പോയിവരുമ്പോൾ ‘ദ്വീപുണ്ട’ മറക്കല്ലേ! സുന്ദരമായ കാഴ്ചകൾ മാത്രമല്ല രുചിയുമുണ്ട് ലക്ഷദ്വീപിന്, ചൂരയുടെ നല്ല ‘മാസ്’ രുചി

പൊട്ടിച്ച തേങ്ങയുടെ വെള്ളം ഒരു ജഗിൽ ഞങ്ങൾക്കു കൊണ്ടുവന്നു തന്നു. നാട്ടുവർത്തമാനവും സൊറപറച്ചിലുമൊക്കെ ഇടകലർത്തിയാണ് അവർ തേങ്ങ ചിരകുന്നത്. കുട്ടികളും ഇവർക്കൊപ്പമുണ്ട്. ചിരകി കഴിഞ്ഞ തേങ്ങ അടുപ്പിലെ ഉരുളിയിലേക്കിട്ട് ഇളക്കാൻ തുടങ്ങി. മണിക്കൂറുകൾ ഇങ്ങനെ ഇളക്കികൊണ്ടിരിന്നു. തെങ്ങിന്റെ മടലും കൊതുമ്പും കോഞ്ഞാട്ടയും ചകിരിയുമൊക്കെയാണ് ഇന്ധനമാകുന്നത്. ഉരുളി നന്നായി ചൂടായാൽ പിന്നീട് നിയന്ത്രിതമായി തീ കത്തിച്ചാൽ മതിയാകും. തേങ്ങ പരുവമായാൽ ഉരുക്കി വച്ചിരിക്കുന്ന ശർക്കരപാനി തേങ്ങയിലേക്ക് ചേർക്കും. എണ്ണയോ നെയ്യോ ഒന്നും ഈ മിശ്രിതത്തിൽ ഇവർ ചേർക്കില്ല. എന്നാൽ തേങ്ങയിൽ നിന്നുള്ള എണ്ണ ഉരുളിയിൽ തെളിഞ്ഞുകാണാം.

ഈ പലഹാരത്തിന്റെ പാചകത്തിൽ ഇളക്കിന് വലിയ സ്ഥാനമുണ്ട്. മിശ്രിതം ചുവട്ടിൽ പിടിച്ചാൽ പലഹാരത്തിന് കരിഞ്ഞ ചുവയുണ്ടാകും അതുകൊണ്ടുതന്നെ അവർ ഊഴമനുസരിച്ച് ഇളക്കികൊണ്ടിരിക്കും. ശർക്കര ചേർത്തതിനുശേഷവും ഏകദേശം ഒരുമണിക്കൂറോളം ഇളക്കൽ തുടർന്നു. മിശ്രിതം ഏതാണ്ടൊരുപരുവമായപ്പോൾ അവരിൽ മുതിർന്ന ആൾ തേങ്ങ കയ്യിലെടുത്ത് ഒന്ന് ഉരുട്ടി നോക്കി. ഉണ്ട പിടിക്കാനുള്ള പരുവമായേ, അവർ പറഞ്ഞതു പ്രകാരം വീട്ടിലെ ചേട്ടനെത്തി അടുപ്പിൽ നിന്ന് ഉരുളിവാങ്ങി പുറത്തേയ്ക്കുവച്ചു. എന്നാൽ അടുപ്പിൽ നിന്ന് മാറ്റിയതിനുശേഷവും ഇവർ ഇളക്കുതുടർന്നുകൊണ്ടിരുന്നു. മിശ്രിതം ചുവട്ടിൽ പിടിക്കാതിരിക്കുന്നതിനും ചൂട് ചെറുതായൊന്നു ശമിക്കുന്നതിനുമാണ് ഇങ്ങനെ ചെയ്യുന്നത്. ചൂട് കൃത്യമായെങ്കിൽ മാത്രമേ ഉരുളകൾ ഉരുട്ടാൻ തുടങ്ങാനാവൂ. ചൂടുകുറഞ്ഞതോടെ അവർ തങ്ങളുടെ അടുക്കളയിൽ നിന്ന് ചിരവകളും കൊരണ്ടികളുമൊക്കെയെടുത്ത് ഉരുളിക്കുചുറ്റുമിരുന്നു ഉരുളകൾ കൈവെള്ളയിൽ വച്ച് ഉരുട്ടിനോക്കിയും വീണ്ടും ഇളക്കിയും ഇവർ മിശ്രിതത്തിന്റെ ചൂട് ക്രമപ്പെടുത്തി.

തുടർന്ന് ഉണ്ടകൾ ഉരുട്ടാൻ ആരംഭിച്ചു. മിതമായ ചൂടിൽ തന്നെയാണ് ഉണ്ടകൾ ഉരുട്ടേണ്ടത്. മിശ്രിതത്തിന് നല്ല ചൂടുണ്ടെന്ന് ഇവർ ഉരുളകൾ എടുക്കുന്നതുകാണുമ്പോൾ മനസ്സിലാകും. ഒരു ഉരുളിയിലെ മിശ്രിതംകൊണ്ട് 150 ഉണ്ടകൾവരെ ഉണ്ടാക്കാനാവും. എണ്ണ തൊട്ടെടുക്കാവുന്നവിധം നനവുള്ള ഈ ഉണ്ടകളിൽ കശുവണ്ടിയോ ഉണക്കമുന്തിരിയോ ഒന്നും ചേർക്കുന്നില്ല. എന്നാൽ തേങ്ങായും ശർക്കരയും മാത്രമാണ് ഇതിലുള്ളതെന്ന് പലഹാരം കഴിച്ചുനോക്കുന്നവർ സമ്മതിക്കില്ല. കാഴ്ചയിൽ തന്നെ കൊതിയൂറുന്ന ഈ ഉണ്ടകൾ രുചിയിലും അതിവിശിഷ്ടമാണ്. ഉണ്ടകൾ ഉരുട്ടികഴിഞ്ഞാൽ ഇവർ അവ തളികകളിൽ നിരത്തിവച്ച് വീണ്ടും തണുക്കാൻവയ്ക്കും. ഇനി സന്ധ്യകഴിയുമ്പോൾ ഇവർ വീണ്ടും ഒത്തുകൂടും. ഈ ഉണ്ടകൾ പൊതിയുന്നതാണ് അടുത്ത നടപടി.

ഇതിനായി വാഴയിലകൾ നേരത്തെവെട്ടി വെയിലത്ത് വാട്ടി ഉണക്കി വച്ചിട്ടുണ്ടാവും. ഈ വാഴയിലകളിൽ ഓരോ ഉണ്ടയായി എടുത്തുവച്ച് രണ്ടു വശങ്ങളും പിരിച്ച് വാഴനാരുകൊണ്ട് കെട്ടും. തുടർന്ന് ഇലയുടെ ബാക്കിഭാഗം കത്രികകൊണ്ട് മുറിച്ചുകളയും ഇതോടെ ദ്വീപുണ്ട വിപണനത്തിന് തയാറായികഴിയും. 12 രൂപ മുതൽ 15 രൂപവരെയാണ് ദ്വീപുണ്ടക്ക് വില. അസാധ്യരുചിയുള്ള ലക്ഷദ്വീപിന്റെ തനതുപലഹാരമായ ദ്വീപുണ്ടക്ക് ലോകമെങ്ങും ആരാധകരുണ്ട്. ഇവിടെയെത്തുന്നവർ ഈ ദ്വീപുണ്ടയുമായാണ് നാട്ടിലേക്ക് മടങ്ങുന്നത്.