∙ വിനോദ സഞ്ചാരികൾ എന്നും രക്തസാക്ഷികൾ 

കേരളത്തിലെ ബോട്ടപകടങ്ങളുടെ ചരിത്രം പരിശോധിച്ചാൽ ആദ്യകാലത്തുള്ള അപകടങ്ങളെല്ലാം  പൊതുഗതാഗതത്തിന് ഉപയോഗിച്ചിരുന്ന ബോട്ടുകളിലായിരുന്നു. എന്നാൽ 2000ന് ശേഷമുള്ള അപകട ചിത്രങ്ങളിൽ വിനോദ സഞ്ചാരത്തിന് ഉപയോഗിക്കുന്ന ബോട്ടുകളാണ് വലിയ അപകടം വരുത്തി വച്ചിട്ടുള്ളതെന്ന് കാണാനാവും. ജലഗതാഗത വകുപ്പിന്റെ വിവിധ ബോട്ടുകൾ കേരളത്തിൽ നിത്യവും സർവീസ് നടത്തുന്നുണ്ട്. ഇവയില്‍ പലതും കാലപ്പഴക്കമേറിയതാണെന്ന ആക്ഷേപവുമുണ്ട്. എന്നാൽ ഇതിലെ യാത്രക്കാർ ജലസവാരിയുമായി പൊരുത്തപ്പെട്ടിട്ടുള്ളവരാണ്. കേരളത്തിൽ അടുത്ത കാലത്തുണ്ടായ ബോട്ടപകടങ്ങളിൽ പ്രത്യേകിച്ച് തട്ടേക്കാട്, തേക്കടി, താനൂർ തുടങ്ങിയ വലിയ അപകടങ്ങൾക്ക് ഇടയാക്കിയത് വിനോദ സഞ്ചാരികളുമായി സഞ്ചരിച്ച ബോട്ടുകളാണെന്നത് ഓർക്കേണ്ട വസ്തുതയാണ്. 

∙ എന്നും വൈകിട്ട് അപകടം, നിർത്തുമോ രാത്രിയാത്ര 

പല്ലനയിലെ ബോട്ടപകടം നടക്കുന്നത് രാത്രി പത്തര മണിക്കായിരുന്നു. ഏറ്റവും ഒടുവിൽ താനൂരിൽ ബോട്ട് അപകടത്തിൽപ്പെട്ടത് രാത്രി ഏഴര മണിയോടെയായിരുന്നു. അടുത്തിടെ കേരളത്തിലുണ്ടായ ബോട്ടപകടങ്ങള്‍ പരിശോധിച്ചാൽ വലിയ അപകടങ്ങൾ മിക്കതും സംഭവിച്ചത് വൈകിട്ട് അഞ്ച് മണിക്ക് ശേഷമാണ് എന്നു കാണാം. തേക്കടിയിലും തട്ടേക്കാടുമെല്ലാം ഇതാവർത്തിച്ചു. വിനോദ സഞ്ചാരികളെ കയറ്റുന്ന ബോട്ടുകൾ സൂര്യൻ അസ്തമിച്ചതിന് ശേഷവും പണക്കൊതിയാൽ സർവീസിന് തയ്യാറാകുന്നു. പലപ്പോഴും ദിവസത്തിലെ അവസാന സർവീസിൽ കൂടുതൽ ആളുകളെ കയറ്റാനും ബോട്ടുടമകൾ തയ്യാറാകുന്നതും കാണാം. 

∙ സ്ഥിരം കുറ്റവാളി അമിത ഭാരം, ആരു തടയും ലാഭക്കൊതി? 

