അന്ന് കായലിലേക്ക് ചെരിഞ്ഞ ‘സീ കുട്ടനാട്’ തൊട്ടടുത്ത ബോട്ട് ജെട്ടിയിൽ ഇടിച്ചു നിന്നു. അതുകൊണ്ടു മാത്രം മറ്റൊരു ദുരന്തം ഒഴുകിമാറി. എസ് 14 എന്ന സീ കുട്ടനാട് ജലഗതാഗത വകുപ്പിന്റെ യാത്രാ ബോട്ടാണ്. പേരു സൂചിപ്പിക്കുന്നതു പോലെ കുട്ടനാട് കാണാനുള്ള ബോട്ട്. ഏതാനും വർഷം മുൻപാണ് സംഭവം. ആലപ്പുഴ ജെട്ടിക്കു സമീപം ബോട്ട് ചെരിഞ്ഞു. ജെട്ടിയുടെ തിട്ടയിൽ ഇടിച്ചു നിന്നതിനാൽ മുങ്ങിയില്ല. പിന്നീട് നടന്ന പരിശോധനയിൽ കാരണം കണ്ടെത്തി. ബോട്ടിലെ വെള്ളം പുറത്തേക്കു പോകാൻ കുഴലുകളുണ്ട്. അവ ബോട്ടിൽ ജലനിരപ്പിന് മുകളിൽ നിൽക്കണം. സീ കുട്ടനാടിൽ കുഴലിന്റെ കിടപ്പ് അങ്ങനെയല്ല. ആളു കയറിയാൽ കുഴൽ വെള്ളത്തിൽ മുങ്ങും. അതോടെ ബോട്ടിൽനിന്നു വെള്ളം പുറത്തേക്കു പോകേണ്ട കുഴൽ വഴി വെള്ളം ബോട്ടിലേക്ക് കയറിത്തുടങ്ങും. അങ്ങനെ ബോട്ട് മുങ്ങി. അതെ, കടുകുമണിയോളം സൂക്ഷ്മതയോടെയാണ് ഓരോ ബോട്ടും നിർമിക്കുന്നതും ഓടിക്കുന്നതും. ആ സൂക്ഷ്മത പാലിച്ചാൽ മാത്രമേ കരയിൽ വച്ച് നിർമിക്കുന്ന ജലയാനങ്ങൾ വെള്ളത്തിൽ മുങ്ങാതെ ഓടുകയുള്ളു. അപകടങ്ങൾ തുടർക്കഥയാകുമ്പോൾ ഈ ചോദ്യം ഉയരുന്നു– എവിടെയാണ് നമുക്ക് പാളുന്നത്? 10 വർഷത്തിൽ 16 അപകടം. അവ എന്തെങ്കിലും നമ്മെ പഠിപ്പിച്ചോ? 

∙ 3 മാസം പണി മുടങ്ങി, ചുണ്ടൻ ചെരിഞ്ഞു

ജലരാജാക്കന്മാരാണ് ചുണ്ടൻ വള്ളങ്ങൾ. ഏതാനും വർഷം മുൻപ് ഒരു വള്ളം പുതുക്കിപ്പണിയുന്നു. ശിൽപിയുടെ മനസ്സിലാണു കണക്ക്. അത് കൃത്യമാകും. പണി തുടങ്ങി കുറച്ചു കാലം കഴിഞ്ഞപ്പോൾ പണി മുടങ്ങി. പിന്നീട് മാസങ്ങൾ കഴിഞ്ഞാണ് പുന:രാരംഭിച്ചത്. പണി കഴിഞ്ഞ് വളളം നീറ്റിലിറങ്ങി. എന്നാൽ വള്ളത്തിന് നേരിയ ചെരിവ്. ഒരുപക്ഷേ പണി നിലച്ച മാസങ്ങൾക്കിടയിൽ തടി ഉണങ്ങിയതാകാം. പിന്നീട് എതിർഭാഗത്ത് ഭാരം സ്ഥാപിച്ചാണ് വള്ളം നിവർത്തിയത്. 

