INDEPENDENCE DAY SPECIAL

കിളച്ചുമറിച്ച് ഉപ്പുസത്യഗ്രഹം തകർക്കാന്‍ ശ്രമിച്ച പൊലീസ്: ആഭരണം ഗാന്ധിജിക്ക് നല്‍കിയ പെൺകുട്ടി: അപ്പുക്കുട്ട പൊതുവാളിന്റെ ‘രഹസ്യ’ സമരവും

∙ ഉപ്പുകൊണ്ടൊരു സമരം

‘‘ഉപ്പുനാം കുറുക്കണം, ആരുവന്നെതിർക്കിലും
അൽപവും കൊടുത്തിടാതെ കോപിയാതെ നിൽക്കണം..

അംശി നാരായണപ്പിള്ളയെഴുതിയ ഈ വരികൾ ഏറ്റുചൊല്ലിയാണു കെ.കേളപ്പന്റെ നേതൃത്വത്തിലുള്ള സത്യഗ്രഹസംഘം പയ്യന്നൂരിലേക്കെത്തുന്നത്. ബ്രിട്ടിഷ് ഇന്ത്യയിൽ ഉപ്പിനു നികുതി ചുമത്തിയതിൽ പ്രതിഷേധിച്ച് മഹാത്മാഗാന്ധിജിയുടെ നേതൃത്വത്തിൽ 1930 മാർച്ച് 12ന് ആരംഭിച്ചതാണ് ഉപ്പുസത്യഗ്രഹം. ഗുജറാത്തിലെ സബർമതി ആശ്രമത്തിൽ നിന്നാരംഭിച്ച സത്യഗ്രഹയാത്ര ദണ്ഡികടപ്പുറത്തെത്തി നിയമം ലംഘിച്ച് ഉപ്പുകുറുക്കി. 

തിരഞ്ഞെടുത്ത 78 അനുയായികളാണ് ഗാന്ധിജിക്കൊപ്പമുണ്ടായിരുന്നത്. എന്തുസംഭവിക്കുമെന്ന് ആർക്കും ഉറപ്പില്ല. ആയിരക്കണക്കിനാളുകളായിരുന്നു ഓരോദിക്കിലും യാത്രയെ സ്വീകരിക്കാനുണ്ടായിരുന്നത്.  ജനകീയ വിദ്യാഭ്യാസയാത്രയായിരുന്നു അത്. ഏപ്രിൽ 4ന് ഗാന്ധി ദണ്ഡി കടപ്പുറത്തെത്തി. കടലിൽനിന്നു വെള്ളംകോരി പാത്രത്തിലാക്കി കത്തിച്ച് ഉപ്പുണ്ടാക്കി. ‘ഞാൻ ഉപ്പുനിയമം ലംഘിച്ചിരിക്കുന്നു’ എന്നു ഗാന്ധിജി പ്രഖ്യാപിച്ചു. ഇന്ത്യയിലങ്ങോളമിങ്ങോളമുള്ള ജനങ്ങൾക്കു നിയമം ലംഘിക്കാനുള്ള അനുവാദം തന്നിരിക്കുന്നു എന്ന് ഗാന്ധിജി പ്രഖ്യാപിച്ചു.  ഗാന്ധിജിയുടെ ആഹ്വാനപ്രകാരമായിരുന്നു കേളപ്പജിയുടെ നേതൃത്വത്തിൽ നമ്മുടെ നാട്ടിൽ ഉപ്പുസത്യഗ്രഹ സമരം തുടങ്ങിയത്. തമിഴ്നാട്ടിൽ രാജാജിയും ആന്ധ്രയിൽ ടി.പ്രകാശവുമായിരുന്നു ജാഥാ ലീഡർ.

അഹിംസാത്മകമായ നിസ്സഹകരണം ആയിരുന്നു ഗാന്ധിജി ലക്ഷ്യമിട്ടത്. ഉപ്പുസത്യഗ്രഹം ജനങ്ങളെ ഉണർത്താനുള്ള വലിയൊരു പ്രസ്ഥാനമായി. എല്ലാവർക്കും വേണ്ട സാധനമാണ് ഉപ്പ്. അതുകൊണ്ടാണ് ഗാന്ധി ഉപ്പു തിരഞ്ഞെടുത്തത്. 10 പൈസ വില വരുന്ന ഉപ്പിന് 250 പൈസയോളമാക്കി. വലിയൊരു അനീതിയാണെന്നതുകൊണ്ടും എല്ലാവരെയും ബാധിക്കുന്നതുകൊണ്ടുമാണ് ഗാന്ധിജി ഉപ്പുസത്യഗ്രഹം തിരഞ്ഞെടുത്തത്. ഉപ്പുകുറുക്കിയതുകൊണ്ട് സ്വാതന്ത്ര്യം കിട്ടുമോയെന്നുവരെ പലരും സംശയമുന്നയിച്ചിരുന്നു.  അതൊരു പ്രതീകം മാത്രമായിരുന്നു. ഇക്കാര്യത്തിൽ ജവാഹർലാൽ നെഹ്റുവിനോടുപോലും ഗാന്ധിജിക്കു  തർക്കിക്കേണ്ടി വന്നിട്ടുണ്ടെന്നു കേട്ടിട്ടുണ്ട്. 

