22 പേരുടെ ജീവനെടുത്ത ‘അറ്റ്ലാന്റിക്’ ബോട്ട് ഇപ്പോഴുള്ളത് രാജീവൻ മാഷിന്റെ പറമ്പിലാണ്. അതിന് തൊട്ടു പിന്നിലായിരുന്നു അപകടം. പ്രത്യേകം കാവല്‍ ഉറപ്പാക്കി, പൊലീസ് കയറു കെട്ടിത്തിരിച്ച ആ പറമ്പിന്റെ ഒരു ഭാഗത്തേക്ക് ആർക്കും പ്രവേശനമില്ല. അന്വേഷണം പ്രഖ്യാപിച്ചതോടെ ഒരു തെളിവും നശിക്കാതിരിക്കാൻ രാവും പകലും ബോട്ടിന് കാവലിരിക്കുകയാണ് പൊലീസ്. അടുത്തേക്ക് പോകാനാവില്ലെങ്കിലും, വില്ലനായി മാറിയ ‘അറ്റ്ലാന്റിക്’ ദൂരെ നിന്ന് കാണാൻ ദിവസവും ആളുകളെത്തുന്നുണ്ട്.

പൊട്ടിയ ചില്ലുകളും തകർന്നിളകിയ ഭാഗങ്ങളുമായി കിടക്കുന്ന ‘അറ്റ്ലാന്റിക്കി’നകത്ത് ഇനിയും ഉത്തരം കിട്ടാത്ത ഒരുപാട് ചോദ്യങ്ങൾ അലയുന്നുണ്ട്. ബോട്ടിൽ എത്ര പേർ ഉണ്ടായിരുന്നു എന്നതു മുതൽ സബറുദ്ദീൻ എന്ന പൊലീസ് ഉദ്യോഗസ്ഥന്റെ മരണം വരെ നീളുന്ന സംശയങ്ങളിൽ പലതിനും മറുപടി ഉണ്ടായേ തീരൂ എന്നു നാട്ടുകാരും പറയുന്നു. താനൂർ ബോട്ടപകടം സംബന്ധിച്ച് ഞെട്ടിക്കുന്ന വിവരങ്ങളാണു നാട്ടുകാർക്കു പങ്കുവയ്ക്കാനുള്ളതും. ‘അറ്റ്ലാന്റിക്’ ലഹരിക്ക് താവളമായിട്ടുണ്ടോ, എന്തുകൊണ്ടാണ് കേസന്വേഷണത്തിനു വന്ന പൊലീസ് ഉദ്യോഗസ്ഥന്റെ മരണം ദുരൂഹതകളുണർത്തുന്നത്, സഞ്ചാരികളുമായി ഒരിക്കലും സർവീസ് നടത്താൻ പാടില്ലാത്തവിധം രൂപകൽപന ചെയ്ത ബോട്ടിന് ആരാണ് പ്രവർത്തനാനുമതി നൽകിയത്?

∙ ഇതിലും ആളുകൾ ബോട്ടിലുണ്ടായിരുന്നു...!

ബോട്ട് മുങ്ങിത്തുടങ്ങുമ്പോൾ ഉയർന്ന വലിയ നിലവിളി കേട്ടാണ് സമീപത്ത് വീടുള്ള കൃപൽ സിങ് ഓടിയെത്തുന്നത്. രക്ഷാപ്രവർത്തനത്തിന് ആദ്യം എടുത്തു ചാടിയ ആളുകളിലൊരാളുമാണ് അദ്ദേഹം. 6.30 നു ശേഷം ബീച്ചിനടുത്ത് ഉണ്ടായിരുന്ന കൃപൽ സിങ് അറ്റ്ലാന്റിക് സർവീസ് തുടങ്ങുന്നത് മുൻപുതന്നെ കണ്ടിരുന്നു. ബോട്ടിന്റെ മുകൾ നിലയിലും അണിയത്തും അമരത്തുമായി ധാരാളം ആളുണ്ടായിരുന്നു എന്നാണ് അദ്ദേഹം പറയുന്നത്. എന്നാൽ ബോട്ടിന്റെ മുകളിൽനിന്ന് രക്ഷപ്പെട്ടവരുടെ കണക്കു വന്നപ്പോൾ പക്ഷേ ഔദ്യോഗികമായി അത്രയും ആളുകള്‍ ഉണ്ടായിരുന്നതുമില്ല!

