186 ദിവസം, അതായത് 4400 മണിക്കൂറിലേറെ, ഈ സമയമത്രയും ബഹിരാകാശത്തു ജീവിതം. ഏറ്റവുമധികം സമയം ബഹിരാകാശത്തു ചെലവഴിച്ച യുഎഇ ബഹിരാകാശ സഞ്ചാരിയെ കാത്തിരിക്കുകയാണ് രാജ്യം. ആറു മാസത്തെ ബഹിരാകാശയാത്ര പൂർത്തിയാക്കി സുൽത്താൻ അൽ നെയാദി സെപ്റ്റംബർ 4നു രാവിലെയാണു ഭൂമിയെ തൊട്ടത്. യുഎസിലെ ഫ്ലോറിഡയിൽ ‘ലാൻഡ്’ ചെയ്ത അൽ നെയാദി യുഎഇയിലേക്ക് എത്തുമ്പോൾ വൻ സ്വീകരണമൊരുക്കാൻ ഒരുങ്ങുകയാണ് ഭരണാധികാരികളും ജനങ്ങളും.

അറബ് ചരിത്രത്തിലെ ഏറ്റവും ദൈർഘ്യമേറിയ ബഹിരാകാശ ദൗത്യവും ആദ്യ ബഹിരാകാശ നടത്തം (സ്പേസ് വോക്ക്) പൂർത്തിയാക്കി ഭൂമിയിലെത്തിയ അൽ നെയാദിയുടെ പേരിൽ ചരിത്രം രേഖപ്പെടുത്തിയത് ഒട്ടേറെ റെക്കോർഡുകളാണ്. എന്തുകൊണ്ടാണ് നെയാദിയുടെ ബഹിരാകാശ യാത്ര യുഎഇക്ക് ഇത്രയേറെ പ്രധാനപ്പെട്ടതാകുന്നത്? എന്തൊക്കെയാണ് ഈ നാൽപ്പത്തിരണ്ടുകാരൻ കൈവരിച്ച നേട്ടങ്ങൾ?

∙ അൽ നെയാദിയെ കാത്ത് യുഎഇ

സെപ്റ്റംബർ 4നു യുഎഇ സമയം രാവിലെ 8.17ന് ആണ് സുൽത്താൻ അൽനെയാദിയും സംഘവും രാജ്യാന്തര ബഹിരാകാശ നിലയത്തിൽനിന്ന് (ഐഎസ്എസ്) മടങ്ങിയെത്തിയത്. ഫ്ലോറിഡയിലെ ജാക്സൺ വില്ലെ തീരത്തെ സമുദ്രത്തിലായിരുന്നു സഞ്ചാരികളെ വഹിച്ച സ്പേസ് എക്സ് ഡ്രാഗൺ ബഹിരാകാശ പേടകം ഇറങ്ങിയത്. 17 മണിക്കൂർ നീണ്ട യാത്രയ്ക്കൊടുവിലായിരുന്നു സംഘം ഭൂമിയെ തൊട്ടത്. സുൽത്താൻ അൽ നെയാദിക്കൊപ്പം യുഎസ് ബഹിരാകാശ യാത്രികരായ സ്റ്റീഫൻ ബോവർ, വുഡി ഹോബർഗ്, റഷ്യൻ ബഹിരാകാശ യാത്രികൻ ആന്ദ്രേ എന്നിവരും സംഘത്തിലുണ്ടായിരുന്നു. 