സഞ്ചാരത്തിന് ഉപയോഗിക്കുന്ന ഏതു വാഹനവുമാവട്ടെ അതിൽ കയറ്റാവുന്ന ആളുകളുടെ എണ്ണം, അഥവാ ഭാരം അതിനൊരു കണക്കുണ്ടാവുക സ്വാഭാവികമാണ്. 95 പേര്‍ക്ക് കയറാവുന്ന ബോട്ടില്‍ 151 യാത്രക്കാരെ കയറ്റി പോയപ്പോഴാണ് കേരളത്തിന്റെ  ആധുനിക ചരിത്രത്തിൽ രേഖപ്പെടുത്തിയ ആദ്യത്തെ ബോട്ടപകടം ആലപ്പുഴയിൽ പല്ലനയിൽ സംഭവിച്ചത്. താനൂരിൽ സംഭവിച്ച ബോട്ടപകടത്തിലും വില്ലനായത് യാത്രക്കാരുടെ ബാഹുല്യമാണ്. തട്ടേക്കാട് അപകടത്തിൽ പത്തിൽ താഴെ ആളുകളെ കയറ്റാൻ അനുമതിയുണ്ടായിരുന്ന ബോട്ടിലാണ് 61 ‌പേരെ കയറ്റിയത്. തേക്കടിയിൽ അപകടത്തിന് കാരണമായ ജലകന്യക സർവ്വീസ് ആരംഭിച്ച് നാൽപ്പത്തിയഞ്ചാമത്തെ  ദിവസമായിരുന്നു അപകടം ഉണ്ടായത്.

പുത്തൻ ബോട്ടിനും അപകടമണിയടിച്ചത് അമിത ഭാരമായിരുന്നു. 75 പേർ കയറേണ്ട ബോട്ടിൽ 97 പേരാണ് അപകടസമയത്തുണ്ടായിരുന്നത്. അതും കൂടുതൽ പേരും കാഴ്ചകൾ കാണുന്നതിനായി മുകളിലത്തെ ഡെക്കിലായിരുന്നു. പെട്ടെന്നു വെട്ടിത്തിരിച്ചപ്പോൾ 180 ഡിഗ്രിയിൽ ബോട്ട് മറിഞ്ഞതായിരുന്നു അപകട കാരണം. കുമരകം ബോട്ടപകടത്തിലും തട്ടേക്കാട് ബോട്ട് അപകടത്തിലും അധികം യാത്രക്കാരെ കയറ്റിയത് അപകട കാരണമായി കണ്ടെത്തിയിട്ടുണ്ട്. അമിത ഭാരം കയറ്റി ജലത്തിലൂടെ സഞ്ചരിക്കുന്ന ബോട്ട് മുങ്ങും എന്നതിന് വലിയ പഠനമൊന്നും നടത്തേണ്ട കാര്യമില്ല. നിയമം കർശനമായി പാലിക്കാനുള്ള ഒരു വ്യവസ്ഥിതിയുണ്ടാക്കിയാൽ മതി. 

∙ കാലപ്പഴക്കം, ലൈസൻസില്ലാതെ സർവീസ്

വിനോദ സഞ്ചാരികളുമായി സവാരി നടത്തുന്ന ബോട്ടുകൾക്ക് അപകടം സംഭവിച്ച് കഴിയുമ്പോള്‍ മാത്രമാണ് അവയുടെ ഫിറ്റ്നസ് വിവരങ്ങളും യാത്രാനുമതിക്കായുള്ള ലൈസൻസ് വിവരങ്ങളെ കുറിച്ചും അധികാരികള്‍ അന്വേഷിച്ച് ചെല്ലുന്നത്. താനൂരിൽ അപകടത്തിൽപ്പെട്ടത് മത്സ്യബന്ധനത്തിന് ഉപയോഗിക്കുന്ന ബോട്ട് രൂപമാറ്റം വരുത്തി യാത്രാ ബോട്ടാക്കിയതാണെന്ന് കണ്ടെത്തിയിട്ടുണ്ട്. കേരളത്തിലെ മറ്റു ബോട്ടപകടങ്ങളെ കുറിച്ച് പരിശോധിച്ചാലും ഈ വീഴ്ചകൾ കാണാനാവും. നിരത്തിലോടുന്ന വാഹനങ്ങള്‍ക്കെന്ന പോലെ യാത്രാ ബോട്ടുകൾക്കും കാലാകാലങ്ങളില്‍ ഫിറ്റ്നസ് പരിശോധന നടത്തി രേഖകൾ കൈമാറേണ്ട ഉത്തരവാദിത്തം സർക്കാരിനുണ്ട്. ഇതിന് ഹാജരാകാത്ത ബോട്ടുകളെ സർവീസിൽ നിന്നും വിലക്കുകയും വേണം. ഇക്കാര്യത്തിൽ ആവർത്തിച്ചുവരുന്ന അലംഭാവമാണ് അപകടങ്ങളെ തുടർക്കഥയാക്കുന്നത്. 