ബോട്ട് മുങ്ങിത്തുടങ്ങുന്ന സമയത്ത് മുകളിലുള്ളവർക്ക് രക്ഷപ്പെടാൻ എളുപ്പമായിരുന്നു. പക്ഷേ അങ്ങനെ രക്ഷപ്പെട്ടവർ എവിടേക്കു പോയി? നീന്തി രക്ഷപ്പെട്ടവരിൽ ഇനിയും ആളുണ്ടെങ്കിൽ അതു പുറത്തു പറയാൻ മടിക്കേണ്ടതുണ്ടോ എന്ന ചോദ്യം ഉന്നയിക്കുന്നവരിൽ സമീപവാസികളായ പലരുമുണ്ട്. അഥവാ പുറത്തുപറയാൻ അവർ മടിക്കുന്നെങ്കിൽ എന്തായിരിക്കും കാരണം? അവസാനത്തെ ട്രിപ്പിനു പാതി തുകയിലും താഴെ മാത്രം വാങ്ങി ആളുകളെ വിളിച്ചു കയറ്റുകയായിരുന്നതിനാൽ, ബോട്ടിൽ എത്ര പേരുണ്ടായിരുന്നു എന്നതിന് ഇപ്പോഴും വ്യക്തത ഇല്ല എന്നാണ് നാട്ടുകാർ പറയുന്നത്.

∙ സബറുദ്ദീൻ എത്തിയത് ആരെ പിടിക്കാൻ?

കൃത്യനിർവഹണത്തിനിടെയാണ് താനൂർ പൊലീസ് സ്റ്റേഷനിലെ സിവിൽ പൊലീസ് ഓഫിസറും മലപ്പുറം എസ്പിയുടെ സ്പെഷൽ സ്ക്വാഡ് അംഗവുമായിരുന്ന സബറുദ്ദീൻ ബോട്ടപകടത്തിൽ മരിച്ചത്. ലഹരിമരുന്ന് കേസന്വേഷണവുമായി ബന്ധപ്പെട്ടാണ് അദ്ദേഹം മഫ്തിയിൽ തൂവൽതീരത്ത് എത്തിയത് എന്നാണു വിവരം. പ്രതിയുടെ ടവർ ലൊക്കേഷൻ കേന്ദ്രീകരിച്ചുള്ള യാത്രയിലായിരുന്നു സബറുദ്ദീൻ എന്ന് പൊലീസ് പിന്നീട് സ്ഥിരീകരിക്കുകയും ചെയ്തു. സബറുദ്ദീന്റെ മരണത്തോടെ ഉത്തരമില്ലാതാകുന്നത് സബറുദ്ദീൻ തൂവൽ തീരത്ത് തേടിയത് ആരെയെന്ന ചോദ്യത്തിന്റെ ഉത്തരം കൂടിയാണ്.

തൂവൽതീരത്ത് മുൻപുതന്നെയുണ്ടായിരുന്ന സബറുദ്ദീൻ തേടിയ പ്രതി ഒരുപക്ഷേ ഈ ബോട്ടിൽ ഉണ്ടായിരുന്നിരിക്കാം എന്ന സംശയവും നാട്ടുകാരിൽ പലരും പങ്കു വയ്ക്കുന്നുണ്ട്. ‘‘ബോട്ടിൽ നിന്ന് ഏറ്റവും ഒടുവിൽ കിട്ടിയ മൃതദേഹം സബറുദ്ദീന്റേതും ഒരു ചെറിയ കുട്ടിയുടേതുമായിരുന്നു. അദ്ദേഹത്തിന് ഒരു പക്ഷേ രക്ഷപ്പെടാൻ കഴിയുമായിരുന്നു. കുട്ടിയെ രക്ഷപ്പെടുത്താൻ ശ്രമിച്ചതാണെന്നാണ് കരുതുന്നത്. ഞാനാണ് അദ്ദേഹത്തിന്റെ മൃതദേഹം പുറത്തെടുത്തത്…’’ പരപ്പനങ്ങാടി സ്വദേശി മൻസൂർ പറയുന്നു. ഒരു തെളിവുമില്ലാത്ത പല കേസുകളിലും തുമ്പുണ്ടാക്കാൻ മിടുക്കനായിരുന്ന സബറുദ്ദീൻ നാട്ടുകാർക്കിടയിൽ ജനകീയനായ പൊലീസ് ഓഫിസറായിരുന്നു. മൂന്നാമത്തെ കുഞ്ഞ് ജനിച്ച് 30 ദിവസം മാത്രം പൂർത്തിയാകുമ്പോഴാണ് അപകടം സബറുദ്ദീന്റെ ജീവനെടുത്തത്.