ഭൂമിയിൽ തിരിച്ചെത്തിയെങ്കിലും യുഎഇയിലെത്താൻ ഇനിയും ദിവസങ്ങളെടുക്കും. ടെക്സസിൽ എത്തി കുടുംബാംഗങ്ങളെ കണ്ട അൽ നെയാദിക്കും സംഘത്തിനും വിശദമായ മെഡിക്കൽ പരിശോധന നടത്തേണ്ടതുണ്ട്. ആറു മാസം ബഹിരാകാശത്തു കഴിഞ്ഞതിനാൽ ഗുരുത്വാകർഷണവുമായി പൊരുത്തപ്പെടാൻ ഫിസിയോതെറപ്പി ഉൾപ്പെടെയുള്ള ചികിത്സകൾ നടത്തും. സെപ്റ്റംബർ മൂന്നാം വാരത്തോടെയാകും അൽ നെയാദി ജന്മനാടായ യുഎഇയിൽ എത്തുക. അതിനിടെ, താൻ ആരോഗ്യവാനായിരിക്കുന്നതായും പ്രിയപ്പെട്ടവരെ കാണാനായി ഉടനെയെത്തുമെന്നും അൽ നെയാദി ട്വീറ്റ് ചെയ്തിട്ടുണ്ട്.

അൽ നെയാദിയുടെ സംഘം ഭൂമിയിൽ എത്തിയതിനു തൊട്ടുപിന്നാലെ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ അഭിനന്ദന സന്ദേശവും എത്തിയിരുന്നു. ‘ഒരു രാജ്യത്തിന്റെ സ്വപ്നങ്ങൾ നിങ്ങൾ യാഥാർഥ്യമാക്കി’ എന്നാണ് പ്രസിഡന്റ് കുറിച്ചത്. യുഎഇയിലെത്തുന്ന അൽ നെയാദിക്കു വൻ സ്വീകരണമൊരുക്കാനുള്ള ഒരുക്കങ്ങളിലാണിപ്പോൾ യുഎഇ. എങ്ങും അൽ നെയാദിക്കു സ്വാഗതമാശംസിക്കുന്ന ബോർഡുകളാണ്. യുഎഇയിലെ സ്വീകരണ പരിപാടികൾക്കു ശേഷം നെയാദി വീണ്ടും പരീക്ഷണങ്ങളുടെ തുടർച്ചയ്ക്കായി നാസയിലേക്കുതന്നെ മടങ്ങും.

∙ ആകാശത്തെ തക്കാളി ഭൂമിയിൽ വേവുമോ?

2023 മാർച്ച് രണ്ടിനാണ് ഫ്ലോറിഡയിലെ നാസയുടെ കെന്നഡി സ്പേസ് സെന്ററിൽനിന്ന് സ്പേസ് എക്സ് ഫാൽക്കൺ–9 റോക്കറ്റിൽ നെയാദിയും സംഘവും യാത്ര തിരിച്ചത്. യുഎഇയുടെ ദേശീയ ബഹിരാകാശ പദ്ധതിക്കു കീഴിൽ യുഎഇ ആസ്ട്രോനെറ്റ് പ്രോഗ്രാമിന്റെ ഭാഗമായാണ് അൽ നെയാദി ബഹിരാകാശത്തേക്കു യാത്ര തിരിച്ചത്.

ആറു മാസത്തെ ബഹിരാകാശ വാസത്തിനിടെ ഇരുനൂറിലേറെ പരീക്ഷണങ്ങൾ അൽ നെയാദിയും സംഘവും നടത്തി. നാസയുമായി ബന്ധപ്പെട്ടതും യുഎഇയിലെ വിവിധ സർവകലാശാലകൾക്കു വേണ്ടിയുള്ളതുമായ ഒട്ടേറെ ശാസ്ത്ര ഗവേഷണഫലങ്ങളും അൽ നെയാദി ഭൂമിയിലേക്കയച്ചു. ഇതിൽ ഏറ്റവും പ്രധാനപ്പെട്ടത് തക്കാളി വിളവെടുപ്പിന്റെ ഗവേഷണഫലമാണ്. രാജ്യാന്തര ബഹിരാകാശ നിലയത്തിലെ ചെറിയ ഗ്രീൻ ഹൗസ് ഫാമിൽ ആണു ‘കുള്ളൻ തക്കാളി’ ഉൽപാദിപ്പിച്ചത്. ഈ തക്കാളി ഉപയോഗിച്ച് വരുംകാലത്ത് ഭൂമിയിൽ അത്യുൽപാദന ശേഷിയുള്ള കൃഷിക്കു സാധിക്കുമെന്നാണു കരുതുന്നത്.