∙ സുരക്ഷാ സൗകര്യങ്ങൾ കടലാസിൽ തന്നെ 

താനൂരിൽ അപകടത്തിൽപ്പെട്ട ബോട്ടിൽ നിന്നും ആളുകളെ രക്ഷിക്കാൻ പത്ത് മിനിട്ടിനകം മത്സ്യത്തൊഴിലാളികളും നാട്ടുകാരും കുതിച്ചെത്തിയിരുന്നു. ബോട്ടിലെ യാത്രക്കാർ ലൈഫ് ജാക്കറ്റ് ധരിച്ചിരുന്നുവെങ്കില്‍ ഒരാളുടെ പോലും ജീവൻ ഒരുപക്ഷേ നഷ്ടമാകുമായിരുന്നില്ല. ബോട്ടിൽ കയറ്റാൻ അനുമതിയുള്ള യാത്രക്കാർക്ക് ആവശ്യമായ ലൈഫ് ജാക്കറ്റ് കരുതണമെന്നാണ് ചട്ടം. പത്തെണ്ണം അധികവും കരുതണം, കുട്ടികളെ ഉദ്ദേശിച്ചാണ് ഇത്. ഇതു കൂടാതെ മൂന്ന് യാത്രികർക്ക് ഒരെണ്ണം വീതം ലൈഫ് ബോയയും വേണം. ബോട്ടിലെ യാത്രികരുടെ സുരക്ഷ ഉറപ്പാക്കേണ്ട ചുമതല ബോട്ടുടമയ്ക്കും സർക്കാർ സംവിധാനങ്ങൾക്കും ഒരുപോലെയുണ്ട്. നിസാരമായി കണ്ട് ലൈഫ് ജാക്കറ്റ് ധരിക്കാന്‍ മടികാട്ടിയവർക്ക് നൽകേണ്ടി വന്നത് അവരുടെ സ്വന്തം ജീവനാണ്. താനൂർ അപകടത്തിൽ തന്നെ ലൈഫ് ജാക്കറ്റ് ധരിച്ചതുകൊണ്ട് രക്ഷപ്പെട്ടുവെന്ന് അഭിപ്രായപ്പെട്ട യാത്രക്കാരുണ്ട്. എന്നാൽ കയറ്റാവുന്നതിലും അധികം യാത്രക്കാരെ കുത്തി നിറച്ച ബോട്ട് ജീവനക്കാരുടെ അനാസ്ഥയാണ് വലിയ ദുരന്തത്തിനിടയാക്കിയത്. 

∙ പഠിച്ച് മതിയായില്ലേ? അപകടങ്ങൾ ആവർത്തിക്കാതിരിക്കാൻ വേണം നടപടി

താനൂരിൽ ബോട്ടപകടം ഉണ്ടായതിന് തൊട്ടുപിന്നാലെ അപകടത്തെ കുറിച്ച് പഠിക്കാൻ ജുഡീഷ്യൽ അന്വേഷണത്തിന് സർക്കാർ ഉത്തരവായി. ഈ അന്വേഷണം പ്രഖ്യാപിക്കുമ്പോൾ 2000ത്തിന് ശേഷം കേരളത്തിലുണ്ടായ മൂന്ന് വലിയ ബോട്ട് അപകടങ്ങളുടെ കാരണങ്ങളെ കുറിച്ച് പഠിക്കാൻ നിയോഗിച്ച കമ്മീഷനുകളുടെ റിപ്പോർട്ട് സർക്കാരിന്റെ കൈവശം പൊടിപിടിച്ച് ഇരിപ്പുണ്ട് എന്നെങ്കിലും ഓർക്കണമായിരുന്നു. അപകടരഹിത ജലയാത്രയ്ക്കു വേണ്ട നിരവധി ശുപാർശകളാണ് അന്വേഷണത്തിന്റെ ഫലമായി സർക്കാരിലേക്ക് നൽകപ്പെട്ടത്. കുമരകം, തട്ടേക്കാട്, തേക്കടി ബോട്ട് ദുരന്തങ്ങൾ അന്വേഷിച്ച കമ്മീഷനുകൾ സമർപ്പിച്ച റിപ്പോർട്ടുകളിലെ പ്രധാന ശുപാർശകൾ പരിശോധിക്കാം. 

