പ്രളയത്തിന്റെ ആഘാതത്തില്‍ നിന്നും തിരിച്ച് കയറുന്ന കാഴ്ചകളാണ് ഡൽഹിയിലിപ്പോൾ. സ്ഥലംമാറ്റത്തെത്തുടർന്ന് ഇക്കഴിഞ്ഞ മേയ് 4ന് കൊച്ചിയിൽനിന്ന് ഞാൻ ഡൽഹിയിൽ എത്തിയ അന്നുമുതൽ ഈ കുറിപ്പെഴുതുന്ന ദിവസം വരെയും  ഇടവിട്ടിടവിട്ട് മഴ പെയ്തുകൊണ്ടേയിരിക്കുന്നു. ഇത്തരത്തിലുള്ള മഴ ഡൽഹിയിൽ പതിവില്ലാത്തതാണെന്നും നിങ്ങൾ കേരളത്തിൽനിന്ന് കൊണ്ടുവന്ന മഴയാണോ ഇതെന്നും പലരും ചോദിക്കുന്നുമുണ്ട്.

∙ മഴ തീരെയില്ലാത്ത നാട്ടിൽ കുടയെന്തിന്?

2023 ജൂലൈ 7ന് മഴ പതിവിലും കനത്തുതുടങ്ങിയപ്പോള്‍ ഡൽഹിയിൽ എവിടെയും ആഘോഷക്കാഴ്ചകളായിരുന്നു. ഇന്ത്യാ ഗേറ്റ് മുതൽ രാഷ്ട്രപതി ഭവൻ വരെ നീളുന്ന കർത്തവ്യപഥിൽ ആളുകൾ കൂട്ടത്തോടെ മഴ നനഞ്ഞു നടക്കുന്നു. കുടയെടുക്കാൻ താൽപര്യമില്ലാത്തവരാണ് ഡൽഹി ജനത. വർഷത്തിൽ ഏതാനും ദിനം ഏതാനും മിനിറ്റ് മാത്രം പെയ്യുന്ന മഴയ്ക്കായി എന്തിന് കുട വാങ്ങണം? അതെന്തിനു താങ്ങി നടക്കണം? എന്തൊരു അസൗകര്യമുളവാക്കുന്ന വസ്തു... എന്നിങ്ങനെയെല്ലാം ഒരു കൂട പ്രശ്നങ്ങളാണ് ഇവിടുള്ളവർക്ക് പറയാനുള്ളത്. മഴയെങ്കിൽ അത് നനഞ്ഞു പോകുക എന്നതാണ് ഇവിടെയുള്ളവരുടെ സ്റ്റൈൽ. എന്നാല്‍ ഇതിനിടയിലും കുടപിടിച്ചു നടക്കുന്നവരെ കണ്ടാൽ ഏകദേശം ഉറപ്പിക്കാം, അതൊരു മലയാളിയായിരിക്കും.

മഴ പിൻമാറാതെ വന്നതോടെ നഗരത്തിൽ പതിയെ വെള്ളക്കെട്ടു രൂപപ്പെട്ടുതുടങ്ങി. ഇതോടെ ആദ്യത്തെ ആഘോഷമൊക്കെ അവസാനിച്ചു. അങ്ങിങ്ങായി റോഡ് ഇടിഞ്ഞു താഴുന്ന സംഭവങ്ങളും റിപ്പോർട്ട് ചെയ്തുതുടങ്ങി. ഡൽഹിയിൽ വന്ന് സ്ഥലങ്ങളൊക്കെ പഠിച്ചുകൊണ്ടിരിക്കുന്ന സമയമായതിനാൽ കൊച്ചിയിലേതു പോലെ മഴപെയ്താൽ എവിടെയൊക്കെ വെള്ളം കയറും എന്നൊന്നും ധാരണയില്ലായിരുന്നു. 2018ല്‍ കേരളത്തിലുണ്ടായ മിന്നൽപ്രളയത്തിൽ എറണാകുളം ജില്ലയിലെ വിവിധ സ്ഥലങ്ങളിലെ അപകട ചിത്രങ്ങൾ ക്യാമറയിൽ പകർത്തിയതൊക്കെ ഈ സമയത്ത് ഓർത്തെങ്കിലും ഡൽഹിയിൽ അതിന് സമാനമായ ഒരു സാഹചര്യം ഉണ്ടാകാൻ പോകുന്നെന്ന് കരുതിയതേയില്ല.

∙ റീൽസും ആഘോഷവും

കനത്ത മഴയെത്തുടർന്ന് ജൂലൈ 8നുതന്നെ നഗരത്തിലെ അടിപ്പാതകളിൽ പതിയെ വെള്ളം കയറിത്തുടങ്ങിയിരുന്നു. മഴ ശക്തമായതിനാൽത്തന്നെ അടിപ്പാതകളിൽ വെള്ളം കയറുന്നത് സ്വാഭാവികമാണല്ലോ എന്ന ചിന്തയായിരുന്നു അപ്പോഴുണ്ടായിരുന്നത്. എന്നാൽ, അടുത്ത ദിവസവും ഇടവേളകളിൽ ഒളിഞ്ഞും തെളിഞ്ഞും പെയ്ത മഴയിൽ കർത്തവ്യപഥിലെ റോഡും പുൽത്തകിടിയുമെല്ലാം വെള്ളക്കെട്ടിലമർന്നു. അതോടെ അവിടെ വെള്ളക്കെട്ടിൽ ചാടിക്കളിക്കാനും റീൽസ് എടുക്കാനുമെല്ലാം ആളുകളുടെ ബഹളമായി.

രാവിലെ താമസ സ്ഥലത്തുനിന്ന് മെട്രോ ട്രെയിനിൽ വരുമ്പോൾ യമുനാനദി കുറുകെ കടക്കേണ്ടതുണ്ട്. മാലിന്യം നിറഞ്ഞു കറുത്ത് ഒഴുകിയിരുന്ന നദി പതിയെ നിറം മാറി കലങ്ങി ഒഴുകിത്തുടങ്ങുന്നത് ശ്രദ്ധയിൽപ്പെട്ടിരുന്നു. ഉച്ചയോടെ പെയ്ത കനത്ത മഴയിൽ, പുതിയ പാർലമെന്റിന് മുന്നിലെ ‘അമൻ സർക്കിളി’നു ചുറ്റും വെള്ളം കയറിയിരിക്കുന്നു. മനോരമ ഓഫിസ് സ്ഥിതി ചെയ്യുന്ന റാഫി മാർഗിലെ ഐഎൻഎസ് ബിൽഡിങ്ങിൽനിന്ന് ഇവിടേക്ക് നടന്നു പോകാവുന്ന ദൂരമേയുള്ളൂ, പക്ഷേ നടപ്പാതയിൽ ഉൾപ്പെടെ വെള്ളം നിറഞ്ഞിരിക്കുന്നു. അതിന്റെ അരികു ചേർന്ന് ഷൂസ് നനയാതെ നടന്നു പോകാൻ പരമാവധി ശ്രമിച്ചു.