മനുഷ്യനു ഭീഷണിയാകുന്ന കാട്ടുപന്നിയെയും കടുവയെയും പുലിയെയും വരെ കൊല്ലാൻ ഇവിടെ നിയമപ്രകാരം, നിയന്ത്രണങ്ങളോടെ അനുവാദമുണ്ട്. എന്നാൽ, തെരുവിൽ കുട്ടികളെ പോലും കടിച്ചുകീറി കൊല്ലുന്ന നായ്ക്കളെ വെറുതെ വിടാൻ മാത്രം ഇവിടെ നിയമങ്ങൾ ശഠിക്കുന്നത് എന്തിനാണ്? കേരളത്തിൽ പിഞ്ചുകുഞ്ഞുങ്ങൾ തെരുവുനായ്ക്കളാൽ ആക്രമിക്കപ്പെടുന്ന സംഭവങ്ങൾ വർധിക്കുമ്പോൾ കൊല്ലുന്നതല്ലാതെ മറ്റെന്താണു പ്രതിരോധ മാർഗം എന്ന് ഏതൊരു അച്ഛനും അമ്മയും ചിന്തിച്ചു പോകുന്നതു സ്വാഭാവികം.

കണ്ണൂർ മുഴപ്പിലങ്ങാടിൽ തെരുവുനായ്ക്കൾ കടിച്ചുകൊന്ന ഭിന്നശേഷിക്കാരനായ പതിനൊന്നു വയസ്സുകാരൻ നിഹാൽ നൗഷാദിന്റെ മരണം കേരളത്തിന്റെ മനസ്സാക്ഷിയിൽ ഉണർത്തുന്നത് നിയമത്തിന്റെ വാൾത്തലയേക്കാൾ മൂർച്ചയേറിയ ചോദ്യങ്ങളാണ്. നിഹാലിനു പിന്നാലെ മുഴപ്പിലങ്ങാടിൽതന്നെ ഒൻപതു വയസ്സുകാരി ജാൻവിയെ തെരുവുനായ്ക്കൾ ആക്രമിച്ച സംഭവം നിയമസംവിധാനത്തോടും അധികൃതരോടും ഉള്ള ചോദ്യങ്ങളുടെ മൂർച്ച വർധിപ്പിക്കുന്നു.

∙ നായ്ക്കളെ കൊല്ലാൻ വകുപ്പുണ്ടോ?

തെരുവുനായ്ക്കളെ കൊല്ലാൻ പാടില്ലെന്ന സുപ്രീം കോടതി വിധി നിലനിൽക്കെത്തന്നെ, ആക്രമണകാരികളായ തെരുവുനായ്ക്കളെ നിയന്ത്രിക്കാൻ പുതിയ ഒരു നിയമവഴി കണ്ടെത്തിയിരിക്കുകയാണ് സംസ്ഥാന സർക്കാർ. ക്രിമിനൽ നടപടി ചട്ടത്തിലെ 133–ാം വകുപ്പാണ് സർക്കാർ കണ്ടെത്തിയ പോംവഴി. എന്നാൽ, ഈ വഴിക്കും വിലങ്ങുതടിയാകാൻ കോടതിയും ഉത്തരവുകളും വരുമോയെന്ന് ആകാംക്ഷയോടെ ഉറ്റുനോക്കുകയാണ് തെരുവുനായ്ക്കളെകൊണ്ട് പൊറുതിമുട്ടിയ പൊതുജനം.

ആക്രമണകാരികളായ തെരുവുനായ്ക്കളെ കുറിച്ച് ക്രിമിനൽ നടപടി ചട്ടത്തിലെ (സിആർപിസി) 133–ാം വകുപ്പ് പ്രകാരം പരാതിപ്പെട്ടാൽ അവയെ കൊല്ലണമോ എന്ന കാര്യത്തിൽ സബ് ഡിവിഷനൽ മജിസ്ട്രേട്ടുമാർക്കോ (ആർഡിഒ) ജില്ലാ മജിസ്ട്രേട്ടുമാർക്കോ (കലക്ടർ) തീരുമാനിക്കാം എന്നാണു സംസ്ഥാന സർക്കാർ കണ്ടെത്തിയിരിക്കുന്ന പോംവഴി. തദ്ദേശ വകുപ്പ് മന്ത്രി എം.ബി.രാജേഷിന്റെയും മൃഗസംരക്ഷണ വകുപ്പ് മന്ത്രി ജെ.ചിഞ്ചുറാണിയുടെയും നേതൃത്വത്തിൽ ചേർന്ന ഉന്നതതല യോഗത്തിലാണു കഴിഞ്ഞ ദിവസം തീരുമാനം ഉണ്ടായത്.