∙ ജലരേഖയായ സുരക്ഷാ നിർദേശങ്ങൾ

അപകടങ്ങളുടെ കാര്യത്തിൽ കേരളം ഉഴപ്പനായ വിദ്യാർഥിയാണ്. ഓരോ അപകടങ്ങൾക്കും ശേഷം അനേകം അന്വേഷണ കമ്മിഷനുകൾ വരും. അവ പഠിച്ച് റിപ്പോർട്ടും നൽകും. എന്നാൽ അവ നടപ്പാക്കിയോ എന്ന് ആരും തിരക്കാറില്ല. ഈ റിപ്പോർട്ടുകൾ വായിച്ചാൽ ബോട്ട് യാത്രയ്ക്ക് ധൈര്യം തോന്നും. പക്ഷേ ഓർക്കുക. ഈ നിർദേശങ്ങളിൽ ഒന്നും തന്നെ നടപ്പാക്കിയിട്ടില്ലെന്ന്. 

∙ ജസ്റ്റിസ് കെ. നാരായണക്കുറുപ്പ് കമ്മിഷൻ  

2002 ലെ 29 പേരുടെ മരണത്തിന് ഇടയാക്കിയ കുമരകം ബോട്ട് അപകടത്തിന് പിന്നാലെയാണ് അപകടരഹിത ജലയാത്രയെ കുറിച്ച് പഠിക്കുന്നതിനായി ജസ്റ്റിസ് കെ. നാരായണക്കുറുപ്പ് കമ്മിഷനെ സർക്കാർ നിയമിച്ചത്. കമ്മിഷന്റെ പ്രധാന ശുപാർശകൾ ഇവയായിരുന്നു. 

– ജലഗതാഗതത്തിനു സംസ്ഥാനത്ത് സുരക്ഷാ കമ്മിഷണർ 

– എല്ലാ യാത്രാ ബോട്ടുകൾക്കും ഇൻഷുറൻസ് പരിരക്ഷ   

– ബോട്ടുകൾ രൂപമാറ്റം വരുത്തിയാൽ കർശന നടപടി

– ലൈഫ് ജാക്കറ്റുകൾ നിർബന്ധമാക്കണം

– കൃത്യസമയത്ത് ബോട്ടുകളുടെ അറ്റകുറ്റപ്പണി 

– മരിച്ചവരുടെ ആശ്രിതർക്കു നഷ്‌ടപരിഹാരമായി ഒരു കോടിയോളം രൂപ  

– കുറ്റക്കാരായ ഉദ്യോഗസ്ഥർക്കെതിരെ നടപടി

– ഹൗസ് ബോട്ടുകളുടെ പ്രവർത്തനം ഏകീകൃത സംവിധാനത്തിലാക്കണം

– ലൈസൻസും ഫിറ്റ്നസും ഇല്ലാത്ത ബോട്ടുകളുടെ സർവീസ് തടയണം 

∙ ജസ്റ്റിസ് എം. എം. പരീതുപിള്ള കമ്മിഷൻ 

2007 ൽ സ്കൂൾ വിദ്യാര്‍ഥികളടക്കം 18 പേരുടെ മരണത്തിനിടയാക്കിയ തട്ടേക്കാട് ബോട്ട് ദുരന്തത്തിന്റെ പശ്ചാത്തലത്തില്‍ അന്വേഷണം നടത്താൻ ജസ്റ്റിസ് എം. എം. പരീതുപിള്ള കമ്മിഷനെയാണ് സർക്കാർ നിയോഗിച്ചത്. കമ്മിഷന്റെ പ്രധാന ശുപാർശകൾ 

– ഉൾനാടൻ ജലഗതാഗത മേഖലയിൽ സുരക്ഷ ഉറപ്പാക്കുന്ന തരത്തിൽ സമഗ്ര നിയമനിർമാണം വേണം. 

– സ്‌കൂളുകളിൽ പാഠ്യേതര പ്രവർത്തനങ്ങളുടെ ഭാഗമായി നീന്തൽ പരിശീലനം നൽകണം.  

– സ്‌കൂൾ വിനോദയാത്രയ്‌ക്കു ബാധകമായ സർക്കാർ ഉത്തരവ് കർശനമായി പാലിക്കണം. വീഴ്‌ചയുണ്ടായാൽ കർശനശിക്ഷ.  

– ബോട്ട് ലൈസൻസിൽ കർശന വ്യവസ്‌ഥകൾ ഏർപ്പെടുത്തി നിലവിലുള്ള സംവിധാനം പരിഷ്കരിക്കണം.   