∙ ‘അറ്റ്ലാന്റിക്’ ലഹരിക്ക് താവളമായിട്ടുണ്ടോ?

അപകടത്തിൽപ്പെട്ട അറ്റ്ലാന്റിക് ബോട്ട് കേന്ദ്രീകരിച്ചു തന്നെയായിരുന്നു സബറുദ്ദീന്റെ അന്വേഷണം എന്ന് കരുതുന്നവർ താനൂരിലും പരപ്പനങ്ങാടിയിലുമെല്ലാമുണ്ട്. ഈ ബോട്ടിൽ നടന്ന ലഹരിപ്പാർട്ടികൾക്ക് പലരും സാക്ഷിയായിട്ടുണ്ട് എന്നതുതന്നെയാണ് കാരണം. 2023 ഏപ്രിലിൽ പല ദിവസങ്ങളിലും രാത്രി പല തവണ ഡിജെ പാർട്ടിയുമായി അറ്റ്ലാന്റിക് സർവീസ് നടത്തിയിട്ടുണ്ട്. പുറത്തുനിന്നുള്ള പലരും അതിൽ പങ്കെടുത്തിട്ടുമുണ്ടെന്നും നാട്ടുകാർ പറയുന്നു.

‘‘നോമ്പുകാലത്ത് രാത്രി ഭക്ഷണം കഴിഞ്ഞ് ചൂടു കാരണം പലപ്പോഴും പാലത്തിൽ പോയിരിക്കും. നിറയെ ലൈറ്റുകളും ബഹളവുമായി പുലർച്ചെ ഒരു മണിക്കു പോലും ആ ബോട്ടിൽ ഡിജെ പാർട്ടി നടക്കുന്നത് നേരിട്ടു കണ്ടിട്ടുണ്ട്. അതിന്റെ ഫോട്ടോയും എടുത്തു വച്ചിരുന്നു.’’ പ്രദേശവാസിയായ സെയ്തലവി പറയുന്നു. താനൂർ സ്റ്റേഷനിൽതന്നെ ബോട്ടുടമയുടെ പേരിൽ കേസുണ്ട്. തൂവൽതീരത്തെ ലഹരി ഇടപാടുകളുമായി അറ്റ്ലാന്റിക്കിനെ ബന്ധിപ്പിക്കാൻ ഇതിലും വലിയ എന്തു തെളിവ് വേണമെന്നാണ് നാട്ടുകാരുടെ ചോദ്യം.

∙ മരണസംഖ്യ ഉയരാൻ കാരണം ബോട്ടിന്റ ആകൃതി?

മത്സ്യബന്ധനബോട്ട് രൂപമാറ്റം വരുത്തിയെടുത്ത അറ്റ്ലാന്റിക് എന്ന ബോട്ട്, സർവീസ് നടത്തുന്നതിനെതിരെ ആദ്യം മുതൽ തന്നെ പ്രതിഷേധം ഉയർന്നിരുന്നു. പരാതിയെത്തുടർന്ന് പെരുന്നാളിനോട് അനുബന്ധിച്ച് 2 ദിവസം സർവീസിന് സ്റ്റേ ഉണ്ടാവുകയും ചെയ്തു. പക്ഷേ, എന്നിട്ടും ഒരു മാറ്റവും വരുത്താതെ അറ്റ്ലാന്റിക് വീണ്ടും വെള്ളത്തിലേക്കിലിറങ്ങി. സഞ്ചാരികളുമായി പോകുന്നതിന് ഒരിക്കലും അനുയോജ്യമല്ലാത്ത വിധത്തിലായിരുന്നു ബോട്ടിന്റെ രൂപകൽപന. 22 ആളുകളിലേക്ക് മരണസംഖ്യ ഉയർന്നതിനു പ്രധാന കാരണവും അതുതന്നെയാണെന്നാണ് നാട്ടുകാർ പറയുന്നത്.