∙ പൊലീസ് കിളച്ചുമറിച്ച സമരം

കോഴിക്കോട് ടൗൺഹാളിൽനിന്നാണ് കെ.കേളപ്പന്റെ നേതൃത്വത്തിലുള്ള 33 പേർ പയ്യന്നൂരിലേക്കു കാൽനടയായി പുറപ്പെട്ടത്. എന്റെ അമ്മാവൻ വൈദ്യർ ശ്രീകണ്ഠപൊതുവാൾ, വിഷ്ണുഭാരതീയൻ, കെ.പി.ആർ.ഗോപാലൻ, ടി.സുബ്രഹ്മണ്യൻ തിരുമുമ്പ്, ടി.ഹരീശ്വരൻ തിരുമുമ്പ് തുടങ്ങിയവരൊക്കെയുണ്ടായിരുന്നു ജാഥയിൽ. എട്ടുവയസ്സുകാരനായ ഞാനന്നു രാമന്തളി സ്കൂളിലായിരുന്നു. കൂട്ടുകാർക്കൊപ്പമായിരുന്നു ജാഥ കാണാൻ വഴിയരികിൽ വന്നുനിന്നത്.

സത്യഗ്രഹ സമരഭടന്മാർ ‘ഭാരത്‌മാതാകീ ജയ്, മഹാത്മാഗാന്ധിജീ കീ ജയ്’ എന്നുവിളിച്ച് ഉളിയത്തുകടവിലേക്കു മാർച്ച് ചെയ്തു. റെയിൽവേ സ്റ്റേഷനു പടിഞ്ഞാറായിരുന്നു സത്യഗ്രഹികളുടെ ക്യാംപ്. അവിടെ നിന്ന് ഒന്നര ഒന്നരകിലോമീറ്ററാണ് ഉളിയത്തു കടവിലേക്ക്. കടവിന്റെ അപ്പുറം സൗത്ത് കാനറ ജില്ലയാണ്. അവിടെയും സമരമുണ്ടായിരുന്നു.

ചെറിയ ഉപ്പുപാറയാണ് ഉളിയത്തുകടവിൽ ഉണ്ടായിരുന്നത്. സമരഭടന്മാർ ഉപ്പുവാരിയെടുത്ത് തോൾസഞ്ചിയിലിട്ടു. പിന്നീട് ക്യാംപിലെത്തി ഉപ്പ് അരിച്ച് കലത്തിലിട്ടു കുറുക്കിയെടുത്തു. ചെറിയ പായ്ക്കറ്റുകളാക്കി അവിടെവച്ചു ലേലം ചെയ്തു. വൈകിട്ട് ബസാറിൽ പൊതുയോഗമുണ്ടായിരുന്നു.  നേതാക്കന്മാരൊക്കെ അവിടെ പ്രസംഗിക്കും. ബാക്കിയുള്ള ഉപ്പു ലേലം ചെയ്യാനായി അങ്ങോട്ടു കൊണ്ടുപോയി. ഖാദി വിൽപനയുമുണ്ടായിരുന്നു. വിദേശവസ്ത്രദഹന സമരവും അവിടെ അരങ്ങേറി. മദ്യവർജനസമരവും നടന്നു. ബസാറിലെ മദ്യഷാപ്പുകൾക്കുമുൻപിൽ പിക്കറ്റിങ് നടന്നു. 

പൊലീസ് എത്തിയതോടെ  ജനങ്ങൾക്കു വാശിയായി. കൂടുതൽ പാത്രങ്ങളുമായി എത്തി. പൊലീസിനെ പ്രവേശിപ്പിക്കാതെ കൈകോർത്തുനിന്നു. പൊലീസ് ലാത്തിച്ചാർജ് െചയ്തു. കുറേപേർ അറസ്റ്റിലായി. ആളുകൾ ഓടി. കേളപ്പജി സംഘത്തോടൊപ്പമുണ്ടായിരുന്നില്ല. കോഴിക്കോട്ടുവച്ചാണ് അദ്ദേഹം അറസ്റ്റിലാകുന്നത്. മുഹമ്മദ് അബ്ദുറഹ്മാൻ, കൃഷ്ണസ്വാമി അയ്യർ, മാധവനാർ, ശർമാജി, കൃഷ്ണപിള്ള തുടങ്ങിയ നേതാക്കളെല്ലാം കൂടെ അറസ്റ്റിലായി.

∙ ഗാന്ധിജിയെ കണ്ട നിമിഷം

സ്വാമി ആനന്ദതീർഥരുടെ അഭ്യർഥന മാനിച്ച് 1934 ജനുവരി 12നാണ് ഗാന്ധിജി പയ്യന്നൂരിൽ എത്തിയത്. റെയിൽവേ സ്റ്റേഷനിൽ ഇറങ്ങിയ അദ്ദേഹം ഒരു കിലോമീറ്റർ നടന്നാണ് സ്വാമി ആനന്ദതീർഥരുടെ ആശ്രമത്തിൽ എത്തിയത്. അന്നു ഞാൻ ബാസൽമിഷൻ സ്കൂളിലായിരുന്നു. മൂരിക്കൊവ്വലിൽ സ്വാമി ആനന്ദതീർഥർ സ്വന്തം പണം ചെലവാക്കി നിർമിച്ച ഹരിജനാശ്രമത്തിലായിരുന്നു ഗാന്ധിജി വന്നത്.  സ്വാതന്ത്ര്യസമരം നിർമാണാത്മകമായിരിക്കണം എന്നായിരുന്നു ഗാന്ധിജിയുടെ കാഴ്ചപ്പാട്. 28 നിർമാണ പരിപാടികളുണ്ടായിരുന്നു ഗാന്ധിജിക്ക്.