– ബോട്ടുകളിൽ ജീവൻരക്ഷാ ഉപാധികൾ ഒരുക്കുന്നതും യഥാകാലം അറ്റകുറ്റപ്പണി      നടത്തുന്നതും ഉദ്യോഗസ്‌ഥരുടെ  മേൽനോട്ടത്തിലാക്കണം. 

– കാലപ്പഴക്കം ചെന്ന ബോട്ടുകൾ റദ്ദാക്കണം 

– കാലപ്പഴക്കമുള്ള ബോട്ടുകളുടെ സർവീസ് തടയണം 

∙ ജസ്റ്റിസ് ഇ. മൈതീൻകുഞ്ഞ് കമ്മിഷൻ 

2009 ൽ 45 പേരുടെ മരണത്തിന് കാരണമായ തേക്കടി ബോട്ടപകടത്തിന് പിന്നാലെയാണ് അന്വേഷണത്തിനായി ജസ്റ്റിസ് ഇ. മൈതീൻകുഞ്ഞ് കമ്മിഷനെ സർക്കാർ നിയോഗിച്ചത്. കമ്മിഷന്റെ പ്രധാന ശുപാർശകൾ 

– ദുരന്തങ്ങൾ ആവർത്തിക്കാതിരിക്കാനും ജലഗതാഗത മേഖലയെ ഒരു കുടക്കീഴിൽ      കൊണ്ടുവരാനുമായി സംസ്‌ഥാന മാരിടൈം ബോർഡ് രൂപീകരിക്കണം. 

– നേവൽ ആർക്കിടെക്‌ട്, മറൈൻ എൻജിനീയർ തുടങ്ങിയ വിദഗ്‌ധരെ ഇതിൽ ഉൾപ്പെടുത്തണം. 

– ബോട്ട് പരിശോധന, ജീവനക്കാരുടെ പരിശീലനം എന്നിവ ബോർഡിനു കീഴിലാക്കണം. അയൽ സംസ്‌ഥാനങ്ങളിലെ മാതൃക സ്വീകരിക്കാം.  

– ബോട്ട് യാത്രക്കാർക്ക് ഇൻഷുറൻസ് പരിരക്ഷ  

– ദുരന്തത്തിനു കാരണക്കാരായ ടൂറിസം വകുപ്പിലെയും കെടിഡിസിയിലെയും ഉന്നത ഉദ്യോഗസ്ഥർക്കെതിരെ നടപടി 

– അപകടത്തിൽപ്പെട്ട ബോട്ട് വാങ്ങിയതിന്റെ വ്യവസ്ഥകൾ പരിശോധിക്കണം.

മൂന്ന് അന്വേഷണ കമ്മിഷനുകൾ മാസങ്ങളെടുത്ത് സർക്കാർ ഖജനാവില്‍ നിന്നും ലക്ഷങ്ങൾ ചെലവഴിച്ച് വിദഗ്ധ അഭിപ്രായങ്ങൾ തേടി തയാറാക്കിയ റിപ്പോ‍‌ർട്ടുകളിലെ എത്ര നിർദേശങ്ങളാണ് നടപ്പിലാക്കാനായത്? വെള്ളത്തില്‍ വരച്ച വര എന്ന പഴഞ്ചൊല്ല് പോലെയാണ് വെള്ളത്തിൽ ഓളങ്ങളുണ്ടാക്കി അകലത്തേക്ക് മായുന്ന ബോട്ടുകളിലെ സുരക്ഷയും. ബോട്ടപകടങ്ങൾ ഇടവേളകളിൽ ആവർത്തിക്കുമ്പോൾ  കുറച്ചു കാലത്തേയ്ക്ക് ഉണരുന്ന അധികാരികള്‍ പിന്നീട് അക്കാര്യം മറക്കുന്നു. നാൽപ്പത്തിനാല് നദികളും, കായലുകളും കടലും ചേർന്ന കേരളത്തിൽ ജലമാര്‍ഗമുള്ള സഞ്ചാരത്തിന് ഇനിയെങ്കിലും പ്രാധാന്യം കൽപ്പിക്കുമെന്ന് കരുതാം.

 

English Summary: Tanur Boat Tragedy: Has Kerala learnt anything from Previous incidents?