പൊതുജനത്തിനു ശല്യമാകുന്ന മൃഗത്തെ ആവശ്യമെങ്കിൽ കൊല്ലാൻ ഉത്തരവിടാൻ സബ് ഡിവിഷനൽ മജിസ്ട്രേട്ടിനെയും (ആർഡിഒ) ജില്ലാ മജിസ്ട്രേട്ടിനെയും അധികാരപ്പെടുത്തുന്നതാണ് സിആർപിസിയിലെ 133–ാം വകുപ്പ്. നിയമപ്രകാരം ഉത്തരവ് നൽകേണ്ടത് നായയുടെ ഉടമസ്ഥനാണ്. കേന്ദ്ര സർക്കാർ ഈയിടെ പുതുക്കിയ അനിമൽ ബെർത്ത് കൺട്രോൾ റൂൾസിലെ (എബിസി ചട്ടങ്ങൾ) വ്യവസ്ഥ പ്രകാരം തെരുവുനായയുടെ ‘ഉടമസ്ഥൻ’ പ്രാദേശിക അധികൃതർ അഥവാ തദ്ദേശ സ്ഥാപനങ്ങളാണ്. അതിനാൽ, പൊതുജനങ്ങൾ സിആർപിസി പ്രകാരം പരാതിപ്പെട്ടാൽ അതത് തദ്ദേശ സ്ഥാപന സെക്രട്ടറിമാരാകും സബ് ഡിവിഷനൽ മജിസ്ട്രേട്ടിന്റെയോ ജില്ലാ മജിസ്ട്രേട്ടിന്റെയോ ഉത്തരവ് നടപ്പാക്കേണ്ടി വരിക.

തെരുവുനായ്ക്കളെ 133–ാം വകുപ്പ് പ്രകാരം കൊല്ലുന്നത് സംബന്ധിച്ച് സർക്കാരിന് നിർദേശിക്കാൻ ആവുമോയെന്ന് കൂടി പരിശോധിക്കാനാണ് മന്ത്രിമാരുടെ നേതൃത്വത്തിൽ ഉന്നതതല യോഗം ചേർന്നത്. ഇക്കാര്യത്തെക്കുറിച്ച് പഠിക്കാൻ തദ്ദേശ വകുപ്പ് പ്രിൻസിപ്പൽ ഡയറക്ടർ എം.ജി.രാജമാണിക്യത്തെയും മൃഗസംരക്ഷണ വകുപ്പ് ഡയറക്ടർ ഡോ.എ.കൗശികനെയും ഒരാഴ്ച മുൻപ് സംസ്ഥാന സർക്കാർ ചുമതലപ്പെടുത്തിയിരുന്നു. നിയമവശങ്ങൾ പരിശോധിച്ച് കരട് മാർഗനിർദേശം തയാറാക്കാനാണ് ഇരുവരോടും ആവശ്യപ്പെട്ടത്. തെരുവുനായ്ക്കളെ കൊല്ലാൻ പാടില്ലെന്ന സുപ്രീം കോടതി ഉത്തരവ് നിലനിൽക്കെ 133–ാം വകുപ്പിന്റെ പ്രയോഗ സാധ്യത വെല്ലുവിളിയാണെന്ന് ഇരു ഉദ്യോഗസ്ഥരും വ്യക്തമാക്കുന്നു.

നായ്ക്കളെ കൊല്ലാൻ സർക്കാരിനു നിർദേശം നൽകാനാവില്ലെന്നു ഉന്നതതല യോഗത്തിൽ പങ്കെടുത്ത അഡ്വക്കറ്റ് ജനറൽ കെ.ഗോപാലകൃഷ്ണ കുറുപ്പും വിശദീകരിച്ചതോടെ സർക്കാർ വീണ്ടും പ്രതിസന്ധിയിലായി. എന്നാൽ, സബ് ഡിവിഷനൽ, ജില്ലാ മജിസ്ട്രേട്ടുമാർക്ക് ഉചിത തീരുമാനം എടുക്കാൻ സിആർപിസിയിലെ വ്യവസ്ഥ അനുവദിക്കുന്നുണ്ട് എന്ന എജിയുടെ നിയമോപദേശമാണ് ഇപ്പോൾ സർക്കാരിന്റെ ആയുധം. ഇതോടെ, ജനം പരാതി നൽകട്ടെയെന്നും ഉചിതമായ നടപടി കലക്ടർമാരും ആർഡിഒമാരും സ്വീകരിക്കെട്ടെ എന്നും ഉള്ള തീരുമാനത്തിലേക്ക് ഉന്നതതലയോഗം എത്തിച്ചേർന്നു.

∙ നായ്ക്കളെ കൊല്ലാൻ സുപ്രീം കോടതി അനുവദിക്കുമോ?

പേവിഷബാധ ഉള്ളതും ആക്രമണകാരികളും ആയ തെരുവുനായ്ക്കളെ ദയാവധം ചെയ്യാൻ അനുവദിക്കണമെന്ന് ആവശ്യപ്പെട്ട് കണ്ണൂർ ജില്ലാ പഞ്ചായത്ത് പ്രസിഡന്റ് സമർപ്പിച്ച ഹർജി പരിഗണിച്ച സുപ്രീം കോടതി ജൂലൈ 12ന് വാദം കേൾക്കാമെന്ന് അറിയിച്ചിട്ടുണ്ട്. കണ്ണൂരിൽ ഭിന്നശേഷിക്കാരനായ കുട്ടി തെരുവുനായ്ക്കളുടെ കടിയേറ്റ് കൊല്ലപ്പെട്ട സംഭവം ദൗർഭാഗ്യകരമാണെന്ന് കേസ് പരിഗണിക്കുന്നതിനിടെ സുപ്രീം കോടതി അഭിപ്രായപ്പെട്ടിരുന്നു.