വള്ളമായാലും ബോട്ടായാലും കപ്പലായാലും ഇതാണ് നിയമം. കടലാസിലെ കണക്കും ശിൽപ്പിയുടെ മനസിലെ കണക്കുകൂട്ടലും ഒരുമിക്കണം. രൂപകൽപ്പനയിലെ ചെറിയ പിഴ പോലും ജലയാത്രയിൽ അപകടം വിളിച്ചു വരുത്തും. അതുപോലെ തന്നെ ജലനിയമങ്ങൾ പാലിക്കുന്നതിലും സമയബന്ധിതമായി നടത്തുന്ന പരിശോധനകളും ജലസുരക്ഷയിൽ ഒന്നാം സ്ഥാനത്താണ്. 50 പേരുടെ ജീവനെടുത്ത തേക്കടി ദുരന്തത്തിനും തട്ടേക്കാട് ദുരന്തത്തിലേക്കും വഴിയൊരുക്കിയത് ഇത്തരം പാകപ്പിഴകളാണ്. ‘ആണവ റിയാക്ടറുകളുടെ പ്രവർത്തനത്തിന് തയാറാക്കിയതിനേക്കാൾ കൂടുതൽ നിയമങ്ങൾ രാജ്യാന്തര മാരിടൈം ബോർഡ് ജലയാത്രയ്ക്ക് സജജമാക്കിയിട്ടുണ്ട്. അവ പലതും പാലിക്കപ്പെടുന്നില്ലെന്നു മാത്രം’, കൊച്ചി ശാസ്ത്ര സാങ്കേതിക സർവകലാശാല ഷിപ് ടെക്നോളജി വിഭാഗം പ്രഫസർ ഡോ. കെ. ശിവപ്രസാദ് പറയുന്നു.

∙ അപകടം, നിരോധനം, നിയന്ത്രണം... പിന്നെ എല്ലാം പഴയപടി 

‘തലയ്ക്കു മീതെ വെള്ളം ഉയർന്നാൽ അതുക്കു മീതെ വള്ളം’, കേരളം കാലങ്ങൾ പറഞ്ഞ പഴമൊഴിയാണിത്. പുഴകളും കായലുകളും നിറഞ്ഞ കേരളത്തിൽ ജലയാത്രയ്ക്ക് കാലങ്ങളുടെ ചരിത്രമുണ്ട്. പല തരത്തിലുള്ള 4000 ലേറെ ജലയാനങ്ങൾ ജലയാത്ര നടത്തുന്നു. ഈ ചരിത്രത്തിൽ അപകടങ്ങളും ഇടം തേടുന്നു. ഓരോ അപകടവും ഏതാനും നിരോധനങ്ങൾക്കും നിയന്ത്രണങ്ങൾക്കും അന്വേഷണങ്ങൾക്കും വഴി വയ്ക്കും. എന്നാൽ അപകടം കുറയ്ക്കാനോ ജലയാത്ര സുരക്ഷിതമാക്കാനോ ഇതുവരെ അധികൃതർക്ക് സാധിച്ചിട്ടില്ല. കൃത്യമായ രൂപകൽപ്പന, അവ അനുസരിച്ചുള്ള നിര്‍മാണം, സുരക്ഷാ മാനദണ്ഡങ്ങൾ പാലിച്ചുള്ള യാത്രകൾ, നിയമങ്ങൾ നടപ്പിലാക്കാനുള്ള എൻഫോഴ്മെന്റ് സൗകര്യങ്ങൾ, അനുകൂലമായ പരിസ്ഥിതി എന്നിവയാണ് ജലസുരക്ഷയിൽ പ്രധാനം. എന്നാൽ റോഡ് ഗതാഗതത്തിന് നൽകുന്ന പരിഗണന ജലഗതാഗതത്തിന് ലഭിക്കുന്നില്ലെന്നതാണ് വാസ്തവം.

രൂപകൽപ്പന അനുസരിച്ചാണ് നിർമാണം എന്ന് ഉറപ്പു വരുത്തിയ ശേഷമാണ് യാനങ്ങൾ നീറ്റിൽ ഇറക്കുന്നത്. എല്ലാ വർഷവും ജലത്തിൽ വച്ചു പരിശോധന നടത്തും. മൂന്നു വർഷം കൂടുമ്പോൾ ഡ്രൈ ഡോക്കിൽ (വെള്ളത്തിൽനിന്ന് കയറ്റി) പരിശോധനയും നടക്കും. അഴിക്കോട്, കോഴിക്കോട്, കൊടുങ്ങല്ലൂർ, നീണ്ടകര, വിഴിഞ്ഞം, കൊല്ലം, ആലപ്പുഴ എന്നിവിടങ്ങളിൽ പോർട്ട് ഓഫിസുണ്ട്. എന്നാൽ കപ്പൽ രൂപകൽപ്പന (നേവൽ ആർകിടെക്ചർ) വിദഗ്ധരുടെ അഭാവം പലയിടത്തുമുണ്ട്.