിഞ്ഞു നിൽക്കുന്ന ശത്രുതയാണ് ജെയിംസ് ഹണ്ടും നിക്കി ലൗഡയും തമ്മിലുണ്ടായിരുന്നത്. ഇരുവരും മികച്ച ഡ്രൈവർമാരും. പലപ്പോഴും ഇവരുടെ ശത്രുത ആരാധകരെ ആനന്ദിപ്പിക്കുന്ന മത്സരങ്ങളായി മാറി. എന്നാൽ, സർക്യൂട്ടിലെ ദുരന്തത്തിൽ നിക്കി ലൗഡയ്ക്കു ഗുരുതര പൊള്ളലേറ്റതു മറക്കാനാകാത്ത മുറിവായി. സുരക്ഷാഭിത്തിയിലിടിച്ചു തകർന്ന കാർ തീപിടിച്ചാണു ലൗഡയ്ക്കു പൊള്ളലേറ്റത്. എന്നാൽ, ഏതാനും ദിവസങ്ങൾക്കുള്ളിൽ അദ്ഭുതകരമായി തിരിച്ചെത്തി ലൗഡ ആരാധകരുടെ ആശങ്കയകറ്റി. ക്രിസ് ഹെംസ്‌വർത്ത് ജെയിംസ് ഹണ്ടായും ഡാനിയൽ ബുവൽ നിക്കി ലൗഡയായും വേഷമിട്ട ‘റഷ്’ എഫ് വൺ ആരാധകരെ ത്രസിപ്പിച്ച ചിത്രമായിരുന്നു. റോൺ ഹൊവാഡ് ആയിരുന്നു 2013ൽ റിലീസ് ചെയ്ത ചിത്രത്തിന്റെ സംവിധായകൻ. 

∙ സെന്ന (2010)

ലോക കായിക ചരിത്രത്തിലെത്തന്നെ ഏറ്റവും വലിയ ദുരന്തമെന്നാണ് അയർട്ടൻ സെന്നയുടെ മരണം അറിയപ്പെടുന്നത്. 34ാം വയസ്സിൽ ഇമോളയിലെ എഫ് വൺ സർക്യൂട്ടിൽ അപകടത്തിൽ മരിക്കുമ്പോൾ മൂന്നു ചാംപ്യൻഷിപ്പുകൾ സ്വന്തമാക്കിയിരുന്നു സെന്ന. ആസിഫ് കപാഡിയ സംവിധാനം ചെയ്ത ചിത്രത്തിൽ ജോൺ ബിസിഗ്നാനോയാണു സെന്നയുടെ വേഷം അഭിനയിച്ചത്. മൈക്കൽ ഷൂമാക്കർ, അലൈൻ പ്രോസ്റ്റ് തുടങ്ങിയ എഫ് വൺ താരങ്ങളും ചിത്രത്തിൽ അണിനിരന്നു. അയർട്ടൻ സെന്നയുടെ ജീവിതവും കായിക ജീവിതവും ദാരുണാന്ത്യവുമാണു ചിത്രത്തിന്റെ ഇതിവൃത്തം.

എഫ്1 സിനിമകളുടെ ആരംഭം മുതൽത്തന്നെ യഥാർഥ ട്രാക്കിലെ ചിത്രീകരണവും യഥാർഥ റോസിങ് രംഗങ്ങൾ ഉൾപ്പെടുത്തുന്നതും സംവിധായകരുടെ ഹരമായിരുന്നു. 1966ലിറങ്ങിയ ‘ഗ്രാൻ പ്രി’ അത്തരമൊരു ചിത്രമായിരുന്നു. സർ ഫ്രാങ്ക് വില്യംസ്, മൈക്കൽ ഷൂമാക്കർ, ജുവാൻ മാനുവൽ ഫാൻജിയോ തുടങ്ങി ഒട്ടേറെപ്പരുടെ കഥകൾ പറഞ്ഞ ഡോക്യുമെന്ററികളും എഫ് വൺ സിനിമാ പരമ്പരയിലുണ്ട്. സിനിമകളേക്കാളും ത്രസിപ്പിക്കുന്ന ‘ഒറിജിനൽ’ രംഗങ്ങൾ തിരശ്ശീലയിലേക്കു പകർത്തപ്പെടുമ്പോൾ ബ്രാഡ് പിറ്റിന്റെ പുതിയ ചിത്രവും സമ്മാനിക്കുക അദ്ഭുതങ്ങളായിരിക്കുമെന്നത് ഉറപ്പ്.

English Summary: Formula One Meets Hollywood: Brad Pitt's F1 Movie is Coming